ഭവനരഹിതർക്കു വീടു വച്ചു നൽകേണ്ട കോടികൾ കമ്മിഷനായും മറ്റും പലരുടെയും കൈകളിലേക്ക് എത്തിയെന്ന വാർത്തകൾ പുറത്ത് വന്നതോടെ ആ രൊക്കെയാണ് ഈ തട്ടിപ്പു നടത്തിയതെന്നും ആരൊക്കെയാണു കൂട്ടുനിന്നതെന്നുമുള്ള ചോദ്യങ്ങൾ ബാക്കി ആകുകയാണ് .
തൃശൂർ വടക്കാഞ്ചേരിയിലെ വിവാദമായ ലൈഫ് മിഷൻ പദ്ധതിയുടെ തുടർ പ്രവർത്തനങ്ങളിൽ പങ്കില്ലെന്നു പറഞ്ഞായിരുന്നു പദ്ധതിയുമായി ബന്ധപ്പെട്ട് ഇതുവരെ പുറത്തുവന്നിരിക്കുന്ന വൻ അഴിമതിയിൽനിന്നു സംസ്ഥാന സർക്കാർ മാറിനി ന്നത്. എന്നാൽ, പദ്ധതിയുടെ വിവിധ ഘട്ടങ്ങളിൽ സർക്കാരിന്റെ പങ്കാളിത്തം വ്യക്തമാക്കുന്ന ധാരണാപത്രം പുറത്ത് വന്നു.

സർക്കാർ ഭൂമിയിലായിരിക്കണം നിർമാണമെന്നതു മാത്രമല്ല, പ്രോജക്ട് കൺസൽറ്റൻസിയുടെയും സംസ്ഥാന സർക്കാരിന്റെയും മേൽനോട്ടത്തിലായിരിക്കണം പണി നടക്കേണ്ടതെന്നും യുഎഇ കോൺസൽ ജനറലും യൂണിടാക് ബിൽഡേഴ്സ് മാനേജിങ് പാർട്നർ സന്തോഷ് ഈപ്പനും തമ്മിൽ 2019 ജൂലൈ 31ന് ഒപ്പിട്ട ഫ്ലാറ്റ് നിർമാണ കരാറിൽ പറയുന്നു . യുഎഇ കോൺസുലേറ്റ് ഉദ്യോഗസ്ഥരും റെഡ് ക്രസന്റ് അതോറിറ്റി പ്രതിനിധികളും സംസ്ഥാന സർക്കാരുമായി 2019 ജൂലൈ 11നു ധാരണാപത്രം ഒപ്പിട്ടതിനു ശേഷമാണിത്. അതേസമയം, പ്രോജക്ട് കൺസൽറ്റൻസി ആരാണെന്നു കോൺസുലേറ്റ് – യൂണിടാക് കരാറിൽ പറയുന്നില്ല.

യുഎഇ റെഡ് ക്രസന്റ് അതോറിറ്റിയും സംസ്ഥാന സർക്കാരും ചേർന്നുണ്ടാക്കിയ ധാരണാപത്രം റെഡ് ക്രസന്റ് അതോറിറ്റി സംസ്ഥാനത്തിന് അനുവദിക്കുന്ന ഒരു കോടി യുഎഇ ദിർഹത്തിന്റെ സഹായ പദ്ധതിയുടെ ആണ്. പ്രളയത്തിൽപെട്ടവർക്കു വീടുണ്ടാക്കാൻ 70 ലക്ഷം ദിർഹവും ആശുപത്രിയുണ്ടാക്കാൻ 30 ലക്ഷം ദിർഹവും അനുവദിക്കുന്നതായാണ് ധാരണാപത്രത്തിൽ പറയുന്നത്. സർക്കാരും റെഡ് ക്രസന്റ് അതോറിറ്റിയും തമ്മിൽ ഭാവിയിലുണ്ടാക്കുന്ന വിശദമായ രൂപരേഖ, പദ്ധതി, ധാരണകൾ എന്നിവ അനുസരിച്ചായിരിക്കും ഇതെന്നും ധാരണാപത്രത്തിൽ പറയുന്നു.

എന്നാൽ തദ്ദേശഭരണ വകുപ്പിന്റെ 2019 ജൂലൈ 11ലെ ഉത്തരവിൽ വടക്കാഞ്ചേരി ലൈഫ് പദ്ധതിയിൽ പ്രോജക്ട് മാനേജ്മെന്റ് കൺസൽറ്റൻസി ഹാബിറ്റാറ്റ് ആണെന്നു വ്യക്തമാക്കി . 13.09 കോടി രൂപ അടങ്കലുള്ള വടക്കാഞ്ചേരി ചരൽപ്പറമ്പ് പദ്ധതിയിൽ 86 യൂണിറ്റുകളുടെ നിർമാണമാണു നിർദേശിച്ചിരിക്കുന്നതെന്ന് ഉത്തരവിൽ വ്യക്തമാക്കിയിട്ടുണ്ട്. സംസ്ഥാനത്ത് ഇത്തരത്തിലുള്ള 24 ഭവന‌സമുച്ചയങ്ങൾക്ക് 644 കോടി രൂപയുടെ ഭരണാനുമതി നൽകിക്കൊണ്ടുള്ള ഉത്തരവിലാണു ചരൽപ്പറമ്പ് പദ്ധതിയെപ്പറ്റിയും പറയുന്നുണ്ട് .സംസ്ഥാന സർക്കാരും യുഎഇ റെഡ് ക്രസന്റ് അതോറിറ്റിയും തമ്മിലുണ്ടാക്കിയ ധാരണാപത്രത്തിൽ പറയുന്നതു പോലെ ഭവന, ആശുപത്രി നിർമാണത്തിൽ പിന്നീട് എന്തെങ്കിലും ധാരണയോ പദ്ധതിയോ രൂപരേഖയോ 2 വിഭാഗവും തമ്മിൽ ബന്ധപ്പെട്ട് ഉണ്ടാക്കിയോ എന്നു സംസ്ഥാന സർക്കാർ ഇതുവരെ വ്യക്തമാക്കിയിട്ടില്ല.