പി.എസ്.സി. പരീക്ഷാരീതിയില്‍ അടിമുടി മാറ്റം വരുത്താന്‍ ആലോചിക്കുന്നു. തസ്തികകളിലേക്ക് ഒരേ വിദ്യാഭ്യാസ യോഗ്യത നിഷ്‌കര്‍ഷിച്ചിരിക്കുന്നവയ്ക്ക് രണ്ടു ഘട്ടമായി പരീക്ഷ നടത്താനാണു തീരുമാനം. സ്‌ക്രീനിങ്ങിനായി ആദ്യം നടത്തുന്ന പൊതു പരീക്ഷയെഴുതി യോഗ്യത നേടുന്നവര്‍ക്കു മാത്രമേ റാങ്ക് ലിസ്റ്റ് തയാറാക്കാനായി നടത്തുന്ന മെയിന്‍ പരീക്ഷയെഴുതാന്‍ കഴിയൂ. സ്‌ക്രീനിങ് ടെസ്റ്റിലെ മാര്‍ക്ക് റാങ്ക് ലിസ്റ്റിനു കണക്കിലെടുക്കില്ല. തസ്തികയ്ക്ക് അനുസൃതമായ ചോദ്യങ്ങളാകും പ്രധാന പരീക്ഷയിലുണ്ടാകുക.

പുതിയ രീതി കൂടുതല്‍ അപേക്ഷകരുള്ള തസ്തികകളിലേക്കാകും തുടക്കത്തില്‍ സ്വീകരിക്കുന്നത്. അതോടെ പ്രധാന പരീക്ഷയെഴുതുന്നവരുടെ എണ്ണം കുറയുമെന്നും കാലതാമസമില്ലാതെ റാങ്ക് ലിസ്റ്റ് പ്രസിദ്ധീകരിക്കാന്‍ കഴിയുമെന്നും പി.എസ്.സി. ചെയര്‍മാന്‍ എം.കെ. സക്കീര്‍ പറഞ്ഞു. ഒഴിവിന്റെ അഞ്ചിരട്ടി ഉദ്യോഗാര്‍ഥികളെ റാങ്ക് ലിസ്റ്റില്‍ ഉള്‍പ്പെടുത്തുന്ന രീതി മാറ്റില്ല.

സംസ്ഥാനത്ത് 2015-ല്‍ 68 ലക്ഷം ഉദ്യോഗാര്‍ഥികളുണ്ടായിരുന്നത് 2018-ല്‍ ഒരു കോടി കവിഞ്ഞു. ഇപ്പോഴുള്ളത് ഒന്നേകാല്‍ കോടിയാണ്. അതിനാലാണു കാലാനുസൃതമായ മാറ്റങ്ങള്‍ വരുത്തുന്നത്. കോവിഡ് കാലത്ത് പതിനൊന്നായിരത്തോളം നിയമന ശിപാര്‍ശ നല്‍കിയെന്നും ചെയര്‍മാന്‍ അറിയിച്ചു.

എസ്.എസ്.എല്‍.സി, പ്ലസ് ടു, ബിരുദം അടിസ്ഥാന യോഗ്യതയുള്ളവര്‍ക്കായി വെവ്വേറെ തലത്തില്‍ പൊതുപരീക്ഷ, പ്രാഥമിക പട്ടികയില്‍ ഇടംനേടുന്നവര്‍ക്കായി അതത് തസ്തികയിലേക്ക് രണ്ടാം പരീക്ഷ, സെപ്റ്റംബര്‍ വരെ പുറപ്പെടുവിക്കുന്ന വിജ്ഞാപനങ്ങളിലേക്ക് ആദ്യ പൊതുപരീക്ഷ, സാങ്കേതിക വിദ്യാഭ്യാസ യോഗ്യത ആവശ്യമായ തസ്തികകള്‍ക്കും മെഡിക്കല്‍, എന്‍ജിനീയറിങ്, ഡ്രൈവിങ്, അധ്യാപക തസ്തികകള്‍ക്കും പൊതു പ്രാഥമിക പരീക്ഷയില്ല എന്നിവയാണ് പി.എസ്.സിയുടെ പ്രധാന തീരുമാനങ്ങള്‍.

മാറ്റിവച്ച പരീക്ഷകള്‍ സെപ്റ്റംബര്‍ മുതല്‍ നടത്തും. പുതുതായി അപേക്ഷ ക്ഷണിച്ച തസ്തികകളിലേക്കു പരീക്ഷ ഡിസംബര്‍ മുതല്‍. കെ.എ.എസ്. പ്രാഥമിക പരീക്ഷയുടെ ഫലം 26-ന്. നിലവിലുള്ള റാങ്ക് ലിസ്റ്റുകളുടെ കാലാവധി നീട്ടില്ല.