സ്വർണക്കടത്ത് കേസിലെ പ്രതികളായ സ്വപ്ന സുരേഷ്, സരിത്ത്, സന്ദീപ് എന്നിവരെ ശിവശങ്കറിനൊപ്പമിരുത്തി ചോദ്യം ചെയ്യാൻ എന്റഫോഴ്സ്മെന്റ് ഡയറക്ടറേറ്റ്. 3 പ്രതികളേയും ജുഡീഷ്യൽ കസ്റ്റഡിയിൽ ചോദ്യം ചെയ്യാൻ അനുവദിക്കണമെന്നാവശ്യപ്പെട്ട് ഇ.ഡി. അപേക്ഷ സമർപ്പിച്ചു. തിങ്കളാഴ്ച കോടതി അപേക്ഷ പരിഗണിക്കും. ലൈഫ് മിഷൻ സി.ഇ.ഒ. യു.വി.ജോസിനേയും ഇ.ഡി. ചോദ്യം ചെയ്തേക്കുമെന്ന് സൂചനയുണ്ട്. കളളപ്പണ ഇടപാടിൽ ശിവശങ്കറിന് പങ്കുണ്ട് എന്ന നിഗമനത്തിലാണ്‌ ഇ.ഡി. അദ്ദേഹത്തെ അറസ്റ്റ് ചെയ്തിരിക്കുന്നത്. എന്നാൽ ചോദ്യംചെയ്യലിനോട് ശിവശങ്കർ സഹകരിച്ചിരുന്നില്ല. സ്വപ്നയുടെ ലോക്കറിൽ സൂക്ഷിച്ച പണത്തിൽ ശിവശങ്കറിന്റെ പണമുണ്ടോ, പണം തന്റേതുകൂടിയാണെന്നതിന്റെ അടിസ്ഥാനത്തിലാണോ ഇക്കാര്യങ്ങളിൽ ശിവശങ്കർ താലപര്യം പ്രകടിപ്പിച്ചത് എന്നാണ് ഇ.ഡി.അന്വേഷിക്കുന്നത്.

ശിവശങ്കറിനെയും സ്വപ്നയെയും പ്രത്യേകം പ്രത്യേകം ചോദ്യം ചെയ്തതിൽ നിന്ന് ഈ പണത്തിൽ ശിവശങ്കറിന് ഉടമസ്ഥതയില്ലെന്നാണ് ഇതുവരെ മനസ്സിലാക്കാനായിട്ടുളളത്. എന്നാൽ പണവുമായി ബന്ധപ്പെട്ട ഓരോഘട്ടത്തിലും ശിവശങ്കറിന്റെ ഇടപെടലുണ്ടായിട്ടുണ്ട്. ബാഗേജ് കസ്റ്റംസ് പിടിച്ചതിന് ശേഷം ലോക്കറിന്റെ കാര്യത്തിൽ ശിവശങ്കർ ആശങ്കപ്പെട്ടതും ഇ.ഡി. ശേഖരിച്ച വാട്സാപ്പ് ചാറ്റിൽ കണ്ടെത്തിയിട്ടുണ്ട്. അതിനാലാണ് ശിവശങ്കറിന്റെ പങ്ക് ഇ.ഡി.സംശയിക്കുന്നത്

എന്നാൽ ശിവശങ്കറിന്റെയും ബിനീഷിന്റെയും അറസ്റ്റിനു പിന്നാലെ കേന്ദ്ര അന്വേഷണ ഏജൻസികൾ നടപടികൾ കടുപ്പിക്കുമ്പോൾ പ്രതിരോധിക്കുക സർക്കാരിന് ദുഷ്‌കരമാകും. ഇരുവർക്കുമെതിരായ നടപടികൾ കള്ളപ്പണ ഇടപാടിൽ മാത്രം ഒതുങ്ങുന്നതല്ല. സ്വർണക്കടത്ത് നിയന്ത്രിച്ചത് ശിവശങ്കറാണെന്നും ഗൂഢാലോചനയിൽ പങ്കാളിയാണെന്നും മുഖ്യമന്ത്രിയുടെ ഓഫീസിലെ ഉന്നതപദവി സ്വർണക്കടത്തിനായി ദുരുപയോഗിച്ചെന്നും ഇ.ഡി കോടതിയെ അറിയിച്ചുകഴിഞ്ഞു. മുഖ്യമന്ത്രിയുടെ പഴ്സണൽ സ്റ്റാഫ് അംഗങ്ങളിൽ ചിലരെ ഇ.ഡി ഉടൻ ചോദ്യം ചെയ്യുമെന്നാണ് വിവരം. ഇതിലൊരാളാണ് ശിവശങ്കറിനെ മുഖ്യമന്ത്രിയുടെ ഓഫീസിലെത്തിച്ചത്.

മുഖ്യമന്ത്രിയുടെ ചുമതലയിലുള്ള പൊതുഭരണവകുപ്പിലെ പ്രോട്ടോക്കോൾ വിഭാഗത്തിലെ രണ്ട് ഉന്നത ഉദ്യോഗസ്ഥരും സംശയമുനയിലാണ്. ഇതിലൊരാൾക്ക് സ്വപ്ന യൂണിടാക്കിൽ നിന്ന് കിട്ടിയ ഐ-ഫോൺ സമ്മാനിച്ചിരുന്നു. ശിവശങ്കറിന്റെ ഇ.ഡി കസ്റ്റഡി കഴിഞ്ഞാലുടൻ,സ്വപ്‌നയുമായി ചേർന്ന് വിദേശത്തേക്ക് 1.90ലക്ഷം ഡോളർ ( 1.40കോടി രൂപ)​ കടത്തിയ കേസിൽ കസ്റ്റംസ് അദ്ദേഹത്തെ കസ്റ്റഡിയിൽ എടുക്കാം. ഏഴുവർഷം വരെ തടവുശിക്ഷ കിട്ടാവുന്ന കേസാണിത്.

അനധികൃതമായി ഡോളർ മാറ്റിയെടുത്തതിന് റിസർവ് ബാങ്കിന്റെയും ആദായനികുതി വകുപ്പിന്റെയും അന്വേഷണവും ശിവശങ്കറിനെതിരെയുണ്ടാവും.യൂണിടാക് കമ്പനി നൽകിയ ഐ-ഫോൺ സ്വീകരിച്ചത് കോഴയായതിനാൽ ലൈഫ് കോഴക്കേസിൽ സി. ബി. ഐയും ശിവശങ്കറിനെ ചോദ്യം ചെയ്യാൻ കാത്തിരിക്കയാണ്.ബംഗളുരു മയക്കുമരുന്ന് കേസന്വേഷിക്കുന്ന നാർകോട്ടിക് കൺട്രോൾ ബ്യൂറോ ബിനീഷിനെ പ്രതിയാക്കിയേക്കും. മറ്റു ചില കള്ളപ്പണ ഇടപാടുകളിലും അന്വേഷണമുണ്ടാവും.പ്രതികളുടെയും സംശയമുള്ളവരുടെയും കുടുംബാംഗങ്ങളുടെയും സ്വത്ത്, വരവ്,​ ബിനാമി ഇടപാടുകൾ കണ്ടെത്താൻ റെയ്ഡുകൾ നടത്താനും സ്വത്തുക്കൾ കണ്ടുകെട്ടാനും ഇ.ഡിക്ക് കഴിയും. ഇ.ഡി അറസ്റ്റ് ചെയ്താൽ മൂന്നു മുതൽ ആറുമാസം വരെ ജാമ്യം കിട്ടില്ല.