ചൈനയ്ക്ക് അര്‍ഹിക്കുന്ന രീതിയില്‍ തിരിച്ചടി നല്‍കണമെന്ന് രാഷ്ട്രീയ ഭേദമന്യേ ഓരോ ഭാരതീയനും പറഞ്ഞ കാര്യമാണ്. ലഡാക്കില്‍ ഇന്ത്യയോട് ചൈന കാട്ടിയ അനീതി അത്രയ്ക്ക് നീചമായിരുന്നു. നമ്മുടെ 20 സൈനികരാണ് അന്ന് വീരമൃത്യു വരിച്ചത്. ഇവരുടെ വീരമൃത്യു വെറുതേയാവില്ലെന്ന് അന്നേ പ്രധാനമന്ത്രി നരേന്ദ്ര മോദി വ്യക്തമാക്കിയതാണ്. അതിന് പിന്നാലെയാണ് പാംഗോങ് തടാക തീരത്ത് ഇന്ത്യന്‍ സേനയുടെ കുതിപ്പ്.

ഇന്ത്യയുടെ നീക്കങ്ങള്‍ ഓരോ നിമിഷവും ഒപ്പിയെടുക്കാന്‍ ചൈനീസ് സേന സ്ഥാപിച്ചിരുന്ന ക്യാമറകളും പര്യവേഷണത്തിനുള്ള ഉപകരണങ്ങളും അത്യാധുനിക സംവിധാനങ്ങളെയെല്ലാം നിഷ്പ്രഭമാക്കിയാണ് പാംഗോങ് തടാകത്തിന്റെ തെക്കന്‍ തീരത്ത് ഇന്ത്യന്‍ സൈന്യം മുന്നേറിയത്. ചൈനയുടെ പീപ്പിള്‍സ് ലിബറേഷന്‍ ആര്‍മി എത്തുന്നതിന് മുന്‍പ് തികച്ചും തന്ത്രപരമായ നീക്കത്തിലൂടെയാണ് ഇന്ത്യന്‍ സേന ഇവിടെ ആധിപത്യം ഉറപ്പിച്ചത്.

ഇതിന് പിന്നാലെ സൈന്യത്തിന് കരുത്തേകി ദേശീയ സുരക്ഷാ ഉപദേഷ്ടാവ് അജിത് ഡോവലിന്റെ നേതൃത്വത്തില്‍ തിങ്കളാഴ്ച ഉന്നതതല യോഗവും ചേര്‍ന്ന് സൈന്യത്തിന് എല്ലാ പിന്തുണയും നല്‍കി. ലഡാക്കില്‍ ചൈനയുമായി ഏറെ നീണ്ടു നില്‍ക്കുന്ന സംഘര്‍ഷത്തിന് ഇന്ത്യ സജ്ജമാണെന്നും ഏതു വിധേനയും ചൈനീസ് കടന്നുകയറ്റം തടയാന്‍ മേഖലയില്‍ സൈനിക വിന്യാസം വര്‍ധിപ്പിക്കുമെന്നും കേന്ദ്രസര്‍ക്കാര്‍ വൃത്തങ്ങള്‍ വ്യക്തമാക്കി. ദേശീയ സുരക്ഷാ ഉപദേഷ്ടാവ് അജിത് ഡോവലിന്റെ നേതൃത്വത്തില്‍ തിങ്കളാഴ്ച ചേര്‍ന്ന ഉന്നതതല യോഗത്തിലാണ് ഒട്ടും വിട്ടുവീഴ്ച വേണ്ടെന്ന തീരുമാനമാണ് യോഗത്തില്‍ ഉണ്ടായത്. ശനിയാഴ്ച ചൈനീസ് സൈന്യം പാംഗോങ് തടാകത്തിനു സമീപം നടത്തിയ കടന്നുകയറ്റ ശ്രമം ഇന്ത്യന്‍ സേന തടഞ്ഞതിന്റെ പശ്ചാത്തലത്തിലാണ് യോഗം ചേര്‍ന്നത്. തടാകത്തിന്റെ തെക്കു ഭാഗത്താണ് ചൈനയുടെ കടന്നുകയറ്റ ശ്രമം ഉണ്ടായത്.

വിവിധ രഹസ്യാന്വേഷണ ഏജന്‍സികളും മുതിര്‍ന്ന സൈനിക ഓഫിസര്‍മാരും സ്ഥിതിഗതികള്‍ ഡോവലിനോടു വിശദീകരിച്ചു. വരും മാസങ്ങളില്‍ ചൈനയുടെ ഭാഗത്തുനിന്ന് എന്തൊക്കെ നീക്കങ്ങള്‍ക്കു സാധ്യതയുണ്ടെന്ന് ഇന്റലിജന്‍സ് ബ്യൂറോ ഡയറക്ടര്‍ അരവിന്ദ് കുമാര്‍, റോ സെക്രട്ടറി സാമന്ത് ഗോയല്‍ എന്നിവര്‍ വിലയിരുത്തി. ആഭ്യന്തര സെക്രട്ടറി അജയ് ഭല്ലയും യോഗത്തില്‍ പങ്കെടുത്തു.

ഇന്ത്യന്‍ മേഖലയിലേക്കു കടന്നുകയറാനുള്ള ചൈനീസ് നീക്കം ഫലപ്രദമായി തടയാന്‍ കഴിഞ്ഞു. എന്നാല്‍ വരും ദിവസങ്ങളിലെ നീക്കങ്ങളാണ് യോഗത്തില്‍ ചര്‍ച്ച ചെയ്തതെന്ന് അധികൃതര്‍ വ്യക്തമാക്കി. യഥാര്‍ഥ നിയന്ത്രണ രേഖയില്‍ കൂടുതല്‍ സൈനികരെ വിന്യസിക്കും. ചൈനയും ഇതേ സമീപനം സ്വീകരിക്കാന്‍ സാധ്യതയുള്ളതിനാല്‍ കരുതിയിരിക്കണമെന്നു നിര്‍ദേശം നല്‍കിയിട്ടുണ്ട്.

തന്ത്രപ്രധാനമായ പല മേഖലകളിലും ചൈന നിലയുറപ്പിച്ചിട്ടുണ്ട്. ചുഷുല്‍ ടൗണ്‍, പാംഗോങ് സോ, സ്പങ്കര്‍ സോ എന്നിവിടങ്ങള്‍ നിരീക്ഷിക്കാന്‍ കഴിയുന്ന രണ്ട് മലനിരകളില്‍ ചൈനീസ് സൈന്യത്തിനുണ്ട്. ഈ സാഹചര്യത്തില്‍ നിയന്ത്രണ രേഖയില്‍ മാറ്റം വരുത്താനുള്ള ചൈന നടത്തുന്ന ഏതു നീക്കവും എന്തുവില കൊടുത്തും തടയാനാണ് സൈന്യത്തിന് അനുമതി നല്‍കിയിരിക്കുന്നത്.

വളരെ രഹസ്യമായി സ്ഥിതി ചെയ്യുന്ന ചൈനീസ് സേനയുടെ എല്ലാ നിരീക്ഷണ സംവിധാനങ്ങളെയും തകര്‍ത്ത് ഇന്ത്യ പിടിമുറുക്കിയത് ചൈനയെ പ്രകോപിപ്പിച്ചിട്ടുണ്ട്. ഇന്ത്യയുടെ പ്രവര്‍ത്തനങ്ങള്‍ നിരീക്ഷിക്കുന്നതിന് യഥാര്‍ഥ നിയന്ത്രണ രേഖയോടു ചേര്‍ന്ന് ചൈനീസ് സൈന്യം എല്ലാ ആധുനിക സംവിധാനങ്ങളും ഒരുക്കിയിരുന്നു. ഇതെല്ലാം നിഷ്പ്രഭമായതോടെ ചൈനീസ് ക്യാമ്പില്‍ പരാജയത്തിന്റെ അങ്കലാപ്പ് ഉയരുന്നുണ്ട്. ഒരു തരത്തിലും വിട്ടുവീഴ്ച വേണ്ടെന്ന ഇന്ത്യയുടെ രാഷ്ട്രീയ തീരുമാനം കൂടിയായപ്പോള്‍ സൈന്യത്തിന് ഇരട്ടി ബലമാണ് കിട്ടിയിരിക്കുന്നത്.