പാലാരിവട്ടം പാലം അഴിമതിക്കേസില്‍ സകലരെയും ഞെട്ടിച്ച് വിജിലന്‍സ് നീക്കം. കൂടുതല്‍ ഉദ്യോഗസ്ഥരെ പ്രതികളാക്കി കൊണ്ടുള്ള നീക്കമാണ് വിജിലൻസ്‌ നടത്തിയിരിക്കുന്നത് . കരാറുകാരന് വായ്‌പ അനുവദിച്ച ഉത്തരവില്‍ ഒപ്പിട്ട എല്ലാ ഉദ്യോഗസ്ഥരേയും വിജിലന്‍സ് പ്രതിയാക്കിയിരിക്കുകയാണ് . സുപ്രധാനമായ നീക്കമാണ് കേസില്‍ വിജിലന്‍സിന്റെ ഭാഗത്ത് നിന്നുണ്ടായിരിക്കുന്നത് എന്ന കാര്യം അതീവ ശ്രദ്ധേയം . എല്ലാ ചട്ടങ്ങളും ലംഘിച്ചാണ് കരാറുകാരനായ സുമിത് ഗോയലിന് 8.25 കോടി രൂപ വായ്‌പ നല്‍കിയതെന്ന് വിജിലന്‍സ് കണ്ടെത്തിയിരുന്നു. ഈ സാഹചര്യത്തിലായിരുന്നു ഉത്തരവില്‍ ഒപ്പിട്ട എല്ലാ ഉദ്യോഗസ്ഥരേയും വിജിലന്‍സ് പ്രതിയാക്കിയിരിക്കുന്നത്.

സ്‌പെഷ്യല്‍ സെക്രട്ടറി കെ സോമരാജന്‍, അണ്ടര്‍ സെക്രട്ടറി ലതാകുമാരി, അഡീഷണല്‍ സെക്രട്ടറി സണ്ണി ജോണ്‍, ഡെപ്യൂട്ടി സെക്രട്ടറി പി എസ് രാജേഷ് എന്നിങ്ങനെ അന്ന് പൊതുമരാമത്ത് വകുപ്പിലുണ്ടായിരുന്ന മുതിര്‍ന്ന ഉദ്യോഗസ്ഥരെയാണ് കേസില്‍ ഇപ്പോൾ പ്രതിചേര്‍ത്തിരിക്കുന്നത്. കിറ്റ്കോയുടെ രണ്ട് ഉദ്യോഗസ്ഥരേയും കൂടി അഴിമതി കേസില്‍ പ്രതി ചേര്‍ത്തിട്ടുണ്ട്. എഞ്ചിനീയര്‍ എ എച്ച്‌ ഭാമ, കണ്‍സല്‍ട്ടന്റ് ജി സന്തോഷ് എന്നിവരെയാണ് പ്രതി ചേര്‍ത്തത്. ഇതോടെ കേസിലെ മൊത്തം പ്രതികള്‍ പതിനേഴായി മാറിയിരിക്കുകയാണ്. പാലാരിവട്ടം പാലം കേസില്‍ കൂടുതല്‍‌ അറസ്റ്റുകള്‍ക്ക് സാധ്യതയുണ്ട് . പാലം രൂപകല്‍പന ചെയ്തത് ബെംഗളൂരുവിലെ നാഗേഷ് കണ്‍സള്‍ട്ടന്‍സി എന്ന സ്ഥാപനമാണ്. ഈ സ്ഥാപനത്തിന്റെ ഉടമയായ നാഗേഷിനെ ബുധനാഴ്ച മുതല്‍ വിജിലന്‍സ് വിശദമായി ചോദ്യം ചെയ്തിരുന്നു .