പൂതനൂരില് സ്വകാര്യവ്യക്തിയുടെ തോട്ടത്തില് കാട്ടുപന്നിക്കു വച്ച കെണിയില് കുടുങ്ങി പുള്ളിപ്പുലി ചത്തു
പാലക്കാട് ജില്ലയിലെ മുണ്ടൂര് പൂതനൂരില് കാട്ടുപന്നിക്കു വച്ച കെണിയില് കുടുങ്ങി സ്വകാര്യവ്യക്തിയുടെ തോട്ടത്തില് ചത്ത പുള്ളിപ്പുലിയുടെ ജഡം പോസ്റ്റ്മോര്ട്ടത്തിനു ശേഷം ധോണിയില് സംസ്കരിച്ചു.
വേലിയില് കെണി വച്ചതു മൂലം പുലി അപകടത്തില്പെട്ട സംഭവത്തില് സ്ഥലം ഉടമയെയും സഹായിയെയും പ്രതിയാക്കി കേസ് റജിസ്റ്റര് ചെയ്തിട്ടുണ്ട്. പുലിയുടെ ശരീര സാംപിള് ഫൊറന്സിക് പരിശോധനയ്ക്ക് അയച്ചു.
റബര് തോട്ടത്തിലെ കമ്പിവേലിയില് ബുധനാഴ്ച രാവിലെ 10-നാണ് പുലിയുടെ ജഡം കണ്ടത്. ഇരുചക്ര വാഹനങ്ങളില് ഉപയോഗിക്കുന്ന കേബിള് കൊണ്ടുള്ള കുരുക്കു കഴുത്തില് കുരുങ്ങിയിരുന്നു. കഴുത്തില് കുരുക്കു മുറുകിയതാണു മരണകാരണം എന്നാണു പ്രാഥമിക സൂചന. രക്ഷപ്പെടാനുള്ള ശ്രമത്തിനിടെ കമ്പിവേലി ദേഹത്തു വലിഞ്ഞു മുറുകിയ നിലയില് ആയിരുന്നു.
ചത്ത ആണ്പുലിക്കു രണ്ടു വയസ്സു കണക്കാക്കുന്നു. സംസ്ഥാനപാതയില് നിന്നു 300 മീറ്റര് മാത്രം അകലെയാണു പുലി എത്തിയത് എന്നത് ആശങ്ക ഉയര്ത്തുന്നു. അതേസമയം, കാട്ടുപന്നികളെ ലക്ഷ്യം വച്ചു കെണി വയ്ക്കുന്ന പതിവ് മേഖലയില് ഉള്ളതായി വനപാലകര് പറയുന്നു.
https://www.facebook.com/Malayalivartha
