തദ്ദേശ സ്ഥാപനങ്ങളുടെ സേവനങ്ങള്ക്ക് ഇനി ഇന്ഫര്മേഷന് കേരള മിഷന് വികസിപ്പിച്ചെടുത്ത ഇന്റഗ്രേറ്റഡ് ലോക്കല് ഗവേണന്സ് മാനേജ്മെന്റ് സിസ്റ്റം
മലപ്പുറം ജില്ലയിലെ പഞ്ചായത്തുകളും, തദ്ദേശസ്ഥാപനങ്ങളില് സേവനങ്ങള് നല്കുന്നതില് കൂടുതല് സുതാര്യത ഉറപ്പാക്കാന് ഇന്ഫര്മേഷന് കേരള മിഷന് (ഐകെഎം) വികസിപ്പിച്ചെടുത്ത ഇന്റഗ്രേറ്റഡ് ലോക്കല് ഗവേണന്സ് മാനേജ്മെന്റ് സിസ്റ്റ(ഐഎല്ജിഎംഎസ്)-ത്തിലേക്ക് മാറും. ആദ്യഘട്ടത്തില് ജില്ലയിലെ 11 പഞ്ചായത്തുകളാണ് ഐഎല്ജിഎംഎസ് സോഫ്റ്റ്വെയറിലേക്കു മാറുന്നത്.
പുതിയ സംവിധാനം നടപ്പാക്കുന്നത് മമ്പാട്, നന്നമ്പ്ര, എആര് നഗര്, ചെറിയമുണ്ടം, കീഴുപറമ്പ്, കുറുവ, നന്നംമുക്ക്, പോരൂര്, മൂത്തേടം, തലക്കാട്, മക്കരപ്പറമ്പ് പഞ്ചായത്തുകളിലാണ്്. ഈ പഞ്ചായത്തുകളിലെ ജീവനക്കാര്ക്ക് കിലയുടെ നേതൃത്വത്തില് ഓണ്ലൈന് പരിശീലനം നല്കിയിരുന്നു. കൂടുതല് പഞ്ചായത്തുകളെ ഉള്പ്പെടുത്തുന്നതിന്റെ ഭാഗമായി റജിസ്ട്രേഷന് അടക്കം ഓണ്ലൈന് മാപ്പിങ് നടത്താന് തദ്ദേശ വകുപ്പ് ആവശ്യപ്പെട്ടു.
9 പഞ്ചായത്തുകളില് ഐഎല്ജിഎംഎസ് സംവിധാനത്തിന് തുടക്കമായി. മക്കരപ്പറമ്പിലും തലക്കാട്ടും നാളെ ഔദ്യോഗികമായി തുടക്കം കുറിക്കും. കോവിഡ് പശ്ചാത്തലത്തില് കൂടുതല് പഞ്ചായത്തുകളില് സംവിധാനം നടപ്പാക്കാനാണ് തദ്ദേശവകുപ്പിന്റെ നിര്ദേശം.
നിലവില് സേവന സോഫ്റ്റ്വെയറിലൂടെ ജനന/മരണ/വിവാഹ റജിസ്ട്രേഷനുകളില് വിവാഹ റജിസ്ട്രേഷനുള്ള അപേക്ഷയും പേര് ചേര്ക്കലിനുള്ള അപേക്ഷയും മാത്രമാണ് ഇ ഫയലിങ് വഴി സാധ്യമാകുന്നത്. അവ ഇ-ഫയല് ചെയ്താലും രേഖകള് നേരിട്ട് ഹാജരാക്കണം. ഇനി പൊതുജനങ്ങള്ക്കു തദ്ദേശസ്ഥാപനങ്ങളില് പോകാതെ ഐഎല്ജിഎംഎസ് വഴി സേവനം ലഭ്യമാകും.
എന്നാല് പുതിയ സോഫ്റ്റ്വെയര് വരുന്നതോടെ ജനന/മരണ/വിവാഹ റജിസ്ട്രേഷന്, പേര് ചേര്ക്കല്, തിരുത്തല് തുടങ്ങിയ ഒരു സേവനങ്ങള്ക്കും പൊതുജനത്തിന് തദ്ദേശസ്ഥാപനങ്ങളില് പോകേണ്ട. അപേക്ഷയ്ക്കൊപ്പം ഫീസുകള് അടയ്ക്കാനുള്ള സൗകര്യവും ഓണ്ലൈനില് ലഭ്യമാകും. ഉപയോക്താവിന് ഇ-മെയിലായി വിവരങ്ങള് ലഭ്യമാക്കും. കോവിഡ് പശ്ചാത്തലത്തില് പൊതുജനങ്ങള്ക്ക് തദ്ദേശസ്ഥാപനങ്ങളില് വരാതെ തന്നെ സേവനം നല്കാം എന്നതാണ് പ്രത്യേകത.
https://www.facebook.com/Malayalivartha
