കേരളത്തില്‍ പുതിയ എയ്ഡഡ് കോളജുകള്‍ തല്‍ക്കാലം അനുവദിക്കേണ്ടെന്ന് സര്‍ക്കാര്‍ ഉത്തരവ്
കേരളത്തില്‍ ആര്‍ട്‌സ് ആന്‍ഡ് സയന്‍സ് കോളജുകള്‍ ഉള്‍പ്പെടെ, പുതിയ എയ്ഡഡ് കോളജുകള്‍ തല്‍ക്കാലം അനുവദിക്കേണ്ടെന്ന് സര്‍ക്കാര്‍ ഉത്തരവ്.
അതേസമയം, സാമ്പത്തികശേഷിയുള്ള സഹകരണ സ്ഥാപനങ്ങള്‍ക്കു സ്വാശ്രയ മേഖലയില്‍ കോളജുകള്‍ അനുവദിക്കും.
കോളജുകളില്‍ അധ്യാപകരുടേത് ഉള്‍പ്പെടെ പുതിയ തസ്തികകള്‍ സൃഷ്ടിക്കുന്നതിനും ഈയിടെ നിരോധനം ഏര്‍പ്പെടുത്തിയിരുന്നു. എയ്ഡഡ്, സര്‍ക്കാര്‍ മേഖലയില്‍ പുതിയ കോളജുകള്‍ ആവാമെന്ന സംസ്ഥാന ഉന്നത വിദ്യാഭ്യാസ കൗണ്‍സിലിന്റെ ശുപാര്‍ശയ്ക്കു വിരുദ്ധമാണ് ഉത്തരവ്.
സര്‍ക്കാര്‍ തലത്തിലോ സഹകരണ സ്ഥാപനങ്ങള്‍ക്കോ സ്വാശ്രയ കോളജുകള്‍ അനുവദിക്കുന്നത് പ്രദേശത്തിന്റെ വിദ്യാഭ്യാസ ആവശ്യം പരിഗണിച്ചാണ്. ഇതിന്റെ ഗുണഫലം ഏറെ ലഭിക്കുക സിപിഎം നിയന്ത്രണത്തിലുള്ള സഹകരണ സ്ഥാപനങ്ങള്‍ക്കാകുമെന്ന വിമര്‍ശനം ഉയര്‍ന്നിട്ടുണ്ട്.
എയ്ഡഡ് ഉള്‍പ്പെടെ പൊതുഫണ്ട് വിനിയോഗിച്ചു നടത്തുന്ന വിദ്യാഭ്യാസ സ്ഥാപനങ്ങളെ ശക്തിപ്പെടുത്തണമെന്നായിരുന്നു റിപ്പോര്‍ട്ടിലെ ശുപാര്‍ശയെന്നും എയ്ഡഡ് മേഖലയില്‍ കോളജുകള്‍ വേണ്ട എന്ന് ഉന്നത വിദ്യാഭ്യാസ കൗണ്‍സില്‍ പറഞ്ഞിട്ടില്ലെന്നും സ്വാശ്രയ കോളജുകള്‍ ഇനി സഹകരണ മേഖലയില്‍ മതിയെന്നും ശുപാര്‍ശയുണ്ടായിരുന്നുവെന്ന് ഉന്നത വിദ്യാഭ്യാസ കൗണ്‍സില്‍ വൈസ് ചെയര്‍മാന്‍ ഡോ. രാജന്‍ ഗുരുക്കള്‍ പറഞ്ഞു.
പുതിയ കോളജുകള്‍ തുടങ്ങേണ്ടതില്ല എന്നതു സര്‍ക്കാരിന്റെ പൊതുവായ തീരുമാനമാണ്. സഹകരണ മേഖലയില്‍ സ്വാശ്രയ കോളജുകള്‍ തുടങ്ങും. നിലവിലുള്ള എല്ലാ സ്വാശ്രയ- എയ്ഡഡ്- സര്‍ക്കാര്‍ കോളജുകളിലും പുതിയ കോഴ്‌സുകള്‍ അനുവദിക്കും. ആവശ്യപ്പെടുന്ന എല്ലാ കോളജുകള്‍ക്കും പുതിയ കോഴ്‌സ് അനുവദിക്കാനാണു തീരുമാനമെന്ന് ഉന്നത വിദ്യാഭ്യാസ മന്ത്രി കെ.ടി ജലീല്‍ പറഞ്ഞു.
https://www.facebook.com/Malayalivartha
