ചെതലയം റേഞ്ചിന്റെയും വയനാട് വന്യജീവി സങ്കേതത്തിന്റെയും പരിധിയിലൂടെ പോകുന്ന ബത്തേരി-പുല്‍പള്ളി റൂട്ടില്‍ പാമ്പ്ര എസ്റ്റേറ്റിന് സമീപം യാത്രക്കാര്‍ക്കു മുന്‍പില്‍ വീണ്ടും കടുവയെത്തി. ഈ വഴിയില്‍ ഏതുനിമിഷവും കടുവയെത്താമെന്ന ഭീതിയിലാണു യാത്രക്കാര്‍. റോഡരികിലും റോഡിനു നടുവിലുമെല്ലാം കടുവയെ പലപ്പോഴായി കണ്ടവരുണ്ട്. അടുത്തിടെയായി കടുവ പകലും സാന്നിധ്യമറിയിച്ചു തുടങ്ങി.

ഇക്കഴിഞ്ഞ 20-ാം തീയതി ഇതേ ഭാഗത്ത് സ്‌കൂട്ടറിലെത്തിയ ബത്തേരി കേരള ബാങ്ക് ജീവനക്കാരി കെ.ജി.ഷീജയുടെ മുന്‍പിലേക്ക് കടുവയെത്തിയിരുന്നു. മറ്റു വാഹനങ്ങള്‍ എത്തിയതാണ് അവര്‍ക്ക് രക്ഷയായത്. രണ്ടു പേര്‍ യാത്ര ചെയ്‌തെത്തിയ ബൈക്കിനു പിന്നാലെ കടുവ ഓടിയടുക്കുന്നതു കഴിഞ്ഞ വര്‍ഷം സമൂഹ മാധ്യമങ്ങളില്‍ വൈറലായിരുന്നു. ഇതും ചെതലയത്തിനടുത്ത പ്രദേശമാണ്. കാറിലെത്തിയവരുടെ മുന്‍പിലേക്ക് വടക്കനാട് പച്ചാടിയില്‍ കടുവ റോഡു മുറിച്ചു കടന്നെത്തിയത് രണ്ടു മാസം മുന്‍പാണ്.

ഇത്തവണ കാറില്‍ യാത്ര ചെയ്യുകയായിരുന്ന ബത്തേരി എസ്ബിഐ മെയിന്‍ ബ്രാഞ്ച് മാനേജര്‍ ഫ്രെഡറിക് ജോസാണ് റോഡിലേക്ക് ഇറങ്ങാനൊരുങ്ങി വഴിയരികില്‍ നില്‍ക്കുന്ന കടുവയെ കണ്ടത്. ഒന്നര മിനിറ്റോളം കാര്‍ യാത്രക്കാരെ സാകൂതം നോക്കി നിന്ന കടുവ പിന്നീട് അല്‍പം പിറകോട്ടു മാറി കിടന്നു കൊണ്ടായി നോട്ടം. ഇദേഹം അത് പകര്‍ത്തി സമൂഹ മാധ്യമങ്ങളില്‍ പോസ്റ്റ് ചെയ്ത വിഡിയോ വൈറലാവുകയും ചെയ്തു.

ഡ്രൈവര്‍ മുഹമ്മദ് ഷാഫിക്കൊപ്പം ഫ്രെഡറിക് ഇന്നലെ യാത്ര തിരിച്ചത് പുല്‍പള്ളിയിലുള്ള ബാങ്ക് ഇടപാടുകാരെ കാണാനാണ്. ചെതലയം കഴിഞ്ഞ് 12 മണിയോടെ പാമ്പ്ര എസ്റ്റേറ്റിന് സമീപമെത്തിയപ്പോള്‍ കടുവയെ കണ്ടു. തങ്ങളെ കണ്ടതോടെ കടുവ അവിടെത്തന്നെ നിന്നുവെന്ന് ഫ്രെഡറിക് പറയുന്നു. അപ്പോള്‍ അതുവഴി വന്ന സ്ത്രീകളും കുട്ടികളുമടക്കമുള്ള ഇരുചക്ര വാഹന യാത്രക്കാര്‍ക്ക് മുന്നറിയിപ്പ് നല്‍കി. ആരും കടുവയെ ശല്യപ്പെടുത്തുകയോ ശബ്ദമുണ്ടാക്കുകയോ ചെയ്യാത്തിതിനാലാവണം കടുവ രണ്ടു ചുവട് പിന്നോട്ട് മാറി അവിടെ കിടന്നു. കടുവ അവിടെ കിടക്കവേ തന്നെ ഇരുവരും വണ്ടിയെടുത്തു പോന്നു. മാനന്തവാടി കല്ലോടി സ്വദേശിയാണ് ഫ്രെഡറിക് ജോസ്.

ചെതലയം റേഞ്ചിന്റെയും വയനാട് വന്യജീവി സങ്കേതത്തിന്റെയും പരിധിയിലൂടെയാണ് ബത്തേരി-പുല്‍പള്ളി പാത കടന്നുപോകുന്നത്. ഇരുചക്രവാഹനയാത്രക്കാര്‍ക്കാണ് കടുവ ഏറ്റവും വലിയ വെല്ലുവിളിയുയര്‍ത്തുന്നത്. കോവിഡ് നിയന്ത്രണങ്ങളായതോടെ ബസ് സര്‍വീസ് കുറഞ്ഞതിനാല്‍ ഈവഴി പോകുന്ന മിക്കവര്‍ക്കും ഇരുചക്രവാഹനങ്ങള്‍ മാത്രമാണ് ആശ്രയം. കടുവാ ഭീതിയേറിയതോടെ ഈ പാതയില്‍ വനംവകുപ്പ് ക്യാമറകള്‍ സ്ഥാപിച്ചിട്ടുണ്ട്.