തിരുവനന്തപുരത്തുകാരുടെ രണ്ടേ രണ്ട് അഭിമാനങ്ങളേയുള്ളൂ. ഒന്ന് തിരുവനന്തപുരം എയര്‍പോര്‍ട്ടും മറ്റൊന്ന് വിഴിഞ്ഞം തുറമുഖവും. ചരിത്ര പ്രധാനമായ വിഴിഞ്ഞം തുറമുഖം പല സര്‍ക്കാരുകള്‍ വിചാരിച്ചിട്ടും ഒന്നും നടന്നില്ല. അവസാനം നരേന്ദ്ര മോദിയാണ് അദാനിയെ ഇറക്കി വിഴിഞ്ഞത്തിന് ജീവന്‍ വയ്പ്പിച്ചത്.

40 വര്‍ഷമാണ് വിഴിഞ്ഞം പദ്ധതിയുടെ കരാര്‍. 2015 ഡിസംബര്‍ 5നാണ് വിഴിഞ്ഞത്തെ രാജ്യാന്തര തുറമുഖത്തിന്റെ നിര്‍മാണം ആരംഭിച്ചത്. നാല് വര്‍ഷംകൊണ്ട് നിര്‍മാണം പൂര്‍ത്തിയാക്കുമെന്നായിരുന്നു കരാര്‍. നിലവിലെ അവസ്ഥയില്‍ അടുത്ത വര്‍ഷം ഡിസംബര്‍ വരെയെങ്കിലും നിര്‍മാണ പ്രവര്‍ത്തനങ്ങള്‍ നീളുമെന്നാണ് കണക്കുകൂട്ടല്‍. പുലിമുട്ട് നിര്‍മാണത്തിന് കല്ല് കിട്ടാത്തതാണ് കാലതാമസത്തിന് കാരണമെന്നാണ് അദാനി ഗ്രൂപ്പിന്റെ വിശദീകരണം. ഓഖി ചുഴലിക്കാറ്റുണ്ടാക്കിയ നാശനഷ്ടങ്ങളാണ് മറ്റൊരു കാരണം. എന്തായാലും വൈകിയാണെങ്കിലും അദാനി വഴി കപ്പലിറങ്ങുക തന്നെ ചെയ്യും.

കപ്പലിന് ശേഷമാണ് വിമാനം വന്നത്. എയര്‍പോര്‍ട്ടിലെ വികസന മുരടിപ്പ് മാറാന്‍ അദാനി തന്നെ വന്നാലോ എന്ന ആലോചന വന്നു. അതിലും എംപികൂടിയായ ശശീതരൂരിന് വലിയ പേരുദോഷം കേട്ടു. അദാനി കുടുംബവുമായി ശശി തരൂരിനുള്ള അടുപ്പമാണതിന് കാരണം. ശശി തരൂരിനും മോദിയ്ക്കും എതിരെ പല കീ വിളികള്‍ നടന്നെങ്കിലും മോദിയല്ലേ ആള് പറഞ്ഞതില്‍ നിന്നും പിന്നോട്ട് പോയില്ല.

തിരുവനന്തപുരം വിമാനത്താവളം അദാനി ഗ്രൂപ്പിന് 50 വര്‍ഷത്തേക്ക് നടത്തിപ്പിന് നല്‍കാന്‍ കേന്ദ്രമന്ത്രിസഭാ തീരുമാനിച്ചിരിക്കുകയാണ്. പൊതുസ്വകാര്യ പങ്കാളിത്തത്തില്‍ വിമാനത്താവളത്തിന്റെ നടത്തിപ്പ്, വികസനം, നവീകരണം തുടങ്ങിയ പ്രവര്‍ത്തനങ്ങള്‍ നടക്കും. ജയ്പുര്‍, ഗുവാഹത്തി വിമാനത്താവളങ്ങളും 50 വര്‍ഷത്തേക്ക് സ്വകാര്യകമ്പനികള്‍ക്ക് നടത്തിപ്പിന് നല്‍കും.

രാജ്യത്തെ നൂറിലധികം വിമാനത്താവളങ്ങളുടെ ഉടമസ്ഥത, നടത്തിപ്പ് അവകാശം എന്നിവ കേന്ദ്ര വ്യോമയാന മന്ത്രാലയത്തിനു കീഴിലുള്ള എയര്‍പോര്‍ട്ട് അതോറിറ്റിക്കാണ്. എയര്‍പോര്‍ട്ട് അതോറിറ്റി ഓഫ് ഇന്ത്യയുടെ കീഴിലുള്ള അഹമ്മദാബാദ്, ലഖ്‌നൗ, മംഗലാപുരം എന്നീ വിമാനത്താവളങ്ങള്‍ നേരത്തെ അദാനി ഗ്രൂപ്പിന് നടത്തിപ്പിന് നല്‍കിയിരുന്നു.

എയര്‍പോര്‍ട്ട് അതോറിറ്റി ഓഫ് ഇന്ത്യയുടെ വരുമാനം കൂട്ടാനും വിമാനത്താവളങ്ങളെ ലോകനിലവാരത്തിലേക്ക് ഉയര്‍ത്താനുമാണ് സ്വകാര്യവത്കരണം എന്നാണ് കേന്ദ്ര സര്‍ക്കാര്‍ നിലപാട്. വിമാനത്താവളത്തിന്റെ നടത്തിപ്പാവകാശം അദാനി ഗ്രൂപ്പിന് നല്‍കാനുള്ള കേന്ദ്ര സര്‍ക്കാര്‍ നടപടികള്‍ തടയണമെന്ന് ആവശ്യപ്പെട്ട് സംസ്ഥാന സര്‍ക്കാരും കെഎസ്‌ഐഡിസിയും നേരത്തെ ഹൈക്കോടതിയെ സമീപിച്ചിരുന്നു. എന്നാല്‍, ഹര്‍ജികള്‍ ഹൈക്കോടതി തള്ളിയിരുന്നു.

സര്‍ക്കാരിനോ അദാനിക്കോ എന്ന അനിശ്ചിതാവസ്ഥ കാരണം രണ്ടുവര്‍ഷമായി തിരുവനന്തപുരം വിമാനത്താവളം മുരടിപ്പിലായിരുന്നു. അന്താരാഷ്ട്ര സര്‍വീസുകള്‍ കുറഞ്ഞ്, വികസനപ്രവര്‍ത്തനങ്ങള്‍ സ്തംഭിച്ചു. ജെറ്റ്, സൗദിയ, ഫ്‌ലൈ ദുബായ്, സില്‍ക്ക് എയര്‍ലൈനുകള്‍ ഇവിടെ നിന്നുള്ള അന്താരാഷ്ട്ര സര്‍വീസുകള്‍ അവസാനിപ്പിച്ചു.

വിമാനക്കമ്പനികളുമായി മുഖ്യമന്ത്രി നടത്തിയ ചര്‍ച്ചകളെത്തുടര്‍ന്ന് ചില ആഭ്യന്തര സര്‍വീസുകള്‍ക്ക് ധാരണയായെങ്കിലും തുടര്‍ നടപടിയുണ്ടായില്ല. ചെലവ് കുറഞ്ഞ വിമാനക്കമ്പനിയായ ഗോഎയര്‍, എയര്‍ ഏഷ്യ എന്നിവ ബംഗളൂരു, ഹൈദരാബാദ്, ന്യൂഡല്‍ഹി, കണ്ണൂര്‍, കൊച്ചി എന്നിവിടങ്ങളിലേക്ക് സര്‍വീസിന് ശ്രമിച്ചെങ്കിലും ഫലം കണ്ടില്ല. ഒരു വര്‍ഷത്തിനിടെ തിരുവനന്തപുരത്തേക്കുള്ള അഞ്ഞൂറോളം സര്‍വീസുകളാണ് കുറഞ്ഞത്. ശ്രീലങ്കയിലേക്കും സിംഗപ്പൂരിലേക്കുമുള്ള സില്‍ക്ക് എയര്‍ സര്‍വീസ് നിറുത്തി. ദുബായിലേക്ക് ആഴ്ചയില്‍ നാല് സര്‍വീസുണ്ടായിരുന്ന ഫ്‌ലൈദുബായ് കോഴിക്കോട്ടേക്ക് പോയി. ജെറ്റിന്റെ ദമാം സര്‍വീസ് പോയതോടെ സൗദിയിലേക്ക് എയര്‍ ഇന്ത്യയുടെ റിയാദ് വിമാനം മാത്രമായി. ദുബായിലേക്ക് എമിറേറ്റ്‌സും അബുദാബിയിലേക്ക് എത്തിഹാദും സര്‍വീസ് പകുതിയാക്കി. ഈ സമയത്താണ് കപ്പലിന് പുറകേ വിമാനവുമായി അദാനിയെത്തുന്നത്.