സ്വര്‍ണക്കടത്ത് കേസ് അന്വേഷിക്കുന്ന ഏജന്‍സികള്‍ തിരുവനന്തപുരത്തെ യുഎഇ കോണ്‍സുലേറ്റിന്റെ വീസ സ്റ്റാംപിങ് സെന്ററുകളുടെ കരാറും നടത്തിപ്പും പരിശോധിക്കുന്നു. യുഎഎഫ്എക്‌സ് സൊലൂഷന്‍സ്, ഫോര്‍ത്ത് ഫോഴ്‌സ് എന്നീ ഏജന്‍സികള്‍ക്കു കരാര്‍ ലഭിച്ചതിനു പിന്നിലെ സ്വപ്ന സുരേഷിന്റെ ഇടപെടലാണ് എന്‍ഫോഴ്‌സമെന്റ് ഡയറക്ടറേറ്റും (ഇഡി) ദേശീയ അന്വേഷണ ഏജന്‍സിയും (എന്‍ഐഎ) പരിശോധിക്കുന്നത്. കേരളത്തിലെ 2 മുന്‍നിര ധനകാര്യ സ്ഥാപനങ്ങള്‍ താല്‍പര്യം അറിയിച്ചിട്ടും അവരെ ഒഴിവാക്കിയിട്ടാണ് പ്രസ്തുത ഏജന്‍സികള്‍ക്ക് കരാര്‍ ലഭിച്ചത്.

കേരളത്തിലെ സ്വകാര്യ ധനകാര്യ സ്ഥാപനങ്ങള്‍ക്ക് വീസ സ്റ്റാംപിങ് സെന്ററിന്റെ കരാര്‍ കിട്ടാതെ പോയത്, ബെംഗളൂരു ലഹരിമരുന്നു കേസില്‍ നാര്‍കോട്ടിക്‌സ് കണ്‍ട്രോള്‍ ബ്യൂറോ (എന്‍സിബി) അറസ്റ്റ് ചെയ്ത കൊച്ചി വെണ്ണല സ്വദേശി മുഹമ്മദ് അനൂപിന്റെ ബിസിനസ് പങ്കാളിയുടെ സ്വാധീനം കാരണമാണെന്നാണ് നിഗമനം.

അനൂപിന്റെ ബിസിനസ് പങ്കാളിയും സ്വപ്ന സുരേഷും തമ്മിലുള്ള ബന്ധത്തിനു കൃത്യമായ തെളിവു ലഭിച്ചാല്‍ സ്വര്‍ണക്കടത്തു കേസില്‍ അതു ഗുരുതര രാഷ്ട്രീയ മാനങ്ങളുള്ള വഴിത്തിരിവുണ്ടാക്കും. ബെംഗളൂരു കമ്മനഹള്ളിയില്‍ അനൂപ് ആരംഭിച്ച റസ്റ്ററന്റിന്റെ മുതല്‍ മുടക്കും ഇതേ ബിസിനസ് പങ്കാളിയുടെതാണ്. തിരുവനന്തപുരത്തെ വീസ സ്റ്റാംപിങ് സെന്ററിലും ഇദ്ദേഹത്തിനു മുതല്‍ മുടക്കുണ്ടെന്നാണ് അന്വേഷണ സംഘങ്ങള്‍ക്കു ലഭിക്കുന്ന വിവരം.

കേരളം ഉള്‍പ്പെടെയുള്ള 5 ദക്ഷിണേന്ത്യന്‍ സംസ്ഥാനങ്ങളില്‍ നിന്നു യുഎഇയിലേക്കു പോകുന്നവരുടെ വീസ സ്റ്റാംപിങ് അടക്കമുള്ള സേവനങ്ങള്‍ക്കു 15,000 -20,000 രൂപവരെയാണ് ഈടാക്കുന്നത്. ഇതിനു പുറമേ വിദേശത്തു നിന്നു നാട്ടിലേക്കു മടങ്ങുന്നവരുടെ തൊഴില്‍ദാതാക്കളുമായുള്ള സാമ്പത്തിക തര്‍ക്കങ്ങള്‍ തീര്‍പ്പാക്കുന്നതിലും ഇവരുടെ നിക്ഷേപം സുരക്ഷിതമായി നാട്ടിലെത്തിക്കുന്നതിലും ഇത്തരം സെന്ററുകള്‍ ഇടനിലക്കാരായി കമ്മിഷന്‍ വാങ്ങാറുണ്ട്.

എന്‍ഐഎ കണ്ടെത്തിയ ബാങ്ക് നിക്ഷേപങ്ങളിലെ പണമൊന്നും സ്വകാര്യ ആവശ്യങ്ങള്‍ക്കു സ്വപ്ന പ്രയോജനപ്പെടുത്താതെ സൂക്ഷിച്ചതില്‍ നിന്നും അതിന്റെ യഥാര്‍ഥ അവകാശികള്‍ മറ്റാരോ ആണെന്ന നിഗമനത്തിലാണ് അന്വേഷണ സംഘങ്ങള്‍. ഈ പണത്തില്‍ യുഎഎഫ്എക്‌സും ഫോര്‍ത്ത് ഫോഴ്‌സും നല്‍കുന്ന കമ്മിഷനുമുണ്ടെന്നാണു സ്വപ്നയുടെ മൊഴി.