മുപ്പതിലേറെ തസ്തികകളില്‍ സംസ്ഥാന യുവജന കമ്മിഷനില്‍ താത്കാലിക നിയമനം നടത്തുന്നു. 2020-21 വര്‍ഷത്തേക്കു മാത്രമായാണ് അപേക്ഷ ക്ഷണിച്ചതെങ്കിലും നിയമനം ലഭിക്കുന്നവര്‍ക്ക് പദ്ധതികള്‍ തുടര്‍ന്നുപോകുന്നതനുസരിച്ച് തുടരാനാകുമെന്ന വ്യവസ്ഥയോടെയാണ് നിയമനം.

റോഡ് സുരക്ഷ, മാനസികാരോഗ്യം, ഭരണഘടനാ വിദ്യാഭ്യാസം, പരിസ്ഥിതി സംരക്ഷണം എന്നിവയ്ക്കായും മദ്യം, മയക്കുമരുന്ന്, റാഗിങ്, സൈബര്‍ കുറ്റകൃത്യങ്ങള്‍, തീവ്രവാദം എന്നിവയ്ക്കെതിരായും ബോധവത്കരണ പരിപാടികള്‍ നടത്തുന്നതിനായി 14 ജില്ലാ കോ-ഓര്‍ഡിനേറ്റര്‍മാരെയും ഇവരുടെ പ്രവര്‍ത്തനങ്ങള്‍ വിലയിരുത്തുന്നതിനായി രണ്ട് സംസ്ഥാനതല കോ-ഓര്‍ഡിനേറ്റര്‍മാരെയുമാണ് നിയമിക്കുന്നത്.

സംസ്ഥാന കോ-ഓര്‍ഡിനേറ്റര്‍മാര്‍ക്ക് ബിരുദവും ജില്ലാ കോ-ഓര്‍ഡിനേറ്റര്‍മാര്‍ക്ക് പ്ലസ്ടുവും മാത്രമാണ് ആവശ്യമുള്ള യോഗ്യത. ജില്ലാ കോ-ഓര്‍ഡിനേറ്റര്‍മാര്‍ക്ക് ആറായിരം രൂപയും സംസ്ഥാനതലത്തില്‍ 12,000 രൂപയും ശമ്പളം ലഭിക്കും.

പരിസ്ഥിതി സംരക്ഷണം, കൃഷിയുമായി ബന്ധപ്പെട്ട തൊഴില്‍പ്രശ്നങ്ങളില്‍ പരിഹാരം കണ്ടെത്തല്‍, ഗ്രീന്‍സോണ്‍ പദ്ധതി ആവിഷ്‌കരിക്കുക, യുവകര്‍ഷകരെ കണ്ടെത്തി കാര്‍ഷിക സംരംഭങ്ങളിലേക്കു കൊണ്ടുവരിക എന്നീ ഉത്തരവാദിത്തങ്ങളുള്ള ഗ്രീന്‍ യൂത്ത് കോ-ഓര്‍ഡിനേറ്റര്‍മാരുടേതാണു മറ്റൊരു തസ്തിക. ഈ തസ്തികയിലും 14 ജില്ലകളില്‍ ഓരോന്നും സംസ്ഥാനതലത്തില്‍ ഒന്നും ഒഴിവുകളുണ്ട്.

വെബ് അഡ്മിനിസ്ട്രേറ്റര്‍, മീഡിയ കോ-ഓര്‍ഡിനേറ്റര്‍, രണ്ട് ലീഗല്‍ അഡൈ്വസര്‍മാര്‍ എന്നിവയാണ് നിയമനം നടത്തുന്ന മറ്റു തസ്തികകള്‍. വെബ് അഡ്മിനിസ്ട്രേറ്റര്‍, മീഡിയ കോ-ഓര്‍ഡിനേറ്റര്‍ തസ്തികകള്‍ക്ക് 15,000 രൂപ വീതവും ലീഗല്‍ അഡൈ്വസര്‍മാര്‍ക്ക് 5,000 രൂപ വീതവുമായിരിക്കും പ്രതിമാസ ശമ്പളം. യുവജന കമ്മിഷന്റെ ജോബ് പോര്‍ട്ടല്‍, വെബ്സൈറ്റ് എന്നിവയുടെ ചുമതലയായിരിക്കും വെബ് അഡ്മിനിസ്ട്രേറ്റര്‍ക്ക്. ബിരുദവും ഡിപ്ലോമ/ സര്‍ട്ടിഫിക്കറ്റ് കോഴ്സുമാണ് യോഗ്യത.

പത്രപ്രവര്‍ത്തനമേഖലയിലെ പരിചയവും ന്യൂ മീഡിയ പരിജ്ഞാനവും മാത്രമാണ് മീഡിയ കോ-ഓര്‍ഡിനേറ്റര്‍ക്ക് ആവശ്യമുള്ള യോഗ്യത. ഓഗസ്റ്റ് 12 നാണ് ഒഴിവുകള്‍ സംബന്ധിച്ച വിജ്ഞാപനം ഇറക്കിയത്. അത് വെബ്സൈറ്റില്‍ മാത്രമായിരുന്നതിനാല്‍ കൂടുതല്‍ പേര്‍ അറിഞ്ഞിട്ടില്ല.