മലയാളികളെ സംബന്ധിച്ച് ഏറെ ആകാംക്ഷയോടെ കണ്ടതാണ് സര്‍ക്കാര്‍ മുന്‍ പ്രിന്‍സിപ്പല്‍ സെക്രട്ടറി എം ശിവശങ്കറിന്റേയും കോടിയേരി ബാലകൃഷ്ണന്റെ മകന്‍ ബിനീഷ് കോടിയേരിയുടേയും അറസ്റ്റ്. അതോടൊപ്പം ഇവരുടെ ഭാവിയും മലയാളികള്‍ ചിന്തിക്കുന്നുണ്ട്. കള്ളപ്പണം വെളുപ്പിക്കല്‍ ഇടപാടില്‍ എം. ശിവശങ്കറിനും ബിനീഷ് കോടിയേരിക്കും എതിരെ എന്‍ഫോഴ്‌സമെന്റ് ഡയറക്ടറേറ്റ് ചുമത്തിയത് ഒരേ വകുപ്പുകളാണെങ്കിലും കുറ്റം തെളിഞ്ഞാല്‍ ലഭിക്കുക 2 തരം ശിക്ഷയായിരിക്കുമെന്നാണ് സൂചന.

കള്ളപ്പണം വെളുപ്പിക്കല്‍ നിരോധന നിയമത്തിലെ (പിഎംഎല്‍എ) വകുപ്പുകള്‍ പ്രകാരം കുറ്റം തെളിഞ്ഞാല്‍ 7 വര്‍ഷം വരെ തടവും 5 ലക്ഷം രൂപ പിഴയുമാണു സാധാരണ ശിക്ഷ. എന്നാല്‍ കള്ളപ്പണം സ്വരൂപിച്ചതോ വിനിയോഗിച്ചതോ ലഹരിമരുന്ന് ഇടപാടുകള്‍ക്കു വേണ്ടിയാണെന്നു തെളിഞ്ഞാല്‍ തടവ് 10 വര്‍ഷമായി വര്‍ധിക്കും.

കള്ളപ്പണം നേടാന്‍ സ്വപ്നയെ സഹായിച്ചു, നേടിയ കള്ളപ്പണം ഒളിപ്പിക്കാന്‍ സഹായിച്ചു, സ്വന്തം ചാര്‍ട്ടേഡ് അക്കൗണ്ടന്റിന്റെ സംയുക്ത ഉടമസ്ഥതയിലുള്ള ബാങ്ക് ലോക്കറില്‍ ഒരു കോടി രൂപയും സ്വര്‍ണവും സൂക്ഷിച്ചു തുടങ്ങിയ ആരോപണങ്ങളാണ് ശിവശങ്കറിനെതിരെ ഇഡി ഉന്നയിക്കുന്നത്.

ബെംഗളൂരു ലഹരിമരുന്നു കേസില്‍ അറസ്റ്റിലായ അനൂപ് മുഹമ്മദിന്റെ വെളിപ്പെടുത്തലുകളാണു ബിനീഷിനു കുരുക്കാവുന്നത്. അനൂപിന്റെ ലഹരി ഇടപാടുകളില്‍ ബിനീഷ് നേരിട്ടോ അല്ലാതെയോ പണം മുടക്കിയതായി തെളിഞ്ഞാല്‍ ലഹരി പദാര്‍ഥ നിരോധന നിയമപ്രകാരം (എന്‍ഡിപിഎസ്) കേസന്വേഷിക്കുന്ന നര്‍കോട്ടിക്‌സ് കണ്‍ട്രോള്‍ ബ്യൂറോയും (എന്‍സിബി) വകുപ്പ് 27 (എ) പ്രകാരം ബിനീഷിനെതിരെ കേസ് റജിസ്റ്റര്‍ ചെയ്യും. ഈ കുറ്റം തെളിഞ്ഞാല്‍ 10 മുതല്‍20 വര്‍ഷം വരെ കഠിനതടവും 1 മുതല്‍ 2 ലക്ഷം രൂപവരെ പിഴയുമാണു ശിക്ഷ. ഇഡി രേഖപ്പെടുത്തിയ ബിനീഷിന്റെ മൊഴികള്‍ എന്‍സിബി പരിശോധിക്കുന്നുണ്ട്.

ബിനീഷ് കോടിയേരിയാണു ബോസ് എന്നും താന്‍ ബെനാമി മാത്രമാണെന്നും ലഹരിക്കേസില്‍ അറസ്റ്റിലായ കൊച്ചി സ്വദേശി അനൂപ് മുഹമ്മദ് മൊഴി നല്‍കിയിട്ടുണ്ടെന്ന് ഇഡി പറഞ്ഞതോടെ ബിനീഷിന്റെ കുരുക്ക് മുറുകിയിട്ടുണ്ട്. ബെംഗളൂരു പ്രത്യേക കോടതിയില്‍ സമര്‍പ്പിച്ച റിമാന്‍ഡ് റിപ്പോര്‍ട്ടിലാണ് ഇക്കാര്യം വ്യക്തമാക്കിയത്. അനൂപിന്റെ അക്കൗണ്ടിലേക്കു മാത്രമല്ല, ബിനീഷിന്റെ കേരളത്തിലെ അക്കൗണ്ടുകളിലേക്കും വന്‍തുകകള്‍ എത്തിയിട്ടുണ്ടെന്നും അവ അന്വേഷിച്ചുവരികയാണെന്നും ഇഡി വാര്‍ത്തക്കുറിപ്പില്‍ അറിയിക്കുകയും ചെയ്തു.

ബിനീഷിന്റെ ചോദ്യം ചെയ്യല്‍ ഇന്നലെ രാത്രി പത്തര വരെ നീണ്ടിരുന്നു. തുടര്‍ച്ചയായി 12 മണിക്കൂറിലേറെയാണ് ചോദ്യം ചെയ്തത്. രാത്രി 11നു വില്‍സന്‍ ഗാര്‍ഡന്‍ പൊലീസ് സ്‌റ്റേഷനിലേക്കു കൊണ്ടുപോയി. പണമിടപാടുകള്‍ സംബന്ധിച്ച മിക്ക ചോദ്യങ്ങളില്‍നിന്നും ബിനീഷ് ഒഴിഞ്ഞുമാറിയതായാണു വിവരം. അനൂപിന്റെ ലഹരി ബന്ധം അറിഞ്ഞില്ലെന്ന വാദം ഇഡി തള്ളുന്നു.

ചില പണമിടപാടു രേഖകള്‍ ബിനീഷ് വ്യാഴാഴ്ച ഹാജരാക്കിയിരുന്നെങ്കിലും അവ അപര്യാപ്തമെന്നു ചൂണ്ടിക്കാട്ടിയാണ് അറസ്റ്റ് ചെയ്തത്. ഇഡി റിമാന്‍ഡ് കാലാവധി കഴിഞ്ഞ ശേഷം, നര്‍കോട്ടിക്‌സ് കണ്‍ട്രോള്‍ ബ്യൂറോയും (എന്‍സിബി) ബിനീഷിനെ കസ്റ്റഡിയില്‍ വിട്ടുകിട്ടാന്‍ ആവശ്യപ്പെടുമെന്നാണു വിവരം. മയക്ക് മരുന്ന് കേസ് ജാമ്യമില്ലാ കേസായതിനാല്‍ എന്‍സിബിയുടെ കസ്റ്റഡി ഏറെ കടുക്കും. ബിനീഷ് കോടിയേരിയുടെ അറസ്റ്റ് സംസ്ഥാനത്ത് രാഷ്ട്രീയമായും ഏറെ ചര്‍ച്ചയാകുന്നുണ്ട്. ഇന്നലത്തെ ചാനല്‍ ചര്‍ച്ചകളിലെല്ലാം ബിനീഷിനെ പ്രതിരോധിക്കാനാകാതെ ചാനല്‍ ചര്‍ച്ചാ സഖാക്കള്‍ വെള്ളം കുടിക്കുന്ന കാഴ്ചയാണ് കാണാന്‍ കഴിഞ്ഞത്.