വെഞ്ഞാറമൂട് കൊലപാതകത്തില്‍ കൊല്ലപ്പെട്ടവരുടെ കൈയില്‍ ആയുധമുണ്ടായിരുന്നോ ഇല്ലയോ എന്ന കാര്യത്തില്‍ സി.പി.എമ്മില്‍ രണ്ട് അഭിപ്രായം. കൊല്ലപ്പെട്ടവര്‍ സ്വയരക്ഷയ്ക്കായി ആയുധം കൈയില്‍ കരുതിയിരിക്കാമെന്നാണ് കഴിഞ്ഞ ദിവസം സി.പി.എമ്മിന്റെ ജില്ലാ സെക്രട്ടറി ആനാവൂര്‍ നാഗപ്പന്‍ പറഞ്ഞത്. കൊലപാതകത്തിന്റെ സി.സി.ടി.വി ദൃശ്യങ്ങളില്‍ കൊലയാളികളും കൊല്ലപ്പെട്ടവരും പരസ്പരം ആയുധം ഉപയോഗിക്കുന്ന ദൃശ്യം വ്യക്തമായിരുന്നു. ഇതിന് വിശദീകരണമായിയാണ് സി.പി.എമ്മിന്റെ ജില്ലാ നേതാക്കളായ ആനാവൂര്‍ നാഗപ്പനും, വി.ശിവന്‍കുട്ടിയും കോലിയക്കോട് കൃഷ്ണന്‍നായരും രംഗത്ത് വന്നത്. എന്നാല്‍ ഇന്ന് ഡി.വൈ.എഫ്.ഐ സംസ്ഥാന സെക്രട്ടറി എ എ റഹീം നടത്തിയ വാര്‍ത്താ സമ്മേളനത്തില്‍ ഈ അഭിപ്രായം പൂര്‍ണമായി തള്ളുകയാണ്. കൊല്ലപ്പെട്ടവരുടെ കൈയില്‍ ആയുധമില്ലായിരുന്നുവെന്നാണ് റഹിം പറയുന്നത്. കൊല്ലപ്പെട്ടവരുടെ കൈയില്‍ ആയുധം ഉണ്ടായിരുന്നില്ല. പിടിയിലായ പ്രതികള്‍ക്ക് ആര്‍ക്കും പരിക്കേറ്റിട്ടില്ലെന്നത് അതിന്റെ തെളിവാണ്. ഇതുവായി ബന്ധപ്പെട്ട് ആനാവൂര്‍ പറഞ്ഞത് രണ്ട് സാധ്യതകള്‍ മാത്രമാണെന്നും റഹീം കൂട്ടിച്ചേര്‍ത്തു.

അടൂര്‍ പ്രകാശിന്റെ പങ്കിനൊപ്പം ഇന്ന് ഡി.സി.സി നേതൃത്വനും പങ്കുണ്ടെന്നാണ് എ.എ റഹീം ഇന്ന് ആരോപിച്ചത്. കേസില്‍ ഇന്നലെ അറസ്റ്റിലായ പ്രതി ഉണ്ണി കോണ്‍ഗ്രസ് ഭാരവാഹിയാണ്. അറസ്റ്റിലായ പ്രവര്‍ത്തകരെ ഇതുവരെ കോണ്‍ഗ്രസ് പുറത്താക്കിയിട്ടില്ല. കൊലയാളികളെ കോണ്‍ഗ്രസ് സംരക്ഷിക്കുകയാണെന്നും കൊല്ലപ്പെട്ടവരുടെ കുടുംബങ്ങളെ കോണ്‍ഗ്രസ് ആക്ഷേപിക്കുകയാണ്. കോണ്‍ഗ്രസ് ബ്ലോക്ക് പ്രസിഡന്റ് പുരുഷോത്തമന്‍ നായര്‍ അക്രമത്തിന്റെ നേരിട്ടുള്ള ആസൂത്രണത്തില്‍ പങ്കെടുത്തു. അറസ്റ്റിലായ ഉണ്ണി ഐഎന്‍ടിയുസി മണ്ഡലം പ്രസിഡന്റാണ്. കോണ്‍ഗ്രസ് വാര്‍ഡ് പ്രസിഡന്റും ആണ്. കോണ്‍ഗ്രസ് പ്രവര്‍ത്തകരാണ് കൃത്യം ചെയ്തത്. ഇയാളെ പുറത്താക്കാന്‍ കോണ്‍ഗ്രസ് തയാറായിട്ടില്ല. കൊല്ലപ്പെട്ട മിഥിലാജിന്റേത് എന്ന പേരില്‍ പ്രചരിപ്പിക്കുന്ന ഓഡിയോ സന്ദേശങ്ങള്‍ വ്യാജമാണ്. കേസില്‍ പ്രതിയായ ഷജിത്തിനെ അടൂര്‍ പ്രകാശ് നേരില്‍ കണ്ടുവെന്നും റഹീം ആരോപിച്ചു.

വെഞ്ഞാരമൂട് ഗുഢാലോചനയില്‍ എം.പിക്കും കോണ്‍ഗ്രസ് നേതാകള്‍ക്കും പങ്കുണ്ട്. ഇതില്‍ നിന്നും രക്ഷപ്പെടാന്‍ വ്യാജ ആരോപണങ്ങളാണ് കോണ്‍ഗ്രസ് ഉയത്തുന്നതെന്നാണ് സി.പി.എം നേതൃത്വത്തിന്റെ വാദം. അതെ സമയം കോണ്‍ഗ്രസ് നേതൃത്വം കേസിന്റെ അന്വേഷണം സി.ബി.ഐ അന്വേഷിക്കണമെന്ന ആവശ്യത്തിലുമാണ്. പക്ഷേ ഈ ആവശ്യത്തോട് സി.പി.എമ്മും സര്‍ക്കാരും ഇതുവരെ പ്രതികരിച്ചിട്ടുമില്ല. റൂറല്‍ എസ്.പിയുടെ നേതൃത്വത്തില്‍ നടക്കുന്ന അന്വേഷണത്തെ സംബന്ധിച്ച് ഇതുവരെ പരാതിയുണ്ടായിട്ടില്ലെന്നും ഈ സാഹചര്യത്തില്‍ ആ അന്വേഷണം തന്നെ നടക്കട്ടെ എന്നുമാണ് മുഖ്യമന്ത്രി പിണറായി വിജയന്‍ മാധ്യമങ്ങോട് പറഞ്ഞത്. അതുകൊണ്ട് തന്നെ സി.ബി.ഐ അന്വേഷണം എന്ന കോണ്‍ഗ്രസിന്റെ ആവശ്യം പരിഗണിക്കാനും സാധ്യത കുറവാണ്. വെഞ്ഞാറമൂട് ഇരട്ടക്കൊലപാതക കേസില്‍ മുഖ്യപ്രതികളില്‍ ഒരാളായ ഉണ്ണിയെ ഇന്നലെ പൊലീസ് അറസ്റ്റ് ചെയ്തിരുന്നു. കൊലയാളി സംഘത്തിലുണ്ടായിരുന്നയാളാണ് ഉണ്ണി. മദപുരത്തുള്ള ഒരു പാറയുടെ മുകളില്‍ നിന്ന് ആറ്റിങ്ങള്‍ ഡിവൈഎസ്പിയുടെ നേതൃത്വത്തിലുള്ള സംഘമാണ് ഇയാളെ പിടികൂടിയത്. കൊലയാളി സംഘത്തിലുണ്ടായ സജീവിനെയും സനലിനെയും നേരത്തെ പോലീസ് പിടികൂടിയിരുന്നു.സംഘത്തിലെ നാലാമനും രണ്ടാം പ്രതിയുമായ അന്‍സറിനായുള്ള തിരച്ചില്‍ തുടരുകയാണ്.