പകല്‍ ബൈക്കില്‍ കറങ്ങി നടന്ന് ആളില്ലാത്ത വീടുകള്‍ കണ്ടെത്തി അവിടെ മോഷണം നടത്തുന്നത് പതിവാക്കിയ പീച്ചി സ്വദേശി സന്തോഷ് പിടിയിലായി. നിരവധി കേസുകളില്‍ പ്രതിയാണ്. മണ്ണുത്തി പോലീസിന്റെയും ഷാഡോ പോലീസിന്റെയും വിദഗ്ധ നീക്കത്തിലാണ് ഇയാളെ പടികൂടിയത്.

ആളില്ലാത്ത വീടുകള്‍ കണ്ടെത്തിയ ശേഷം വീട്ടിന്റെ താക്കോല്‍ കണ്ടുപിടിച്ച് മോഷണം നടത്തും. പിന്നീട് താക്കോല്‍ അതേ സ്ഥലത്ത് വച്ച് മടങ്ങുന്നതാണ് ഇയാളുടെ രീതി. അതുകൊണ്ടു തന്നെ വീട്ടുകാര്‍ മോഷണ വിവരം അറിയാന്‍ തന്നെ ദിവസങ്ങളെടുക്കും.

2018-ല്‍ നൂറിലധികം പവന്‍ സ്വര്‍ണ്ണം കവര്‍ന്ന കേസില്‍ പിടിയിലായ സന്തോഷ് കഴിഞ്ഞ ആഗസ്റ്റിലാണ് ജാമ്യത്തിറങ്ങിയത്. പുറത്തിറങ്ങിയ ശേഷം വീണ്ടും മോഷണം തുടങ്ങി. കൊടകര, പുതുക്കാട്, വിയ്യൂര്‍, വരന്തരപ്പള്ളി തുടങ്ങിയ ഒട്ടേറെ പൊലീസ് സ്റ്റേഷനുകളില്‍ ഇയാള്‍ക്കെതിരെ കേസുണ്ട്.

മാടക്കത്തറ സ്വദേശി മനോജിന്റെ വീട്ടില്‍ നിന്നും കഴിഞ്ഞ നവംബര്‍ എട്ടിന് ആറ് പവനും 90,000 രൂപയും മോഷ്ടിച്ച കേസിലെ അന്വേഷണമാണ് സന്തോഷിനെ കുടുക്കിയത്. സിസിടിവി ദൃശ്യങ്ങള്‍ അടിസ്ഥാനമായ അന്വേഷണമാണ് പ്രതിയിലേക്കെത്തിയത്.

ചിറക്കേക്കാട് വീട്ടില്‍ നിന്നും 2 ലക്ഷം രൂപ മോഷ്ടിച്ചതും, ഒല്ലൂരിലെ വീട്ടില്‍ നിന്നും 50 പവനിലേറെ സ്വര്‍ണ്ണം കവര്‍ന്നതും താനാണെന്ന് പ്രതി സമ്മതിച്ചിട്ടുണ്ട്.