ഇനി വച്ചടി വച്ചടി കയറ്റം... നഷ്ടത്തില് നിന്നും നഷ്ടത്തിലേക്ക് കൂപ്പ് കുത്തിയ കെഎസ്ആര്ടിസിയെ യൂണിയന്കാരില് നിന്നും രക്ഷിച്ച ടോമിന് തച്ചങ്കരിയ്ക്ക് പുതിയ നിയോഗം; ഡിജിപിയായി സ്ഥാനക്കയറ്റം കിട്ടിയ ടോമിന് തച്ചങ്കരിയെ കാത്തിരിക്കുന്നത് സംസ്ഥാന പൊലീസ് മേധാവി പദവി
ചങ്കൂറ്റമുള്ളവരെ കേരളം എല്ലാ കാലവും അംഗീകരിച്ചിട്ടുണ്ട്. അതും കേരളത്തിലെ തുക്കടാ രാഷ്ട്രീയം കളിച്ച് വികസന വിരോധികളായ യൂണിയന് നേതാക്കളോട് പട പൊരുതുന്നവരെ. അത്തരത്തില് യൂണിയന്കാരോട് പടപൊരുതിയയാളാണ് ടോമിന് ജെ തച്ചങ്കരി. നഷ്ടത്തില് നിന്നും നഷ്ടത്തിലേക്ക് കൂപ്പ് കുത്തിയ കെഎസ്ആര്ടിസിയെ രക്ഷിക്കാനായാണ് ടോമിന് തച്ചങ്കരി എംഡി സ്ഥാനം ഏറ്റെടുത്തത്. പണിയെടുക്കാതെ സ്റ്റേഷനുകള് തോറും കേന്ദ്രീകരിച്ചിരുന്ന യൂണിയന്കാരെ എല്ലാവരേയും പണിക്ക് പറഞ്ഞ് വിട്ടതോടെ തച്ചങ്കരി അവരുടെ കണ്ണിലെ കരടായി. മുഖ്യമന്ത്രിയുടെ അടുത്ത് പോലും പരാതിയുമായി ചെന്നിട്ടും ആരും മൈന്ഡ് ചെയ്തില്ല. മാത്രമല്ല യൂണിയന്കാരുടെ വിരട്ടലും ഫലം കണ്ടില്ല. താന് ഉയര്ന്ന റാങ്കിലുള്ള പോലീസ് ഉദ്യോഗസ്ഥനാണെന്നും കളി ഇങ്ങോട്ട് വേണ്ടെന്നും തച്ചങ്കരി പറഞ്ഞത് ജനം കൈയ്യടിയോടെയാണ് കേട്ടത്. ആദ്യമായി കെഎസ്ആര്ടിസിയെ ലാഭത്തിലാക്കി സ്വന്തം അക്കൗണ്ടില് നിന്നും പണം എടുത്ത് ശമ്പളവും നല്കി. എന്നാല് തച്ചങ്കരിയെ മാറ്റാനായി യൂണിയന്കാര് ഒത്തുകൂടിയതോടെ അതില് വീഴുകയായിരുന്നു. അങ്ങനെ ധീരനായി മാറിയ തച്ചങ്കരിക്ക് മറ്റൊരു നിയോഗം കൂടി വന്നെത്തിയിരിക്കുകയാണ്.
ടോമിന് ജെ തച്ചങ്കരിക്ക് ഡിജിപി ആയി സ്ഥാനക്കയറ്റം നല്കി സര്ക്കാര് ഉത്തരവിറക്കിയിരിക്കുകയാണ്. എന്നാല് ഏതെങ്കിലും തസ്തികയിലേക്ക് അദ്ദേഹത്തെ നിയമിച്ചിട്ടില്ല. പൊലീസിന് പുറത്തുള്ള പ്രധാനപ്പെട്ട ഒരു പദവി നല്കി അദ്ദേഹത്തെ വൈകാതെ തന്നെ നിയമിക്കുമെന്നാണ് സൂചന. നിലവില് ക്രൈം ബ്രാഞ്ച് മേധാവിയാണ് ടോമിന് ജെ തച്ചങ്കരി. റോഡ് സുരക്ഷാ കമ്മിഷണര് ശങ്കര് റെഡ്ഢി ഈ മാസം 31ന് വിരമിക്കുന്ന ഒഴിവിലേക്ക് തച്ചങ്കരിയെ പരിഗണിക്കുമെന്നും റിപ്പോര്ട്ടുകളുണ്ട്.
അടുത്ത വര്ഷം ജൂണില് സംസ്ഥാന പൊലീസ് മേധാവി പദവിയില് നിന്നും ലോക്നാഥ് ബെഹ്റ വിരമിക്കുമ്പോള് സംസ്ഥാനത്തെ ഏറ്റവും മുതിര്ന്ന ഐപിഎസ് ഉദ്യോഗസ്ഥനായിരിക്കും ടോമിന് ജെ തച്ചങ്കരി. നേരത്തെ ലോക്നാഥ് ബെഹ്റ ഡെപ്യൂട്ടേഷനില് കേന്ദ്ര സര്വീസിലേക്ക് മടങ്ങുമെന്ന അഭ്യൂവഹങ്ങള്ക്കിടയില് ഡിജിപി സ്ഥാനത്തേക്ക് ഏറ്റവും കൂടുതല് സാധ്യത തച്ചങ്കരിക്കായിരുന്നു.
കോഴിക്കോട്, ആലപ്പുഴ, ഇടുക്കി, എറണാകുളം, പാലക്കാട്, കണ്ണൂര് ജില്ലകളുടെ പൊലീസ് മേധാവി ആയി പ്രവര്ത്തിച്ചിട്ടുള്ള അദ്ദേഹം കണ്ണൂര് റേഞ്ച് ഐജി, പൊലീസ് ഹെഡ് ക്വാര്ട്ടേഴ്സ് എഡിജിപി, ട്രാന്സ്പോര്ട് കമ്മിഷണര്, അഗ്നിശമനസേനാ മേധാവി എന്നി നിലകളിലും പ്രവര്ത്തിച്ചിട്ടുണ്ട്. നിരവധി പൊതുമേഖല സ്ഥാപനങ്ങളുടെ തലവനായും തച്ചങ്കരി സേവനം അനുഷ്ഠിച്ചിട്ടുണ്ട്.
അതേസമയം ടോമിന് ജെ. തച്ചങ്കരിക്കെതിരായ അനധികൃത സ്വത്ത് സമ്പാദന കേസ് കോട്ടയം വിജിലന്സ് കോടതിയില് ഇപ്പോഴും നിലനില്ക്കുന്നുണ്ട്. തച്ചങ്കരി ഔദ്യോഗിക പദവി ദുരുപയോഗം ചെയ്ത് പണം സമ്പാദിച്ചെന്നാണ് വിജിലന്സ് റിപ്പോര്ട്ട്. തച്ചങ്കരിക്കെതിരെ തൃശൂര് സ്വദേശി പി.ഡി. ജോസഫ് നല്കിയ പരാതിയാണ് വിജിലന്സ് അന്വേഷിച്ചത്. പക്ഷെ തെളിയിക്കാനാവാത്തതിനാല് അതൊന്നും ഒരു തടസമേയല്ല.
ഒരു കലാകാരന് കൂടിയാണ് ടോമിന് തച്ചങ്കരി. നിരവധി സംഗീത ആല്ബങ്ങള്ക്ക് അദ്ദേഹം സംഗീതം നല്കിയിട്ടുണ്ട്. കെഎസ്ആര്ടിസി എംഡി ആയിരുന്ന സമയത്ത് കണ്ടക്ടര് വേഷത്തിലെത്തിയ തച്ചങ്കരിയെ ഏറെ കൈയ്യടിയോടെയാണ് കേരളം സ്വീകരിച്ചത്. പരേതയായ അനിത തച്ചങ്കരി ആണ് ഭാര്യ. ഇലക്രോണിക്സ് രംഗത്തുള്ള മേഘയും കാവ്യയും ആണ് മക്കള്.
അടുത്ത വര്ഷം ജൂണില് സംസ്ഥാന പൊലീസ് മേധാവി പദവിയില് നിന്നും ലോക്നാഥ് ബെഹ്റ വിരമിക്കുമ്പോള് ആ സമയത്തെ സംസ്ഥാനത്തെ ഏറ്റവും മുതിര്ന്ന ഐപിഎസ് ഉദ്യോഗസ്ഥനെന്ന നിലയില് തച്ചങ്കരി പോലീസ് ചീഫ് ആയാലും അതിശയിക്കാനില്ല. തച്ചങ്കരി കെഎസ്ആര്ടിസിയിലും ക്രൈംബ്രാഞ്ചിലും നടത്തിയ പ്രവര്ത്തനങ്ങള് രാഷ്ട്രീയകക്ഷി ഭേദമന്യേ അതീവ ജനശ്രദ്ധ നേടിയിരുന്നു. 3 വര്ഷത്തെ സേവനകാലാവധി തച്ചങ്കരിക്ക് ഇനിയും അവശേഷിക്കുന്നുണ്ട്. അതിനാല് തന്നെ എല്ലാ അധികാരത്തോടും കൂടിയ ഡിജിപിയായി ടോമിന് തച്ചങ്കരി വന്നാലും അതിശയിക്കാനില്ല.
https://www.facebook.com/Malayalivartha
