കൊറോണയുടെ പശ്ചാത്തലത്തില് ബാങ്കുകള് നല്കിയിരുന്ന മൊറട്ടോറിയം കാലാവധി കഴിഞ്ഞു
കൊറോണയുടെ പശ്ചാത്തലത്തില് ബാങ്കുകള് നല്കിയിരുന്ന മൊറട്ടോറിയം കാലാവധി കഴിഞ്ഞു. ഇനി വായ്പാ തിരിച്ചടവ് തുടരേണ്ട സമയമാണ്. മൊറട്ടോറിയം ഉപയോഗപ്പെടുത്തിയവര്ക്ക് ഇക്കാലയളവിലെ പലിശയും കൂട്ടുപലിശയും മുതലിന്മേല് ചേര്ത്തുള്ള ഔട്ട്സ്റ്റാന്ഡിങ് തുക ബാങ്കുകള് കണക്കാക്കി.വലിയ തുക വായ്പയെടുത്തവര്ക്ക് മൊറട്ടോറിയം കാലയളവിലെ പലിശ അടക്കം ഭീമമായ തിരിച്ചടവ് വന്നേക്കും. അതുകൊണ്ടുതന്നെ മുന്പ് അടച്ചിരുന്ന ഇ.എം.ഐ. തുകയെക്കാള് ഉയര്ന്ന ഇ.എം.ഐ. ബാക്കിയുള്ള കാലയളവില് അടയ്ക്കേണ്ടതായി വരും.ചില ബാങ്കുകള് വായ്പാ കാലയളവ് ആറു മാസത്തേക്കു കൂടി നീട്ടിനല്കും.
അതേസമയം, മൊറട്ടോറിയം കാലത്തെ പലിശ സംബന്ധിച്ച് സുപ്രീംകോടതിയില് വാദം നിലനില്ക്കെ ബാങ്കുകള് ഈ രീതിയില് ഔട്ട്സ്റ്റാന്ഡിങ് കണക്കാക്കുന്നത് ധാര്മികമാണോ എന്നാണ് ഇടപാടുകാരുടെ ചോദ്യം. എന്നാല്, ആര്.ബി.ഐ. ചട്ടപ്രകാരം മൊറട്ടോറിയം കാലാവധി കഴിഞ്ഞാലുള്ള നടപടികള് മാത്രമാണ് ബാങ്കുകള് കൈക്കൊണ്ടിട്ടുള്ളതെന്ന് അധികൃതര് പറയുന്നു.
മാത്രമല്ല, ഇക്കാലയളവില് വായ്പാ പലിശയില് കുറവു വന്നിട്ടുണ്ടെങ്കില് അത് ഉപയോഗപ്പെടുത്താനുള്ള അവസരവും ഇടപാടുകാരന് ലഭിക്കും.
പലിശ പൂര്ണമായി പിന്വലിക്കുകയോ പലിശ നിരക്ക് കുറയ്ക്കുകയോ ചെയ്യണമെന്നാണ് സുപ്രീംകോടതിയില് ഹര്ജിക്കാരുടെ വാദം. ബാങ്കുകളെ സംബന്ധിച്ച് അത് പ്രായോഗികമല്ല. ഇപ്പോള് മിക്ക ബാങ്കുകളുടെയും പലിശ നിരക്ക് ഏറ്റവും താഴ്ന്ന നിലയിലാണ്.
എന്നാല്, കേന്ദ്ര സര്ക്കാര് പറയുന്നതുപോലെ മൊറട്ടോറിയം രണ്ടുവര്ഷം വരെ നീട്ടുകയാണെങ്കില് വായ്പയെടുത്തവര് നേരിടേണ്ടി വരുന്ന ബാധ്യത അതി ഭീമമായിരിക്കും. തൊഴില്നഷ്ടവും കോവിഡ് പ്രതിസന്ധിയും തുടരുന്ന സാഹചര്യത്തില് കിട്ടാക്കടം സംബന്ധിച്ച ആശങ്കയിലാണ് ബാങ്കുകള്. മൊറട്ടോറിയത്തിനു മുന്പ്, അതായത് ഫെബ്രുവരി അവസാനത്തോടെ കിട്ടാക്കടം (എന്.പി.എ.) ആയിട്ടുള്ള അക്കൗണ്ടുകള്ക്ക് ബാങ്കുകള് നോട്ടീസ് അയയ്ക്കാനും തുടങ്ങിയിട്ടുണ്ട്.
"
https://www.facebook.com/Malayalivartha
