ഇന്ത്യന്‍ ജനത ഒരേ മനസോടെ ഒരേ വികാരത്തോടെ ആരാധിക്കുന്ന വ്യക്തിയാണ് മുന്‍ രാഷ്ട്രപതിയും ശാസ്ത്രജ്ഞനുമായിരുന്ന എപിജെ അബ്ദുള്‍കലാം. സാധാരണക്കാരോടുള്ള അദ്ദേഹത്തിന്റെ ലാളിത്യമാര്‍ന്ന പെരുമാറ്റം പലപ്പോഴും ഏറെ പ്രശംസ പിടിച്ചുപറ്റാറുണ്ട്. ഇന്ത്യയുടെ പലവിധ ഭാഗങ്ങളിൽ അബ്ദുള്‍ കലാമിന്റെ ഓര്‍മക്കായി പ്രതിമകള്‍ സ്ഥാപിച്ചിട്ടുണ്ട്. എന്നാല്‍ കൊച്ചിയിലെ മറൈന്‍ ഡ്രൈവില്‍ പ്രതിമയ്ക്ക് മറ്റെല്ലാ പ്രതിമകളെക്കാളും ഒരു പ്രത്യേകതയുണ്ട്. എല്ലാ ദിവസവും പൂക്കള്‍ കൊണ്ട് അലങ്കരിച്ച്‌ മനോഹരമാക്കുന്നതാണ് ഇവിടം.

തെരുവില്‍ കഴിയുന്ന ശിവദാസന്‍ എന്ന വ്യക്തിയാണ് ഇതിന് പിന്നില്‍. പണ്ട് അബ്ദുള്‍ കലാമിനെ നേരിട്ടു കണ്ടപ്പോള്‍ അദ്ദേഹം ചെയ്തു തന്ന സഹായത്തില്‍ മനം നിറഞ്ഞാണ് ശിവദാസന്‍ ഒരു പ്രാര്‍ത്ഥന പോലെ മുടക്കം വരുത്താതെ ഈ പ്രതിമ പൂക്കൾ കൊണ്ട് അലങ്കരിക്കുന്നത്.

മറൈന്‍ ഡ്രൈവില്‍ നടക്കാനിറങ്ങിയ ആര്‍ജെ ആദര്‍ശ് പങ്കുവെച്ച വീഡിയോ ആണ് ഇപ്പോൾ സമൂഹമാധ്യമങ്ങളിൽ വൈറലാകുന്നത്. ശിവദാസന് സ്വന്തമായി വീട് ഇല്ല. മറൈന്‍ ഡ്രൈവില്‍ തന്നെയാണ് രാത്രി തങ്ങുന്നത്. അദ്ദേഹമാണ് എല്ലാ ദിവസവും രാവിലെ പോയി പൂക്കളൊക്കെ ശേഖരിച്ച് ‌ മനോഹരമായി പ്രതിമ അലങ്കരിക്കുന്നത്. മഴയായാലും വെയിലായാലും കാറ്റായാലും ഇത് മുടക്കം വരുത്താറില്ല എന്നാണ് അദ്ദേഹം പറയുന്നത് തന്നെ.

2015 മുതൽ ഇവിടെ തന്നെയാണ്. അന്നു മുതല്‍ ഞാനിത് ചെയ്യുന്നുണ്ട്. അബ്ദുള്‍ കലാം സാറിനെ ഞാന്‍ രണ്ട് പ്രാവശ്യമാണ് നേരിട്ട് കണ്ടിട്ടുള്ളത്. ആശ്രമം മൈതാനത്ത് വച്ച്‌ കൊല്ലത്തുവെച്ചും തിരുവനന്തപുരം സ്റ്റേഡിയല്‍ വച്ചുമാണ് കണ്ടിട്ടുള്ളത്. സ്റ്റേഡിയത്തില്‍ വച്ചു കണ്ടപ്പോള്‍ സാറ് 500 രൂപ എന്റെ പോക്കറ്റില്‍വച്ചു തന്നിട്ട് പറഞ്ഞു വണ്ടിക്കൂലിക്ക് എടുത്തോളാന്‍. ആ ഒരു നന്ദി ഞാന്‍ കാണിക്കുന്നതാണ് - എന്ന് ശിവദാസൻ പറയുകയുണ്ടായി.

സമൂഹമാധ്യമങ്ങളുടെ മനം കവരുകയാണ് ശിവദാസന്റെ വിഡിയോ. ശിവദാസന്റെ പ്രവൃത്തിയെ പ്രശംസിച്ച്‌ നിരവധി സിനിമാ താരങ്ങള്‍ ഉള്‍പ്പടെയുള്ളവർ രംഗത്തെത്തി. നടന്‍ ജയറാം ഉള്‍പ്പടെ നിരവധി പേരാണ് ഈ വിഡിയോ പങ്കുവെച്ചിരിക്കുന്നത്.