ഫ്ലാഗ് സ്റ്റേഷന് പദവിയില് നിന്നും 7 സ്റ്റേഷനുകളെ ഹാള്ട്ട് സ്റ്റേഷനുകളാക്കി മാറ്റുന്നു, സ്വകാര്യ വ്യക്തികള്ക്ക് ടിക്കറ്റ് കൗണ്ടര് ചുമതല നല്കാന് നടപടി
പാലക്കാട് ഡിവിഷനു കീഴില് 7 റെയില്വേ സ്റ്റേഷനുകള് കൂടി ഹാള്ട്ട് സ്റ്റേഷനുകളാകുന്നു.അതില് 4 എണ്ണവും കണ്ണൂര്, കാസര്കോട് ജില്ലകളിലാണ്. 3 സ്റ്റേഷനുകള് കണ്ണൂരിലും ഒരെണ്ണം കാസര്കോടും. നിലവിലെ ഫ്ലാഗ് സ്റ്റേഷന് പദവിയില് നിന്നാണ് ഇവയെ ഹാള്ട്ട് സ്റ്റേഷനുകളാക്കി മാറ്റുന്നത്.
ഔദ്യോഗിക തീരുമാനം വന്നിട്ടില്ലെങ്കിലും ഈ സ്റ്റേഷനുകളില് കമ്മിഷന് വ്യവസ്ഥയില് സ്വകാര്യ വ്യക്തികള്ക്കു ടിക്കറ്റ് കൗണ്ടര് ചുമതല നല്കാന് നടപടി തുടങ്ങിയിട്ടുണ്ട്.
ചിറക്കല്, ചന്തേര, കളനാട് സ്റ്റേഷനുകളുടേതിനു സമാനമായ സാഹചര്യമാകും ഇനി ഇവിടെയും. നിലവില് ഡി ഗ്രേഡ് കാറ്റഗറിയിലുള്ള സ്റ്റേഷനുകളാണ് മുകളില് പറഞ്ഞവ. യാത്രക്കാരുടെ എണ്ണം വര്ധിച്ചാല് കൂടുതല് സൗകര്യങ്ങളും പദ്ധതികളും നടപ്പാക്കുമെന്നാണു റെയില്വേ അധികൃതര് പറയുന്നത്. നിലവിലുള്ള പദ്ധതികള് തുടരുമെന്നും അധികൃതര് പറഞ്ഞു.
ഏഴിമല റെയില്വേ സ്റ്റേഷന്: ഏഴിമല നാവിക അക്കാദമിയുടെ മാതൃ സ്റ്റേഷനായി മാറ്റിയെടുക്കാന് ശ്രമങ്ങള് നടന്നിരുന്നു. ലോക്സഭയില് റെയില്വേ ബജറ്റ് ചര്ച്ചയില്, എകെജി പ്രതിപക്ഷ നേതാവായിരിക്കുമ്പോള് ഏഴിമല റെയില്വേ സ്റ്റേഷന് വികസനത്തിന്റെ അനിവാര്യത വിശദീകരിച്ച് പ്രസംഗം നടത്തിയിരുന്നു. സംസ്ഥാന സര്ക്കാര് പൈതൃക ഗ്രാമമാക്കി ഉയര്ത്തിയ കുഞ്ഞിമംഗലം വെങ്കല ശില്പ പൈതൃക ഗ്രാമം ഈ സ്റ്റേഷന് തൊട്ടടുത്താണ്. ദേശീയപാതയിലേക്ക് എളുപ്പത്തില് എത്തിച്ചേരാനും കഴിയും. പരിയാരം മെഡിക്കല് കോളജിനും വിവിധ സര്ക്കാര് സ്ഥാപനങ്ങള്ക്കും സമീപമാണു സ്റ്റേഷന്. കണ്ണൂര് - മംഗളൂരു പാസഞ്ചര്, കോയമ്പത്തൂര് ഫാസ്റ്റ് പാസഞ്ചര്, മലബാര് എക്സ്പ്രസ് എന്നീ ട്രെയിനുകള്ക്കാണ് ഇവിടെ സ്റ്റോപ്പുള്ളത്.
ഉപ്പള സ്റ്റേഷന്: കാസര്കോട് ജില്ലയിലെ ഉപ്പള റെയില്വേ സ്റ്റേഷനില് മംഗളൂരു-തിരുവനന്തപുരം, മംഗളൂരു-കോഴിക്കോട്, മംഗളൂരു-കോയമ്പത്തൂര്, മംഗളൂരു-കണ്ണൂര് എന്നീ ട്രെയിനുകളാണ് നിര്ത്തുന്നത്. എന്നാല് പുതിയ പരിഷ്കരണത്തില് സ്റ്റോപ്പുകള് റദ്ദായാല് ഒട്ടേറെ യാത്രക്കാരാണു പ്രയാസത്തിലാകുക. മലബാര് എക്സ്പ്രസില് ഓഫിസുകള്, വിദ്യാലയങ്ങള് എന്നിവിടങ്ങളിലേക്കുള്ള ജീവനക്കാര് പോകുന്നുണ്ട്. മംഗളൂരുവിലേക്കുള്ള പാസഞ്ചര് ട്രെയിനിനെ ആശ്രയിക്കുന്നവരും ഒട്ടേറെ. ഇത് ഇല്ലാതായാല് ഇവിടെയുള്ള യാത്രക്കാര് മഞ്ചേശ്വരം, കുമ്പള എന്നീ സ്റ്റേഷനുകളെ ആശ്രയിക്കേണ്ടി വരും.
തലശ്ശേരി ടെംപിള് ഗേറ്റ് റെയില്വേ സ്റ്റേഷന്: ഇവിടെ നിര്ത്തുന്നത് നിലവില് മംഗളൂരു കോയമ്പത്തൂര്, കണ്ണൂര് - കോയമ്പത്തൂര്, കണ്ണൂര് - തൃശൂര്, കണ്ണൂര് - കോഴിക്കോട് പാസഞ്ചര് ട്രെയിനുകളാണ്. ചൊക്ലി, പെരിങ്ങത്തൂര്, കരിയാട്, കടവത്തൂര്, കോഴിക്കോട് ജില്ലയിലെ തൂണേരി, നാദാപുരം ഭാഗങ്ങളില് നിന്നു കോയമ്പത്തൂരിലെ ആശുപത്രികളിലേക്കും വ്യാപാര ആവശ്യങ്ങള്ക്കും പോകുന്നതിന് കോയമ്പത്തൂര് പാസഞ്ചര് സഹായകമായിരുന്നു. കണ്ണൂരിലേക്കും കോഴിക്കോട്ടേക്കും പോകുന്ന വിദ്യാര്ഥികള്ക്കും പ്രയോജനമായിരുന്നു. തലശ്ശേരി ജഗന്നാഥ ക്ഷേത്ര ഉത്സവത്തോടനുബന്ധിച്ചു സ്റ്റേഷനില് പ്രത്യേക സ്റ്റോപ്പും മുന്കാലങ്ങളില് അനുവദിച്ചിരുന്നു.
https://www.facebook.com/Malayalivartha
