മുഖ്യമന്ത്രി പിണറായി വിജയനെ സോഷ്യല്‍ മീഡിയ വിളിക്കുന്നത് ജൂനിയര്‍ മാന്‍ഡ്രേക്ക് എന്നാണ് പക്ഷേ മുഖ്യമന്ത്രി ജൂനിയര്‍ മാന്‍ഡ്രേക്ക് അല്ല സിനീയര്‍ മാന്‍ഡ്രേക്കാണെന്ന് മുസ്ലിം ലീഗ് എം.എല്‍.എ കെ.എം ഷാജി. നിയമസഭയില്‍ പ്രതിപക്ഷം കൊണ്ടുവന്ന അവിശ്വാസ പ്രമേയത്തിനെ പിന്തുണച്ച് സംസാരിക്കുകയായിരുന്നു അദ്ദേഹം. എല്ലാ അന്വേഷണ സംഘവും മുഖ്യമന്ത്രിയുടെ ഓഫീസിനെ കുറിച്ച് പറയുന്നുണ്ട്. മുഖ്യമന്ത്രിയുടെ ഓഫീസ് എന്നത് മുഖ്യമന്ത്രി ഇല്ലാതെയാണോ പ്രവര്‍ത്തിക്കുന്നത്. അതുകൊണ്ടു തന്നെ മുഖ്യമന്ത്രി ഓഫീസല്ല മുഖ്യമന്ത്രി തന്നെയാണ് പ്രതിയെന്നും കെ.എം ഷാജി പറഞ്ഞു. മുഖ്യമന്ത്രി ഇപ്പോള്‍ ശ്രമിക്കുന്നത് എം. ശിവശങ്കറിന്റെ തലയില്‍ എല്ലാം കെട്ടിവച്ച് രക്ഷപ്പെടാനാണ്. എം. ശിവശങ്കറിന്റെ ഇടപാടുകളില്‍ മുഖ്യമന്ത്രിയുടെ രക്തബന്ധത്തിനും പങ്കുണ്ട്. ഇതിന് തെളിവാണ് പ്രളയത്തിന് മുമ്പുള്ള രക്തബന്ധത്തിനൊപ്പം എം. ശിവശങ്കറും മുഖ്യമന്ത്രിയും എല്ലാം ചേര്‍ന്ന് നടത്തിയ അമേരിക്കന്‍ യാത്ര. ഇതിനെ തുടര്‍ന്ന് സ്പിഗഌ കമ്പനി കേരളത്തിലെത്തിയതെന്നും അദ്ദേഹം ആരോപിച്ചു.

മുഖമന്ത്രി ചോദ്യങ്ങളോട് കാണിക്കുന്നത് അസഹിഷ്ണുതയാണ്. ചോദ്യങ്ങളോട് അസഹിഷ്ണുത കാണിക്കുന്ന മുഖ്യമന്ത്രിയും പ്രധാനമന്ത്രിയുമാണ് രാജ്യം നേരിടുന്ന ഏറ്റവും വലിയ വെല്ലുവിളി. എന്തൊരു നെറികേട് കാണിച്ചൊരു സര്‍ക്കാരാണിത്. തനിക്കെതിരെ വിമര്‍ശനം ഉയരുമ്പോള്‍ മുഖ്യമന്ത്രി വനിതാ മാധ്യമപ്രവര്‍ത്തകര്‍ക്കെതിരെ പോലും സൈബര്‍ ഗുണ്ടകള്‍ക്ക് വിട്ടു കൊടുക്കുകയാണ്. അഴിമതിയെ ന്യായികരിക്കാന്‍ സിന്ദാന്തം ചമയിക്കുന്ന നിങ്ങളുടെ പാര്‍ട്ടി നേതാക്കളോട് അണികള്‍ക്ക് കുറച്ച് മര്യാദ പഠിപ്പിക്കാന്‍ പറഞ്ഞു കൊടുക്കണം. കൊടിയിലെ അരിവാളും ചുറ്റികയും മനുഷ്യന്റെ കഴുത്തറക്കാനും തലക്കടിക്കാനുമുള്ളതല്ലെന്ന് അവരോട് പറഞ്ഞു കൊടുക്കണം. ഒരാള്‍ക്കെതിരെ വിമര്‍ശനം ഉന്നയിക്കുമ്പോള്‍ സൂക്ഷ്മത പുലര്‍ത്തണമെന്നാണ് മുഖ്യമന്ത്രി പറയുന്നത്. ആ ഒരാള്‍ താനാണെന്നാണ് മുഖ്യമന്ത്രി പറയുന്നത്. അതുകൊണ്ടു തന്നെ അദ്ദേഹത്തെ വിമര്‍ശിക്കരുതെന്നാണ് അദ്ദേഹം പറയുന്നത്. കഴിഞ്ഞ നാലുവര്‍ഷം റേഡിയോ സംരക്ഷണം കേട്ടിരുന്ന മാധ്യമപ്രവര്‍ത്തകര്‍ അവസാനം ഗതികെട്ടാണ് മുഖ്യമന്ത്രിക്കെതിരെ ചോദ്യങ്ങള്‍ ചോദിച്ചു തുടങ്ങിയതെന്നും അദ്ദേഹം പറഞ്ഞു.

മന്ത്രി കെ.ടി ജലീല്‍ ആത്മീയയുടെ മറവില്‍ നടത്തിയത് കള്ളക്കടത്ത്. മതഗ്രന്ഥത്തിന്റെ പേരില്‍ കള്ളക്കടത്ത് നടത്തിയ മന്ത്രി കെ.ടി ജലീല്‍ ഇപ്പോള്‍ പറയുന്നത് ഇപ്പോള്‍ വേണമെങ്കില്‍ ഖു ആന്‍ വിട്ടു നല്‍കാമെന്നാണ്. എന്നാലും കടത്തിയ സ്വര്‍ണം വിട്ടു നല്‍കില്ല എന്നോയെന്നും ഷാജി ചോദിച്ചു. എടപാളിലേക്ക് ഖു ആന്‍ കടത്തിയപ്പോള്‍ അതിന് അടുത്തുള്ള സി.എച്ച് പ്രസ് മറക്കണ്ട, ഇവിടെ നിന്നാണ് ലോകത്തിന്റെ വിവദ ഭാഗങ്ങളിലേക്ക് ഖു ആന്‍ കയറ്റി അയക്കുന്നതെന്ന് മന്ത്രി അറിയാമോയെന്നും കെ.എം ഷാജി ചോദിച്ചു. റെഡ് ക്രസന്റന്‍ പോലെ യു.എന്‍ അംഗീകാരമുള്ള ഒരു സംഘടനയെ സര്‍ക്കാര്‍ കേരളത്തിലേക്ക് കൊണ്ടു വന്ന് വിവാദത്തിലേക്ക് വലിച്ചിട്ട് കമ്മീഷന്‍ അടിച്ചു. ചക്കര കുടം കണ്ടാന്‍ കൈയിടും. പക്ഷേ ഈ സര്‍ക്കാര്‍ കൈയിട്ടത് പാവങ്ങള്‍ക്കുള്ള ഓണകിറ്റിലുള്ള ശര്‍ക്കരയിലാണെന്നും അദ്ദേഹം പറഞ്ഞു. മറ്റു മന്ത്രിമാര്‍ക്കൊന്നും ഒരു പ്രധാന്യവും മന്ത്രിസഭയിലില്ല. വാര്‍ത്താ സമ്മേളനത്തില്‍ മുഖ്യമന്ത്രിയുടെ ഇടവും വലവും ഇരുന്ന് ആരോഗ്യമന്ത്രിയും റവന്യു മന്ത്രിയും പ്രണായാമം നടത്തുകയാണ്. മന്ത്രി ജി. സുധാകരന് നാലുവര്‍ഷം കഴിഞ്ഞപ്പോള്‍ മന്ത്രിസഭയും അഴിമതിയുള്ള ദുര്‍ഗന്ധം സുഗന്ധമായി തോന്നുന്നതാണെന്നും കെ.എം ഷാജി പറഞ്ഞു. എന്നാല്‍ മന്ത്രി എ.സി മൊയ്തീന്‍ മാത്രം തിരക്കിലാണ് കരിപ്പൂരില്‍ വിമാന ദുരന്തം ഉണ്ടാകുന്നതിന് തലേ ദിവസമേ കരിപ്പുരില്‍ പോയി എ.സി മൊയ്തീന്‍ ദുരിതാശ്വാസ പ്രവര്‍ത്തനങ്ങള്‍ക്ക് നേതൃത്വം നല്‍കിയെന്നും അദ്ദേഹം പറഞ്ഞു.

പ്രതിപക്ഷം അവതരിപ്പിക്കുന്ന അവിശ്വാസം ആത്മവിശ്വാസം നഷ്ടപ്പെട്ട ജനതയുടെ ശബ്ദമാണ്. അതിന് ഈ സര്‍ക്കാര്‍ നിര്‍ത്തലാക്കിയ കാരുണ്യ പദ്ധതിയുടെ ഉപഭോക്താക്കളുടെയും സ്‌നേഹ ദീപം പദ്ധതിയുടെ ഗുണഭോക്താക്കളുടെയും ആശാ കീരണം പദ്ധതിയുടെ ഗുണഭോക്താക്കളുടെയും എന്തിനേറെ പറയുന്നു ഈ സര്‍ക്കാര്‍ പിന്‍വാതില്‍ നിയമനങ്ങള്‍ നല്‍കിയപ്പോള്‍ തൊഴില്‍ നഷ്ടപ്പെട്ട ആയിരക്കണക്കിന് പി.എസ്.സി റാങ്ക് ഹോള്‍ഡേഴ്‌സായ യുവാക്കളുടെ പിന്തുണയുമുണ്ട്. അവിശ്വാസം കൊണ്ടു വരുന്നത് ജനങ്ങള്‍ക്കിടയില്‍ ജീവിക്കുന്നതുകൊണ്ടാണ് അവിശ്വാസം കൊണ്ടു വരുന്നത്. ജനങ്ങളുടെ കരച്ചില്‍ മന്ത്രി മന്ദിരങ്ങളിലെ മന്ത്രിമാര്‍ അറിയുന്നില്ല. കോവിഡിന് മുമ്പ് തന്നെ ക്വാറന്റീന്‍ നടപ്പലാക്കിയ മുഖ്യമന്ത്രിയാണ് പിണറായി. ഇങ്ങനെ ക്വാറന്റീനിലാക്കിയത് വി.എസ് അച്യുതാനന്ദനെയും പാര്‍ട്ടി സെക്രട്ടറി കോടിയേരി ബാലകൃഷ്ണന്‍ എന്നിവരെയാണെന്നും കെ.എം ഷാജി ആരോപിച്ചു.

കക്കാനുള്ള സകല സാധ്യതയും പയറ്റുകയാണ് സി.പി.എം. ഇപ്പോള്‍ പാര്‍ട്ടി ക്ലാസുകളില്‍ പഠിപ്പിക്കുന്നത് എങ്ങനെ കക്കാം എന്നതിനെ കുറിച്ച്. കോവിഡിന്റെ മറവിലാണ് ഇവിടെത്തെ അഴിമതി നടക്കുന്നത്. കോവിഡ് കാരണം ജനത്തിന് പുറത്തിറങ്ങാന്‍ സാധിക്കാത് കൊള്ളക്ക് മറയാക്കുകയാണ് സര്‍ക്കാറെന്നും അദ്ദേഹം പറഞ്ഞു.