സഖാക്കളെ സുഖിപ്പിച്ചപ്പോള്‍... ഇതുവരെയില്ലായിരുന്ന സ്വപ്നയുടെ മൊഴിയെങ്ങനെ ഇപ്പോള്‍ മാത്രം പുറത്തായി; സ്വര്‍ണക്കടത്ത് അന്വേഷണ സംഘത്തിനുള്ളിലും അന്വേഷണം നടന്നപ്പോള്‍ പ്രതീക്ഷിച്ചത് തന്നെ സംഭവിച്ചു; കസ്റ്റംസ് സംഘത്തില്‍ നിന്ന് അസി.കമ്മിഷണര്‍ എന്‍.എസ്.ദേവിനെയാണ് മാറ്റി
ചോറവിടേയും കൂറിവിടേയുമെന്നതു പോലെയാണ് അന്വേഷണ സംഘത്തിലെ ചിലയാളുകള്‍ പ്രവര്‍ത്തിച്ചത്. സത്യസന്ധമായി പൊയ്‌ക്കൊണ്ടിരുന്ന സ്വര്‍ണക്കടത്ത് കേസ് അന്വേഷണത്തില്‍ കല്ല് കടി തുടങ്ങിയത് സ്വപ്ന സുരേഷിന്റെ മൊഴിയുടെ ചില ഭാഗങ്ങള്‍ മാത്രം പുറത്തായതാണ്. അനില്‍ നമ്പ്യാരെപ്പറ്റി സ്വപ്ന പറയുന്ന ഭാഗങ്ങളാണ് ചോര്‍ന്നത്. മാത്രമല്ല അതില്‍ ബിജെപിയെ പ്രതിരോധത്തിലാക്കുന്ന ഭാഗവുമുണ്ട്. ഈ ഭാഗം മാത്രം ചോരണമെങ്കില്‍ അതില്‍ എന്തോ കളിയുണ്ട്. കേന്ദ്ര സര്‍ക്കാരിനെ കരി വാരി തേയ്ക്കാനാണ് ഈ ഭാഗം മാത്രം ചോര്‍ത്തിയതെന്ന ആരോപണം ബിജെപി ഉന്നയിച്ചു. മാത്രമല്ല കേരളത്തിലെ സഖാക്കളെ സുഖിപ്പിക്കാനാണ് ഇത് പുറത്തുവിട്ടതെന്ന് അവര്‍ പരാതി നല്‍കുകയും ചെയ്തു. ഇത് സഖാക്കള്‍ ആഘോഷിച്ചതോടെ കളി മാറി.
കേന്ദ്ര ആഭ്യന്തര മന്ത്രി അമിത് ഷായോട് സംസ്ഥാന ബിജെപി നേതാക്കള്‍ പരാതിപ്പെട്ടു. തീക്കട്ടയിലും ചോനനുറുമ്പുകളോ. അതും അമിത്ഷാ നേതൃത്വം നല്‍കുമ്പോഴോ. അന്വേഷണ സംഘത്തില്‍ ചാരന്‍മാരുണ്ടെങ്കില്‍ ഉടന്‍ പൊക്കാന്‍ അമിത്ഷാ നിര്‍ദേശം നല്‍കി. അമിത് ഷായുടെ നിര്‍ദേശം ലഭിച്ച് 24 മണിക്കൂറിനുള്ളില്‍ നടപടിയും വന്നു. സഖാക്കളെ സുഖിപ്പിക്കാനായി മൊഴിപ്പകര്‍പ്പ് ചോര്‍ത്തി നല്‍കിയ കസ്റ്റംസ് ഉദ്യോഗസ്ഥനെതിരെ നടപടിയെടുത്തു കഴിഞ്ഞു.
സ്വര്‍ണക്കടത്ത് കേസില്‍ സ്വപ്ന സുരേഷ്, അനില്‍ നമ്പ്യാര്‍ക്കെതിരെ നല്‍കിയ മൊഴി പുറത്തായതിനെത്തുടര്‍ന്ന് അന്വേഷണ ഉദ്യോഗസ്ഥനെ മാറ്റി. കസ്റ്റംസ് സംഘത്തില്‍ നിന്ന് അസി.കമ്മിഷണര്‍ എന്‍.എസ്.ദേവിനെയാണ് മാറ്റിയത്.
കസ്റ്റംസ് ഇന്റലിജന്‍സ് ആഭ്യന്തര അന്വേഷണം നടത്തിയ ശേഷമാണ് ഉദ്യോഗസ്ഥനെ മാറ്റിയത്. അനില്‍ നമ്പ്യാര്‍ക്കെതിരായ മൊഴി സംസ്ഥാനത്ത് ബിജെപിയെ പ്രതിരോധത്തിലാക്കിയിരുന്നു. അനില്‍ നമ്പ്യാര്‍ക്ക് എതിരായ മൊഴി മാത്രമാണ് ചോര്‍ന്നത് എന്നാണ് ആക്ഷേപം. ഇത് വലിയ വിവാദമാവുകയും ചെയ്തു.
അനില്‍ നമ്പ്യാരുടെ പേരുപറഞ്ഞ് സ്വര്‍ണ്ണക്കടത്ത് കേസിന്റെ അന്വേഷണം വഴിതിരിച്ചു വിടാന്‍ സിപിഎമ്മും സര്‍ക്കാരും ശ്രമിക്കുന്നുവെന്ന് ബിജെപി സംസ്ഥാന അധ്യക്ഷന്‍ കെ.സുരേന്ദ്രന്‍ ആരോപിച്ചിരുന്നു. പ്രതിപക്ഷ നേതാവ് അന്വേഷണത്തെ വഴിതെറ്റിക്കാന്‍ ശ്രമിക്കുന്നുവെന്നും സുരേന്ദ്രന്‍ കുറ്റപ്പെടുത്തി.
സ്വപ്ന സുരേഷ് നല്‍കിയ മൊഴി കസ്റ്റംസില്‍ നിന്ന് ചോര്‍ന്നതിനെപ്പറ്റി വലിയ ആക്ഷേപമാണ് ഉണ്ടായത്. ദേശീയ അന്വേഷണ ഏജന്‍സി നടത്തുന്ന അന്വേഷണത്തില്‍ പോലും മറ്റൊരു അന്വേഷണം വയ്‌ക്കേണ്ടി വന്നു. ഇതോടെ കസ്റ്റംസ് ഇന്റലിജന്‍സ് വിഭാഗം അന്വേഷണം തുടങ്ങി. സ്വപ്ന സുരേഷ് സ്വന്തം കൈപ്പടയില്‍ എഴുതി നല്‍കിയ മൊഴിയില്‍ ജനം ടിവി കോ ഓര്‍ഡിനേറ്റിങ് എഡിറ്ററായിരുന്ന അനില്‍ നമ്പ്യാരെക്കുറിച്ചു പറയുന്ന ഭാഗം മാത്രമാണു ചോര്‍ന്നത്. ഇതു സമൂഹ മാധ്യമങ്ങള്‍ വഴി പ്രചരിക്കുകയും ചെയ്തു. കസ്റ്റംസ് സംഘത്തിലെ ഉന്നതര്‍ ഇതില്‍ അതൃപ്തി അറിയിച്ചിട്ടുണ്ട്.
ആരുടെ കയ്യില്‍ നിന്നാണു മൊഴി ചോര്‍ന്നതെന്നും ഈ ഭാഗം മാത്രം തിരഞ്ഞെടുത്തു ചോര്‍ത്തിയതില്‍ ദുരൂഹതയുണ്ടെന്നുമാണു വിലയിരുത്തല്‍. കസ്റ്റംസ് ആസ്ഥാനത്ത് നിന്ന് ഇതില്‍ ആശങ്ക അന്വേഷണ സംഘത്തെ അറിയിച്ചു. മറ്റ് അന്വേഷണ ഏജന്‍സികളും അതൃപ്തി അറിയിച്ചിട്ടുണ്ട്.
അനില്‍ നമ്പ്യാരെ ചോദ്യം ചെയ്യാന്‍ കസ്റ്റംസ് വിളിച്ചതിന് ഒരു ദിവസം മുന്‍പു തന്നെ സ്വപ്നയുടെ മൊഴി പ്രചരിച്ചു. സ്വപ്നയെ എന്‍ഐഎ അറസ്റ്റ് ചെയ്തശേഷം കസ്റ്റംസ് കസ്റ്റഡിയില്‍ വാങ്ങിയപ്പോള്‍ നല്‍കിയ മൊഴിയാണു ചോര്‍ന്നത്. ഇതോടെയാണ് പരാതി ഉണ്ടായതും 24 മണിക്കൂറിനുള്ളില്‍ നടപടിയുണ്ടായതും. ഇത് മറ്റുള്ള അന്വേഷണ ഉദ്യോഗസ്ഥര്‍ക്കും ഒരു പാഠമാണ്. കളിയിറക്കിയാല്‍ കളി പഠിപ്പിക്കും.
https://www.facebook.com/Malayalivartha
