കാസര്‍ഗോഡെ പെരിയ ഇരട്ട കൊലപാതകത്തിന് ശേഷം മറ്റൊരു ഇരട്ട കൊലപാതകമാണ് ചര്‍ച്ചയാകുന്നത്. പെരിയ ഇരട്ട കൊലപാതകത്തില്‍ കൊല്ലപ്പെട്ടത് യൂത്ത് കോണ്‍ഗ്രസ് പ്രവര്‍ത്തകരാണെങ്കില്‍ ഇവിടെ തലസ്ഥാനത്ത് വെഞ്ഞാറമൂട്ടില്‍ കൊല്ലപ്പെട്ടത് രണ്ട് ഡിവൈഎഫ്‌ഐ പ്രവര്‍ത്തകരാണ്. അന്ന് കോണ്‍ഗ്രസുകാര്‍ രാഷ്ട്രീയമായി ഏറെ ആഘോഷിച്ചതാണ് പെരിയ കൊലപാതകം. സിപിഎമ്മിനെ ഏറെ പ്രതിരോധത്തിലാക്കുന്നതായിരുന്നു പെരിയ കൊലപാതകം. ലോക്‌സഭാ തെരഞ്ഞെടുപ്പില്‍ ഇത് ഏറെ പ്രതിഫലിച്ചതുമാണ്. കേരളം മറ്റൊരു തെരഞ്ഞെടുപ്പിലേക്ക് പോകുമ്പോള്‍ ഇപ്പോള്‍ കാര്യങ്ങള്‍ കറങ്ങി തിരിയുകയാണ്. മരിച്ചതാകട്ടെ സിപിഎം പാര്‍ട്ടിക്കാരും ആരോപണ വിധേയര്‍ കോണ്‍ഗ്രസുകാരുമാണ്. അതിനാല്‍ തന്നെ പെരിയയില്‍ പ്രതിരോധിച്ചത് വെഞ്ഞാടമൂട്ടില്‍ സിപിഎം ആഞ്ഞടിക്കുക തന്നെ ചെയ്യും.

അതേസമയം വെഞ്ഞാറമൂടില്‍ ഡിവൈഎഫ്‌ഐ പ്രവര്‍ത്തകരെ കൊലപ്പെടുത്തിയവരെന്ന് സംശയിക്കുന്ന മൂന്ന് പേര്‍ പൊലീസ് കസ്റ്റഡിയിലായിട്ടുണ്ട്. ഇവരെ ചോദ്യം ചെയ്തു വരികയാണെന്ന് റൂറല്‍ എസ്.പി ബി.അശോകന്‍ പറഞ്ഞു. പ്രതികള്‍ സഞ്ചരിച്ചിരുന്ന ഇരുചക്ര വാഹനങ്ങളില്‍ ഒന്ന് തേമ്പാംമൂട് നിന്ന് പൊലീസ് കണ്ടെടുത്തു. സംഭവത്തില്‍ കൂടുതല്‍ ഉള്‍പ്പെട്ടിട്ടുണ്ടെന്നാണ് വിവരം. മറ്റു പ്രതികള്‍ക്കായുള്ള തിരച്ചില്‍ ശക്തമാക്കിയതായി റൂറല്‍ എസ്.പി ബി.അശോകന്‍ പറഞ്ഞു.

വളരെ ആസൂത്രിതമായി നടത്തിയ കൊലപാതകമാണെന്ന് വ്യക്തമാക്കുന്ന സൂചനകളാണ് വെഞ്ഞാറമൂട് ഇരട്ടക്കൊലപാതകത്തില്‍ പുറത്തുവരുന്നതെന്ന് പൊലീസ് പറയുന്നു. രണ്ടു ഡിവൈഎഫ്‌ഐ നേതാക്കളെ ക്രൂരമായി വെട്ടിക്കൊലപ്പെടുത്തിയ സ്ഥലത്തെ സിസിടിവി ക്യാമറകള്‍ തിരിച്ചുവച്ചിരിക്കുന്നതായി വ്യക്തമായി. കൊലപാതകം നടന്ന സ്ഥലത്തിന് സമീപത്തെ കെട്ടിടത്തിലെ ക്യാമറയാണ് ഇത്തരത്തില്‍ ദിശമാറ്റിയതായി കണ്ടെത്തിയത്.

ബൈക്കില്‍ സഞ്ചരിക്കുകയായിരുന്ന രണ്ട് ഡിവൈഎഫ്‌ഐ നേതാക്കളെയാണ് തടഞ്ഞു നിര്‍ത്തി വെട്ടിക്കൊന്നത്. വെഞ്ഞാറമൂട് തേമ്പാന്‍മൂട് ജംക്ഷനില്‍ രാത്രി 12 ഓടെയാണ് സംഭവം. ഡിവൈഎഫ്‌ഐ ഇന്ന് കരിദിനം ആചരിക്കും. വെമ്പായം തേവലക്കാട് ഒഴിവുപാറ മിഥിലാജ് (32), തേമ്പാന്‍മൂട് കലുങ്കിന്‍മുഖം സ്വദേശി ഹക്ക് മുഹമ്മദ് (28) എന്നിവരാണ് കൊല്ലപ്പെട്ടത്. ഇവരുടെ ഒപ്പമുണ്ടായിരുന്ന ഷഹിന്‍ നിസ്സാര പരുക്കുകളോടെ രക്ഷപ്പെട്ടു.

ലോക്‌സഭാ തിരഞ്ഞെടുപ്പുമായി ബന്ധപ്പെട്ട് തുടങ്ങിയ തര്‍ക്കമാണ് കൊലപാതകത്തില്‍ കലാശിച്ചതെന്ന് പൊലീസ് നല്‍കുന്ന സൂചന. മിഥിലാജിന്റെ നെഞ്ചിലാണ് അക്രമികള്‍ കുത്തിയത്. ഹക്ക് മുഹമ്മദിനെ ഒന്നിലേറെ തവണ വെട്ടിയാണ് കൊലപ്പെടുത്തിയത്. അഞ്ചുപേരടങ്ങുന്ന സംഘമാണ് കൊലയ്ക്ക് പിന്നിലെന്ന് പ്രാഥമിക നിഗമനം. കൊലപാതകത്തിന് പിന്നില്‍ യൂത്ത് കോണ്‍ഗ്രസ് പ്രവര്‍ത്തകരാണെന്ന് ആരോപിച്ച് ഡിവൈഎഫ്‌ഐ രംഗത്തെത്തി.

മിഥിലാജും ഹക്കും വെട്ടേറ്റ് നിലത്തു വീണു. ഷഹിന്‍ ഓടി രക്ഷപ്പെടുകയായിരുന്നു. ഗുരുതരമായി വെട്ടേറ്റ മിഥിലാജ് സംഭവ സ്ഥലത്തുവച്ചു തന്നെ മരിച്ചു. പരുക്കേറ്റ ഹക്കിനെ തിരുവനന്തപുരം മെഡിക്കല്‍ കോളജ് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. ഇരുവരുടെയും മൃതദേഹം മെഡിക്കല്‍ കോളജ് ആശുപത്രി മോര്‍ച്ചറിയില്‍.

പെരിയയ്ക്ക് ശേഷമാണ് വെഞ്ഞാറമൂട് കൊലപാതകം ചര്‍ച്ചയാകുന്നത്. രണ്ടിടത്തും കൊല്ലപ്പെട്ടതാകട്ടെ ചെറുപ്പക്കാരാണ്. ഒരിക്കലും കൊലപാതകങ്ങള്‍ അംഗീകരിക്കാന്‍ പാടില്ല. അവരുടെ കുടുംബത്തിന്റെ വേദനയും കണ്ണീരും പല വട്ടം കണ്ടതാണ്. കുറച്ച് നാള്‍ ഇത് ചര്‍ച്ച ചെയ്യുമെന്നല്ലാതെ വീണ്ടും നടക്കുന്ന ഇത്തരം കൊലപാതക രാഷ്ട്രീയം ഒരിക്കലും അംഗീകരിക്കാന്‍ കഴിയില്ല.