പാഠപുസ്തകം ബീഡിപ്പടക്കമായി വരും; രാമേശ്വരത്തെ ക്ഷൗരം പോലെ സര്‍ക്കാരിന്റെ സ്‌കൂള്‍ പാഠപുസ്തകം അച്ചടി, ഫെബ്രുവരിയില്‍ തുടങ്ങി അടുത്ത ഫെബ്രുവരിയില്‍ വരെ തുടരെ അടിയടാ അടി! പാഠപുസ്തകം അച്ചടി കേരളത്തില്‍ ഏറെ രസകരമായ ഒരു സംഭവം തന്നെ...
രാമേശ്വരത്തെ ക്ഷൗരം പോലെയാണ് സര്‍ക്കാരിന്റെ സ്‌കൂള്‍ പാഠപുസ്തകം അച്ചടി. ആറു മാസം വരെ അച്ചടി വൈകി ഒാണപ്പരീക്ഷയ്ക്കുള്ള ഒന്നാം ടേം പുസ്തകങ്ങള്‍ രണ്ടാം ടേമില്‍ ക്രിസ്മസ് പരീക്ഷയ്ക്കു കിട്ടിയ വര്‍ഷവും പണ്ടിവിടെ സംഭവിച്ചിട്ടുണ്ട്. എന്തായാലും പാഠപുസ്തകം അച്ചടി കേരളത്തില്‍ ഏറെ രസകരമായ ഒരു സംഭമാണ്. ഫെബ്രുവരിയില്‍ തുടങ്ങി അടുത്ത ഫെബ്രുവരിയില്‍ വരെ തുടരെ അടിയടാ അടി.ഇക്കൊല്ലം കോവിഡ് മൂത്തതോടെ പള്ളിക്കൂടങ്ങള്‍ തുറന്നിട്ടേയില്ല. എവിടാ പഠിക്കുന്നേന്നും എത്രയിലാ പഠിക്കുന്നതെന്നും ചെറിയ പുള്ളേര്‍ക്ക് അറിയുകയുമില്ലെങ്കിലും പുസ്തകത്തിന് കുറവൊന്നും നമ്മുടെ സര്‍ക്കാര്‍ വരുത്തില്ല.
ഓണ്‍ലൈന്‍ അഭ്യാസം എന്ന പേരില്‍ പിള്ളേരായ പിള്ളേരൊക്കെ സ്മാര്‍ട്ട് ഫോണില്‍ സിനിമയും കോമിക്‌സും കളിചിരിയുമൊക്കെയായി നേരം കളയുന്നു. വാധ്യാര്‍മാരില്‍ കുറെപ്പേര്‍ ഓണ്‍ലൈനില്‍ അഭ്യാസം നടത്തുന്നതായാണ് കേള്‍വി. അച്ഛനമ്മമാര്‍ പറാഞ്ഞാല്‍ കേള്‍ക്കാത്ത ഇക്കാലത്തെ വികൃതികളെ ടീച്ചര്‍ ഓണ്‍ലൈനില്‍ നന്നാക്കാം എന്നു വച്ചാല്‍ നടക്കുമോ. ഇക്കാലത്തെ ഫ്രീക്കന്‍മാരെ ഓണ്‍ലൈനില്‍ ഉപദേശിച്ചു നന്നാക്കാന്‍ പറ്റില്ലെന്ന് തലയില്‍ ആള്‍താമസമുള്ളവര്‍ക്കെല്ലാം അറിയാം. ഇക്കൊല്ലം പള്ളിക്കൂടം ജനുവരിയിലെങ്ങാനും തുറന്നാലായി എന്ന് സര്‍ക്കാര്‍ പറയുമ്പോഴും വിവരമുള്ളവര്‍ക്കറിയാം ഇക്കൊല്ലം ഒരു സ്‌കൂളും തുറക്കേണ്ടി വരില്ലെന്നു. കോവിഡ് ബാധ ഇങ്ങനെയങ്ങു നീളുമെന്നു ചുരുക്കം. അങ്ങനെ ഇക്കൊല്ലവും സമ്പൂര്‍ണ വിജയം പ്രഖ്യാപിച്ച് അടുത്ത ക്ലാസിലേക്ക് ആവേശത്തോടെ പ്രവേശിക്കാന്‍ തലേവരയുണ്ടായ തലമുറയാണല്ലോ ഇത്. പത്താം ക്ലാസിലും സമ്പൂര്‍ണ വിജയം പ്രഖ്യാപിച്ചശേഷം ഈ സര്‍ക്കാരിന് പടിയിറങ്ങി ചരത്രം നേട്ടം കൊയ്യാം എന്നു ചുരുക്കം.
ഇനി അച്ചടിയിലേക്കു വരാം. സ്‌കൂള്‍ തുറന്നിട്ടില്ലെങ്കിലും പാഠപുസ്തങ്ങളുടെ അച്ചടി സര്‍ക്കാര്‍ പ്രസില്‍ മുറപോലെ നടന്നുവരുന്നുണ്ട്. കേരള സിലബസില്‍ മാത്രം ഒരു വര്‍ഷം ആറു കോടി പുസ്തകങ്ങളാണ് ഓരോ വര്‍ഷവും അക്ഷരങ്ങളും പടങ്ങളും നിറച്ച് അടിച്ചുകൂട്ടുന്നത്. ഓണപ്പരീക്ഷയില്ല, ക്രിസ്മസ് പരീക്ഷയില്ല, വാര്‍ഷിക പരീക്ഷയില്ല. എന്നാലും അച്ചടിക്കു മാത്രം സര്‍ക്കാര്‍ പ്രസുകളില്‍ അമാന്തവുമില്ല.കുട്ടികളുടെ പഠനഭാരം കുറയ്ക്കാന്‍ മൂന്നു ടേമിലേക്ക് മൂന്നു തവണയാണ് ഇപ്പോള്‍ പുസ്തക വിതരണം. ഒന്നാം ടേമിലെ പുസ്തക വിതരണം കഴിഞ്ഞ മാസം തുടക്കത്തിലാണ് ഒരു വിധം പൂര്‍ത്തിയായത്.
വിതരണം തീര്‍ന്നപ്പോള്‍ ഒടുത്തത്തെ പ്രളയവും വന്നു. ഇപ്പോഴിതാ ക്രിസ്മസ് ടേമിലേക്കുള്ള രണ്ടു കോടി പുസ്തകങ്ങളുടെ അടി പുരോഗമിച്ചുവരികയാണ്. ആര്‍ക്കു വേണ്ടിയാണോ ഇതൊക്കെ അടിച്ചുകൂട്ടുന്നതെന്ന് ആര്‍ക്കും അറിയില്ല. എട്ടാം ക്ലാസ് വരെ പാഠപുസ്തകങ്ങള്‍ ഫ്രീയാണ്. ഫ്രീയായി കൊടുത്തിട്ടും ഇക്കൊല്ലം പുസ്തകം വാങ്ങാത്ത മാന്യമാര്‍ ഒട്ടേറെയുണ്ട്. സ്‌കൂളായ സ്‌കൂളുകളില്‍ ഒന്നാം ടേമിലെ പുസ്തകങ്ങള്‍ കെട്ടിക്കിടക്കുന്നുമുണ്ട്. അതില്‍ ചിലതു നനയുന്നു, ചിലത് ചിതലെടുക്കുന്നു. പാഠപുസ്തകമായതുകൊണ്ട് ഒരെണ്ണംപോലും മോഷണം പോകില്ലെന്നത് നേര്. ഉച്ചക്കഞ്ഞിക്കുള്ള അരിയായിരുന്നു ഇത്തരത്തില്‍ സ്‌റ്റോക്കിരിക്കുന്നതെങ്കില്‍ അരിപ്പുര പോലും കള്ളന്‍ കൊണ്ടുപോയേനേ.
പഠിപ്പീര് നടക്കാത്ത സാഹചര്യത്തില്‍ എന്തിനു പുസ്തകം എന്ന മട്ടില്‍ ഒട്ടേറെ വിവരമുള്ള മിടുക്കന്‍മാര്‍ പുസ്തകം കൈയേറ്റു വാങ്ങാനേ പോയിട്ടില്ല. ആ നിലയിലാണ് അടുത്ത ടേമിലേക്കുള്ള പുസ്തകങ്ങളുടെ വരവ്. നവംബറില്‍ തുടങ്ങുമത്രെ അവസാന ടേമിലേക്കുള്ള രണ്ടു കോടി ഗ്രന്ഥങ്ങളുടെ അടി. അന്നു കോവിഡ് ഏതു ഗതിയിലായിരിക്കുമെന്ന് ആര്‍ക്കും അറിഞ്ഞുകൂടാ.കടലാസ് വാങ്ങുന്ന കമ്പനിയുടെയും മഷി തരുന്ന കമ്പനികളുടെയും മറ്റും കമ്മീഷന്‍ ചിലര്‍ക്കൊക്കെ കിട്ടുന്നുണ്ടാവണം. അല്ലാതെ സ്‌കൂള്‍ തുറക്കാതെ കുട്ടികള്‍ പഠിക്കാതെ ഈ പുസ്തകമൊക്കെ എന്തിന് അടിച്ചുകൂട്ടുന്നു. കായികമേളയില്ല, കലോത്സവമില്ല, വാര്‍ഷികമില്ല. കുട്ടികള്‍ അധ്യാപകരെ കണ്ടിട്ടില്ല. അധ്യാപകര്‍ കുട്ടികളെ കണ്ടിട്ടില്ല. കുട്ടികള്‍ പരസ്പരം അറിയുന്നുമില്ല. സ്‌കൂളില്‍ ചേര്‍ന്നതല്ലാതെ ഒന്നാം ക്ലാസുകാരന്‍ പള്ളിക്കൂടം കണ്ടിട്ടുമില്ല. സംഗതിയുടെ രസം അതൊന്നുമല്ല.
കുട്ടികള്‍ ഏറ്റുവാങ്ങാത്ത പുസതകങ്ങളുടെ ഗതി എന്തെന്നു കൂടി അറിയണം. അഞ്ചു വര്‍ഷം കൂടുമ്പോള്‍ വില്‍ക്കാത്ത പാഠപുസ്തകങ്ങള്‍ക്ക് വില്‍ക്കാന്‍ സര്‍ക്കാര്‍ ടെന്‍ഡര്‍ വിളിക്കും. പതിവായി കേരളത്തിലെ പാഠപുസ്തകങ്ങള്‍ ആരാണ് വാങ്ങുന്നതെന്ന് അറിയുമ്പോള്‍ അന്തം വിടരുത്. തമിഴ് നാട്ടില്‍ ശിവകാശിയിലെ പടക്ക കമ്പനികളാണ് ടണ്‍ കണക്കിന് പുസ്തകങ്ങള്‍ കേരളത്തില്‍നിന്നു ലോറിയില്‍ വാങ്ങി നിറച്ചുകൊണ്ടുപോവുക. കോടിക്കണക്കിന് പുസ്തരങ്ങള്‍ വേസ്റ്റ് കടലാസ് നിരക്കില്‍ തൂക്കി വില്‍ക്കപ്പെടുന്നു. അങ്ങനെ ഈ പുസ്‌കകമൊക്കെ ബിഡിപ്പടക്കമായി നമ്മുടെ കുട്ടികളുടെ കൈകളിലേക്ക് വിഷുവിനും ക്രിസ്മസിനും ആണ്ടുപിറവിക്കുമൊക്കെ മടങ്ങിവരുന്നു. സമ്മതിക്കണം നമ്മുടെ പാഠപുസ്തങ്ങളുടെ ഗതിയും കുട്ടികളുടെ ഭാവിയും.
https://www.facebook.com/Malayalivartha
