തങ്ങള്‍ പറയാത്തതും ചെയ്യാത്തതുമായ കാര്യങ്ങള്‍ തങ്ങളുടെ തലയില്‍ ചാരാന്‍ ശ്രമിച്ചതിനെ തുടര്‍ന്ന് ഇഡിയുടെ ശക്തമായ നടപടി. അന്വേഷണം തടസ്സപ്പെടുത്താന്‍ ശ്രമിച്ചതിന്റെ പേരിലായിരിക്കും കേസെടുക്കുക. സ്വപ്നയുടെയും ശിവശങ്കറിന്റെയും മൊഴിയെടുക്കല്‍ ഇ.ഡി. വീഡിയോ റെക്കോര്‍ഡ് ചെയ്തിട്ടുണ്ട്. രാഷ്ട്രീയക്കാരുമായി ബന്ധപ്പെട്ട് യാതൊന്നും പ്രതികളോട് ചോദിച്ചിട്ടില്ലെന്ന് റെക്കോര്‍ഡിംഗില്‍ നിന്നും വ്യക്തമാണ്.

മുഖ്യമന്ത്രിയുടെ പേര് പറയാന്‍ ഇഡി നിര്‍ബന്ധിച്ചതായി സ്വപ്നയും നേതാക്കളുടെ പേര് പറയാന്‍ നിര്‍ബന്ധിച്ചതായി ശിവശങ്കറും ആരോപണം ഉന്നയിച്ചിട്ടുണ്ട്.

അതേ സമയം മുഖ്യമന്ത്രിക്ക് സ്വര്‍ണ്ണക്കടത്ത് കേസില്‍ എന്തെങ്കിലും പങ്കുണ്ടോ എന്നും ഇഡി പരിശോധിക്കുന്നു .സ്വപ്ന മുഖ്യമന്ത്രിയുടെ പേര് പറഞ്ഞതോടെയാണ് ഇങ്ങനെയൊരു സംശയം ഇഡി ഉദ്യോഗസ്ഥര്‍ക്ക് ഉണ്ടായിരിക്കുന്നത്. ഒരു ബന്ധമുമില്ലാത്ത മുഖ്യമന്ത്രിയുടെ പേര് സ്വപ്ന പറയില്ലെന്ന് ഇ ഡി കരുതുന്നു.

എന്നാല്‍ സ്വപ്ന സുരേഷിന്റെ ശബ്ദ സന്ദേശം പുറത്തുവന്ന സംഭവത്തില്‍ അന്വേഷണത്തിന് സാധ്യതയില്ലെന്ന് സംസ്ഥാന പോലീസ് വിലയിരുത്തി. നിയമലംഘനം നടന്നിട്ടില്ലെന്നാണ് പോലീസിന്റെ നിഗമനം. അന്വേഷണത്തിന് സാധ്യതയുണ്ടോയെന്ന് നിയമോപദേശം തേടും. ശബ്ദരേഖ വ്യാജമല്ലാത്തതിനാല്‍ കുറ്റകൃത്യമായി കണക്കാക്കാനാകില്ലെന്നാണ് പോലീസിന്റെ നിലപാട്.

സ്വപ്നയുടെ ശബ്ദരേഖ എങ്ങനെയാണ് വെബ്‌പോര്‍ട്ടലിന് ലഭിച്ചത്, ഇത് റെക്കോഡ് ചെയ്ത വ്യക്തി, തീയതി, സ്ഥലം ഇക്കാര്യങ്ങളില്‍ സമഗ്രമായ അന്വേഷണം നടത്തണമെന്നാണ് ജയില്‍ ഡിജിപി ഋഷിരാജ് സിങ്, പോലീസ് മേധാവി ലോക്‌നാഥ് ബെഹ്‌റയ്ക്ക് കത്ത് നല്‍കിയത്. എന്നാല്‍ ഇക്കാര്യത്തില്‍ അന്വേഷണത്തിന് സാധ്യത കുറവാണെന്ന വിലയിരുത്തലിലാണ് പോലീസ്. കത്ത് സിംഗിന്റെ എടുത്തുചാട്ടമായി മാത്രം കരുതാനാണ് പോലീസിന് ഇഷ്ടം.

ശബ്ദരേഖ വ്യാജമല്ലെന്നും ഇതിലെ പരാമര്‍ശങ്ങള്‍ കുറ്റകൃത്യ സ്വഭാവമുള്ളതല്ലെന്നും അതിനാല്‍ തന്നെ ഇക്കാര്യത്തില്‍ നിയമലംഘനമില്ല എന്ന വിലയിരുത്തലിലാണ് പോലീസ്. കുറ്റകൃത്യം എന്ന നിലയില്‍ ഇക്കാര്യത്തില്‍ അന്വേഷണം നടത്താന്‍ പരിമിതികളുണ്ടെന്നാണ് പോലീസിന്റെ വിലയിരുത്തല്‍. എന്നാല്‍ ഇക്കാര്യത്തില്‍ വിശദമായ നിയമോപദേശം തേടും. അതിന് ശേഷമായിരിക്കും ഒരു തീരുമാനത്തിലേക്ക് പോലീസ് പോകുക. കത്ത് പുറത്തുവന്നതിന് പിന്നില്‍ തിരക്കഥയുണ്ടെന്നും മുഖ്യമന്ത്രിയുടെ ഓഫീസിനെ സംശയിക്കുന്നതായും ഇക്കാര്യത്തില്‍ അന്വേഷണം വേണമെന്നും കേന്ദ്ര വിദേശകാര്യ സഹമന്ത്രി വി. മുരളീധരന്‍ പറഞ്ഞു. മുരളിയുടെ പ്രസ്താവന പുറത്തുവന്നതോടെയാണ് ഇ ഡി അന്വേഷണം തുടങ്ങിയത്.

കേരളത്തിലെ അഭ്യന്തര വകുപ്പിന് കീഴിലാണ് ജയിലുകളുള്ളത്. ആഭ്യന്തര വകുപ്പ് കൈകാര്യം ചെയ്യുന്നത് മുഖ്യമന്ത്രി പിണറായി വിജയനാണ്. അദ്ദേഹത്തിന് വേണ്ടി ആസൂത്രണം ചെയ്ത് പിറത്തുവിട്ടതാണോയെന്ന് സംശയമുണ്ട്. അത് അന്വേഷിക്കണമെന്നാണ് മുരളി പറഞ്ഞത്

രണ്ട് മാസങ്ങള്‍ക്ക് മുമ്പുള്ളതാണ് ശബ്ദ സന്ദേശമെങ്കില്‍ അന്നെന്താണ് പുറത്തുവിടാഞ്ഞതെന്നും മുരളീധരന്‍ ചോദിച്ചു. മുഖ്യമന്ത്രിയുടെ ഓഫീസിലെ ഒരാള്‍ ജയിലിന് അകത്തായി. അടുത്തയാളെ ചോദ്യം ചെയ്യാന്‍ അന്വേഷണ ഏജന്‍സികള്‍ വിളിപ്പിച്ചിരിക്കുന്നു. അയാളെ ചോദ്യം ചെയ്യുമ്പോള്‍ കൂടുതല്‍ വിവരങ്ങള്‍ പുറത്ത് വന്നാല്‍ മുഖ്യമന്ത്രിയുടെ ഓഫീസിനെ ലക്ഷ്യം വെച്ചിരിക്കുന്നുവെന്ന് മുന്‍കൂര്‍ ജാമ്യം എടുക്കാന്‍ വേണ്ടിയിട്ടുള്ള ഒരു നാടകമാണ് ഈ ശബ്ദരേഖ.

മുഖ്യമന്ത്രിയുടെ ഓഫീസിലുണ്ടായ തിരക്കഥയയുടെ ഭാഗമാണ് ശബ്ദരേഖയെന്നും മുരളീധരന്‍ പറഞ്ഞു. പഞ്ചായത്ത് തിരഞ്ഞെടുപ്പ് മുന്നില്‍ കണ്ടാണ് ഇതെന്നും അദ്ദേഹം ആരോപിച്ചു.

സര്‍ക്കാരിനെ അട്ടിമറിക്കാന്‍ അന്വേഷണ ഏജന്‍സികളെ ഉപയോഗപ്പെടുത്തുന്നുവെന്ന് സി.പി.എം സംസ്ഥാന സെക്രട്ടേറിയേറ്റ് പ്രസ്താവനയിറക്കിയതും ഇഡിയെ സംശയത്തിന്റെ മുനയിലാക്കി . മുഖ്യമന്ത്രിയെ ലക്ഷ്യമാക്കിയാണ് നീക്കങ്ങള്‍. പ്രതികളെ മാപ്പുസാക്ഷിയാക്കാമെന്ന് പ്രലോഭിപ്പിച്ചും സമ്മര്‍ദം ചെലുത്തിയും രാഷ്ട്രീയ താല്‍പര്യങ്ങള്‍ നടപ്പാക്കാന്‍ ശ്രമിക്കുകയാണെന്നും സി.പി.എം. പറഞ്ഞു.

മുഖ്യമന്ത്രിയുടെ ഓഫീസിനെ ലക്ഷ്യം വച്ചതിന്റെ തെളിവായാണ് സ്വപ്നയുടെ മൊഴി. ഇത് ജനാധിപത്യത്തോടും നിയമസംവിധാനത്തോടുമുള്ള വെല്ലുവിളിയാണ്. സര്‍ക്കാരിനെ രാഷ്ട്രീയപരമായും ഭരണപരമായും എതിര്‍ക്കാന്‍ കഴിയാത്ത യു.ഡി.എഫ്. ബി.ജെ.പി. കൂട്ടുകെട്ടിന് ആയുധങ്ങള്‍ ഒരുക്കി കൊടുക്കുകയാണ് അന്വേഷണ ഏജന്‍സികള്‍ ചെയ്യുന്നതെന്നും സി.പി.എം. കോടതിയില്‍ സമര്‍പ്പിച്ച മൊഴി ഒന്നു വായിച്ചു നോക്കാന്‍ പോലും തന്നെ അനുവദിച്ചില്ലെന്ന് സ്വപ്ന സുരേഷിന്റെ ശബ്ദരേഖയില്‍ പറയുന്നുണ്ട്. രാഷ്ട്രീയ നേതാക്കളുടെ പേര് പറയാന്‍ തന്റെ പേരില്‍ സമ്മര്‍ദമുണ്ടെന്ന് നേരത്തെ എം.ശിവശങ്കറും കോടതിയില്‍ പറഞ്ഞിരുന്നു. ഇതെല്ലാം വ്യക്തമാക്കുന്നത് മുഖ്യമന്ത്രിയെയും സര്‍ക്കാരിനെയും ലക്ഷ്യം വെച്ചുള്ള അന്വേഷണ പ്രഹസനവും തിരക്കഥയ്ക്ക് അനുസരിച്ചുള്ള അന്വേഷണ ഏജന്‍സികളുടെ പ്രവര്‍ത്തനവും ആണെന്നാണ് സി.പി.എം. പ്രസ്താവനയില്‍ പറയുന്നത്.

ഈ സാഹചര്യത്തില്‍ അന്വേഷണ ഏജന്‍സികളുടെ നിയമവിരുദ്ധ പ്രവര്‍ത്തനങ്ങള്‍ക്ക് എതിരെ ശക്തമായി രംഗത്തുവരാന്‍ ജനങ്ങള്‍ തയ്യാറകണമെന്നും സി.പി.എം. പറയുന്നു.

ഇ ഡിയുടെ അന്വേഷണത്തെ തടസ്സപ്പെടുത്താന്‍ ശ്രമിക്കുന്നത് കുറ്റകൃത്യമാണ്.