കേന്ദ്ര അന്വേഷണ ഏജന്‍സികളെ കേരളത്തിലേക്ക് ക്ഷണിച്ച് വരുത്തിയ സര്‍ക്കാര്‍ തന്നെ അതിന് തടയിടാനുള്ള ശ്രമത്തിലാണ്. സ്വര്‍ണക്കടത്ത് കേസ് മറയാക്കി സര്‍ക്കാരിനെ അട്ടിമറിക്കാനാണ് കേന്ദ്ര അന്വേഷണ ഏജന്‍സികള്‍ ശ്രമിക്കുന്നതെന്നും ഇതിനെതിരെ പ്രധാനമന്ത്രിക്ക് കത്തയയ്ക്കുമെന്നാണ് മുഖ്യമന്ത്രി പിണറായി വിജയന്‍ ഇന്നലത്തെ പത്രസമ്മേളനത്തില്‍ പറഞ്ഞത്. ഇതുകേട്ട് യഥാര്‍ത്ഥത്തില്‍ തലയ്ക്ക് കൈവച്ചത് ചാനല്‍ ചര്‍ച്ചാ സഖാക്കളാണ്. നരേന്ദ്രമോദിയെ കലാപകാരിയാക്കി വേണ്ടിടത്തും വേണ്ടാത്തിടത്തും കുറ്റം പറയുന്നവരാണ് സഖാക്കള്‍. എന്തിന് നരേന്ദ്രമോദി പ്രധാനമന്ത്രിയാകുന്നതിന് മുമ്പ് ശിവഗിരിയില്‍ എത്തിയപ്പോള്‍ അദ്ദേഹത്തോടൊപ്പം വേദി പങ്കിടാന്‍ ഒരു സഖാക്കളും തയ്യാറായില്ല. മാത്രമല്ല അദ്ദേഹത്തിനെപ്പറ്റി വേണ്ടാത്ത കഥകളാണ് കുത്തി നിറച്ചത്. അന്നത്തെ നേതാക്കന്‍മാരുടെ പ്രസംഗം സെര്‍ച്ച് ചെയ്താല്‍ അന്തം വിടും. മാത്രമല്ല ശബരിമല സമയത്ത് കെ. സുരേന്ദ്രനെ എണ്ണിയാലൊടുങ്ങാത്ത കേസില്‍ പെടുത്തി 21 ദിവസമാണ് ജയിലില്‍ കിടത്തിയത്. അന്ന് ഒരാളും ഇടപെട്ടില്ലല്ലോ. ഇതാണ് സഖാക്കളെ തലയില്‍ കൈവയ്പ്പിക്കുന്നതും ബിജെപിക്കാരെ ചിരിപ്പിക്കുന്നതും. അവര്‍ ഇപ്പോഴേ വിമര്‍ശനവുമായി രംഗത്തെത്തിയിട്ടുണ്ട്.

പ്രധാനമന്ത്രിക്ക് കത്തെഴുതുമോയെന്ന് അതിശയിച്ച് ഒരു പത്രപ്രവര്‍ത്തകന്‍ ചോദിക്കുകയും ചെയ്തു. എന്നാല്‍ പ്രധാനമന്ത്രിക്ക് കത്തെഴുതുന്നത്, ഉത്തരവാദിത്വത്തോടെ ഇതിലിടപെടുമെന്ന് പ്രതീക്ഷിച്ചാണെന്നാണ് മുഖ്യമന്ത്രി പറഞ്ഞത്. പ്രധാനമന്ത്രി എന്നത് ഭരണഘടനാ സ്ഥാനമാണ്. പ്രധാനമന്ത്രിയുടെ ബാദ്ധ്യതയെന്നത് ഇത്തരം വഴിവിട്ട നീക്കങ്ങളെ സംരക്ഷിക്കലല്ല, നിയന്ത്രിക്കലാണ്. അതുകൊണ്ട് കേരളത്തിലെ അനുഭവം ഞാന്‍ അദ്ദേഹത്തിന്റെ ശ്രദ്ധയില്‍ പെടുത്താന്‍ പോകുന്നു. ഇതിലദ്ദേഹം ഇടപെടുമെന്നാണ് പ്രതീക്ഷയെന്നുമാണ് മുഖ്യമന്ത്രി പറഞ്ഞത്.

തന്റെ അഡിഷണല്‍ പ്രൈവറ്റ് സെക്രട്ടറി സി.എം.രവീന്ദ്രനെതിരായ ആക്ഷേപങ്ങളില്‍ തെളിവുകളുടെ അടിസ്ഥാനത്തില്‍ ഇ.ഡിക്കും മറ്റും ഒന്നും ചെയ്യാനാവില്ലെന്നാണ് മുഖ്യമന്ത്രി തുറന്നടിച്ചത്. മജിസ്‌ട്രേട്ടിന് നല്‍കിയ രഹസ്യമൊഴി പോലും ചിലര്‍ പത്രസമ്മേളനം നടത്തി വിളിച്ചുപറയുന്നു. ഇതൊക്കെ കണ്ട് അത്തരം ഏജന്‍സികളെ അങ്ങനെ മേയാന്‍ വിടണോ എന്നാണ് ആലോചിച്ചത്. ബി.ജെ.പിക്ക് തെരഞ്ഞെടുപ്പില്‍ നേട്ടമുണ്ടാക്കുന്ന ജോലി അന്വേഷണ ഏജന്‍സികള്‍ ഏറ്റെടുക്കേണ്ട. അന്വേഷണം കാണിച്ച് സര്‍ക്കാരിനെ അട്ടിമറിക്കാമെന്ന പൂതി മനസില്‍ തന്നെ കിടക്കട്ടെ. കമ്മ്യൂണിസ്റ്റുകാര്‍ ജയിലറയും മര്‍ദ്ദനങ്ങളും ഏറെ കണ്ടതാണ്. കിരാത നിയമങ്ങളും മറ്റും കൊണ്ട് സര്‍ക്കാരിനെ ദുര്‍ബലപ്പെടുത്താമെന്ന് ആരും കരുതേണ്ടെന്നും മുഖ്യമന്ത്രി കണ്ണൂരില്‍ വാര്‍ത്താ സമ്മേളനത്തില്‍ പറഞ്ഞു.

ഒഞ്ചിയത്തെ, സി.പി.എമ്മിനോട് തെറ്റിപ്പിരിഞ്ഞ ഒരു വിഭാഗം രാഷ്ട്രീയവിരോധം വച്ച് ഒരുപാട് ആരോപണങ്ങള്‍ കെട്ടിച്ചമയ്ക്കുന്നുണ്ട്. അതിലൊന്നാണ് രവീന്ദ്രനെതിരെയുള്ളതും. അവിടെ കാണുന്ന കെട്ടിടവും ഹോട്ടലും സ്ഥാപനവുമെല്ലാം രവിയുടേതാണെന്ന് പറഞ്ഞുകൊണ്ടിരിക്കും. അതുകൊണ്ട് അത് രവിയുടേതാവണമെന്നില്ലല്ലോ. അന്വേഷണത്തില്‍ രവീന്ദ്രന് ഭയപ്പാടുണ്ടെന്ന് തോന്നുന്നില്ല.

അഴിമതിക്കാര്‍ക്കെതിരെയാണ് കേസെന്നാണ് ബി.ജെ.പി പറയുന്നത്. എന്നാല്‍ അവരുടെ പാര്‍ട്ടിയില്‍ എത്തിയാല്‍ ആര്‍ക്കെതിരെയും കേസെടുക്കില്ല. അഴിമതിയില്ലാത്ത, കാര്യക്ഷമതയുള്ള സര്‍ക്കാരിനെ അട്ടിമറിക്കാനുള്ള നീക്കം വ്യാമോഹം മാത്രമാണ്.

തെരഞ്ഞെടുപ്പില്‍ ഇടതു മുന്നേറ്റമുണ്ടാവുംഅപവാദ പ്രചാരണങ്ങളെ മറികടന്ന് ഇടതുമുന്നണി തദ്ദേശ തിരഞ്ഞെടുപ്പില്‍ വലിയ മുന്നേറ്റം നടത്തും. സര്‍ക്കാരില്‍ ജനം അര്‍പ്പിച്ച വിശ്വാസത്തെ കാത്തുസൂക്ഷിക്കും. നിരവധി ജനക്ഷേമ പ്രവര്‍ത്തനങ്ങളാണ് സര്‍ക്കാര്‍ നടത്തിയത്. നടക്കില്ലെന്ന് കരുതിയ പല വികസന പ്രവര്‍ത്തനങ്ങളും പൂര്‍ത്തിയാക്കാനും ഏറ്റെടുക്കാനും കഴിഞ്ഞു. ഗെയില്‍ പൈപ്പ് ലൈന്‍ പദ്ധതി, കൊച്ചി ഇടമണ്‍ പദ്ധതി എന്നിവ പൂര്‍ത്തിയാക്കാനും കൊച്ചി കോയമ്പത്തൂര്‍ വ്യാവസായിക ഇടനാഴി പോലുള്ളവ ഏറ്റെടുക്കാനുമായി. വീടില്ലാത്ത ലക്ഷക്കണക്കിന് പേര്‍ക്ക് വീട് നിര്‍മ്മിച്ചു നല്‍കി. സാധാരണക്കാരന്റെ വിഷമം മനസിലാക്കിയാണ് മുന്നോട്ട് പോകുന്നത്. അത്തരമൊരു സര്‍ക്കാരിനല്ലാതെ, അധികാരം കിട്ടിയാല്‍ ലൈഫ് പദ്ധതി നിറുത്തുമെന്ന് പറഞ്ഞവര്‍ക്ക് ജനം വോട്ട് ചെയ്യില്ലെന്നും മുഖ്യമന്ത്രി പറഞ്ഞു.