മണ്ണിന്റെ മക്കള്‍ അവസാനം മണ്ണിന്റെ മണം തിരിച്ചറിഞ്ഞു. സാധാരണക്കാരില്‍ നിന്നും അന്യമായി കൊണ്ടിരുന്ന സിപിഎം പാര്‍ട്ടി നേതാക്കള്‍ തങ്ങളുടെ പഴയ തട്ടകത്തിലേക്ക് വീണ്ടും ഇറങ്ങി. മണ്ണില്‍ വിയര്‍പ്പൊഴുക്കുന്ന സാധാരണക്കാരോടൊപ്പം കൂടാന്‍ പാര്‍ട്ടി തീരുമാനിച്ചു. ഇതിന്റെ ഫലമായി മണ്ണില്‍ പൊന്ന് വിളയിപ്പിക്കാനുള്ള ശ്രമത്തിലാണ് സഖാക്കള്‍.
സിപിഎമ്മിന്റെ നേതൃത്വത്തില്‍ ഓണത്തിനു സംസ്ഥാനത്ത് 1,000 ജൈവപച്ചക്കറി വിപണനകേന്ദ്രങ്ങള്‍ തുറക്കുമെന്നു സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍. പാര്‍ട്ടിയുടെ നേതൃത്വത്തില്‍ ആരംഭിച്ച മഴക്കുഴി നിര്‍മാണ പദ്ധതിയായ മഴക്കൊയ്ത്തിന്റെ ഉദ്ഘാടനം കൊല്ലത്ത് നിര്‍വഹിക്കുകയായിരുന്നു കോടിയേരി.
കൊല്ലം ജില്ലയില്‍ മാത്രം രണ്ടര ലക്ഷം മഴക്കുഴികളാണു പാര്‍ട്ടി തയാറാക്കുന്നത്. വിഷുവിനു 400 ജൈവപച്ചക്കറി വിപണന കേന്ദ്രങ്ങള്‍ തുറക്കാന്‍ സിപിഎമ്മിനു സാധിച്ചു. ഇക്കാര്യത്തില്‍ എറണാകുളം ജില്ലാ കമ്മിറ്റി മികച്ച മാതൃകയാണു കാഴ്ചവച്ചത്. സാന്ത്വന ചികില്‍സാരംഗത്തും പാര്‍ട്ടി വലിയ മുന്നേറ്റം നടത്തി. റെഡ് വൊളന്റിയര്‍മാരില്‍ ആതുരസേവന രംഗത്തു താല്‍പര്യമുള്ളവരെ സാന്ത്വന ചികില്‍സാ മേഖലയില്‍ പ്രയോജനപ്പെടുത്തും.
കൂടുതല്‍ മഴ ലഭിക്കുന്നുവെങ്കിലും അതു പ്രയോജനപ്പെടുത്താന്‍ കേരളത്തിനു സാധിക്കുന്നില്ല. മഴക്കുഴി നിര്‍മാണം അതിനുള്ള വലിയ ചുവടുവയ്പാണ്. നദികളും ജലസംഭരണികളും മാലിന്യമുക്തമാക്കാന്‍ എല്ലാ രാഷ്ട്രീയ പാര്‍ട്ടികളും പങ്കാളികളായ ജനകീയ പ്രസ്ഥാനം ഉയര്‍ന്നുവരണമെന്നും കോടിയേരി അഭിപ്രായപ്പെട്ടു. ജില്ല സെക്രട്ടറി കെ.എന്‍. ബാലഗോപാല്‍ എംപി അധ്യക്ഷത വഹിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha