പോസിറ്റീവായ എല്ലാവരെയും ആശുപത്രികളില്‍ എത്തിക്കുവാനുള്ള ഈ ആംബുലന്‍സ് കൂട്ടയോട്ടം ഒഴിവാക്കേണ്ടതാണെന്ന് പറഞ്ഞ് ഡോ. സുല്‍ഫി. അദ്ദേഹം പങ്കുവച്ച കുറിപ്പില്‍ പറയുന്നത് ഇങ്ങനെ ... ഫേസ്‌ബുക്ക് കുറിപ്പിന്റെ പൂര്‍ണരൂപം :

എന്തിനാ ഈ ആംബുലന്‍സ് കൂട്ടയോട്ടം
പോസിറ്റീവായ എല്ലാവരെയും ആശുപത്രികളില്‍ എത്തിക്കുവാനുള്ള ഈ ആംബുലന്‍സ് കൂട്ടയോട്ടം ഒഴിവാക്കേണ്ടതാണ്. രോഗലക്ഷണമില്ലാതെ കോവിഡ് 19 ടെസ്റ്റ് പോസിറ്റീവായാല്‍ സ്വന്തം വീടുകളില്‍ തന്നെ നിരീക്ഷിക്കാമെന്ന വ്യവസ്ഥ നിലനില്‍ക്കെ എല്ലാവര്‍ക്കും ഫസ്റ്റ് ലൈന്‍ ട്രീറ്റ്മെന്‍റ് സെന്‍ററുകള്‍ തന്നെ ചികിത്സ ആവശ്യംമെന്നുള്ള ധാരണ വ്യാപകമായി പ്രചരിക്കുന്നുണ്ട്. തീര്‍ച്ചയായും രോഗലക്ഷണമില്ലാത്തവരെ വീടുകളില്‍ തന്നെ ചികിത്സിക്കാവുന്നതാണ്. ലോകത്തെ എല്ലാ രാജ്യങ്ങളിലും മറ്റ് സംസ്ഥാനങ്ങളിലും ഇതുതന്നെയാണ് സ്ഥിതി വിശേഷം. രോഗലക്ഷ്ണം ഇല്ലാത്തവരെ പോലും ചികിത്സിക്കാനായി ഫസ്റ്റ് ലൈന്‍ സെന്ററുകളില്‍ സൗകര്യം ഉണ്ടാക്കുക അത്ര എളുപ്പമല്ല .

വരും ദിവസങ്ങളില്‍ കേസുകളുടെയെണ്ണം വളരെയധികം കൂടുവാനുള്ള സാധ്യത കൂടുതലാണ്. ഒരു ദിവസം 5000 മുതല്‍ 10,000 വരെ കേസുകള്‍ എത്തിയാലും അത്ഭുതമില്ല . അത്തരം എല്ലാ ആള്‍ക്കാരെയും ആശുപത്രികളില്‍ അഡ്മിറ്റ് ചെയ്യുകയെന്നുള്ളത് അസാധ്യമാണ്.അനാവശ്യമാണ്. രോഗ ലക്ഷണമില്ലാത്തവരെ വീടുകളിലും ചികില്‍സിക്കാമെന്നുള്ള ആത്മവിശ്വാസം പൊതുജനങ്ങളിലുണ്ടാക്കേണ്ട ബാധ്യത നമ്മള്‍ക്കെല്ലാവര്‍ക്കുമുണ്ടെന്ന് ഉറപ്പാണ്. തല്‍ക്കാലം ആംബുലന്‍സ് ഗുരുതര രോഗികള്‍ക്ക് മാത്രമായി നിജപ്പെടുത്തണം. ഡോ .സുല്‍ഫി നൂഹു.