ഇപ്പോള്‍ ശബരിമല വളരെ ശാന്തമാണ്. ഒരു യുവതികള്‍ക്കും ശബരിമലയില്‍ കയറുകയും വേണ്ട ആര്‍ക്കും കയറ്റുകയും വേണ്ട. യുവതികളെ ശബരിമലയില്‍ കയറ്റാന്‍ ശ്രമിച്ചവരൊക്കെ അനുഭവിച്ച് ചീട്ട് വാങ്ങി ജനങ്ങളാകെ പരാജയപ്പെടുത്തിയതോടെ വീണ്ടും ആ വിഷയത്തിന് താത്പര്യമില്ല. ഇനിയും ശബരിമലയില്‍ കയറിപ്പിടിച്ച് വരുന്ന നിയമസഭാ തെരഞ്ഞെടുപ്പില്‍ എല്ലാം നഷ്ടപ്പെടാന്‍ പാര്‍ട്ടിയും ആഗ്രഹിക്കുന്നില്ല. അതിനാല്‍ തന്നെ തടയാനായി കര്‍മ്മസമിതി പ്രവര്‍ത്തകരും ഭക്തരും മുന്നോട്ട് വരേണ്ട കാര്യവുമില്ല. കോവിഡ് കാലമായതിനാല്‍ വളരെ കുറച്ച് പേരാണ് ശബരിമലയില്‍ കയറുന്നത്.

ഇങ്ങനെ ശബരിമല തികച്ചും ശാന്തമായ സമയത്തും ആദ്യം ശബരിമലയില്‍ കയറിയ ബിന്ദു അമ്മിണി വാര്‍ത്തകളില്‍ നിറയുകയാണ്. ഒരു പോസ്റ്ററാണ് ഇപ്പോള്‍ വിവാദമായിരിക്കുന്നത്.

ശബരിമല സംഭവം വിഷയമാക്കിയ ഈ പോസ്റ്റര്‍ സ്ത്രീവിരുദ്ധമെന്ന് ആക്ടിവിസ്റ്റ് ബിന്ദു അമ്മിണി പറയുന്നത്. താന്‍ കണ്ട പോസ്റ്റര്‍ ഫേസ്ബുക്ക് പോസ്റ്റിലൂടെ പങ്കുവച്ചുകൊണ്ടാണ് അവര്‍ ഇക്കാര്യം പറഞ്ഞത്. 'വേദാന്ത പൊരുളായ അയ്യപ്പന്റെ സന്നിധാനം ഇരുട്ടിന്റെ മറവില്‍ എത്തിച്ച് കളങ്കപ്പെടുത്തിയ .... കാട്ടാളന്‍മാര്‍ക്കുള്ള മറുപടിയാകട്ടെ നിങ്ങളുടെ ഓരോ വോട്ടും' എന്നതാണ് ആ പോസ്റ്റര്‍. സ്ത്രീവിരുദ്ധത മാത്രം മുന്നോട്ടുവയ്ക്കുന്നവരെ പ്രബുദ്ധരായ ജനങ്ങള്‍ പിന്തുണയ്ക്കുമെന്നു വിചാരിക്കേണ്ടെന്നും അഭിമാനികളായ സ്ത്രീകളെ അപമാനിക്കാനും ഇനിയാകില്ലെന്നും അവര്‍ തന്റെ ഫേസ്ബുക്ക് കുറിപ്പിലൂടെ പറയുന്നു. പോസ്റ്റര്‍ പതിച്ചത് സംഘപരിവാര്‍ തന്നെ ആവണമെന്നില്ലെന്നും അത് ചെയ്തത് കോണ്‍ഗ്രസും ആവാമെന്നും അവര്‍ ആരോപിക്കുന്നുണ്ട്. ഒപ്പം തനിക്ക് നല്‍കിയിരുന്ന പൊലീസ് സുരക്ഷ പിന്‍വലിച്ചുവെന്നും ബിന്ദു അമ്മിണി കുറിപ്പില്‍ പറയുന്നു.

ബിന്ദു അമ്മിണിയുടെ കുറുപ്പ് ഇങ്ങനേയാണ്

'എന്റെ പ്രദേശത്ത് പതിപ്പിച്ചിട്ടുളള പോസ്റ്ററാണ്. ഇരുട്ടിന്റെ മറവില്‍ ഐഡന്റിറ്റി വെളിപ്പെടുത്താതെ ഈ പോസ്റ്റര്‍ പതിച്ചത് സംഘ പരിവാര്‍ തന്നെ ആവണമെന്നില്ല, കോണ്‍ഗ്രസ്സും ആവാം. ആരായാലും സ്ത്രീവിരുദ്ധത മാത്രം മുന്നോട്ടുവയ്ക്കുന്നവരെ പ്രബുദ്ധരായ ജനങ്ങള്‍ പിന്തുണയ്ക്കുമെന്നു വിചാരിക്കേണ്ട.

ഈ കേരളത്തില്‍ മാറുമറയ്ക്കാന്‍ സമരം നടത്തി വിജയിച്ചവരാണ് , മീശ വയ്ക്കാന്‍ സമരം നടത്തേണ്ടി വന്നവരാണ്, വഴി നടക്കാന്‍, ക്ഷേത്രങ്ങളില്‍ പ്രവേശിക്കാന്‍ ഇതൊന്നും ആരുടേയും ഔദാര്യമല്ല. അവകാശപ്പോരാട്ടത്തിലൂടെ നേടിയതാണ്. നമ്പൂതിരിയുടെ കിടപ്പറയിലേക്ക് ഭാര്യയേയും പെങ്ങളേയും തള്ളിവിട്ട് കാവല്‍ നിന്നവര്‍ക്ക് വീണ്ടും ആ സംസ്‌കാരം തിരികെപ്പിടിയ്ക്കാന്‍ പൂതിയുണ്ടാവും. അവരാണ് അഭിസാരകന്‍മാര്‍.

സ്ത്രീയെ വിറ്റ് ജീവിച്ചവര്‍ ഇത്തരത്തിലുള്ള പോസ്റ്ററുകള്‍ ഇറക്കും. എന്നാല്‍ അഭിമാനികളായ സ്ത്രീകളെ ചൂഷണം ചെയ്യാനും അപമാനിക്കാനും ഇനിയാവില്ല. സ്ത്രീത്വത്തെ അപമാനിക്കുന്നവര്‍ക്കെതിരെ, ജാതി വെറി തിരികെ കൊണ്ടുവരുന്നതിനെതിരെ, ആദിവാസികളും, ദളിതരും, മതന്യൂനപക്ഷങ്ങളും , സ്ത്രീകളും ഒറ്റക്കെട്ടായ് സംഘ പരിവാറിനെതിരെ വോട്ടു ചെയ്യും, സംഘപരിവാറിന് ഒത്താശ ചെയ്യുന്ന കോണ്‍ഗ്രസ്സ് വലത് കക്ഷികള്‍ക്കെതിരെ വോട്ട് ചെയ്യും.എന്റെ വോട്ട് സംഘ പരിവാറിനെതിരെ.

എന്‍.ബി: സംഘപരിവാരത്തിന് ഒത്താശ ചെയ്തു കൊണ്ട് ഇന്ന് 2 മണിയ്ക്ക് എനിക്ക് നല്കിയ പോലീസ് സുരക്ഷ വീണ്ടും പിന്‍വലിച്ചു. സുപ്രീം കോടതി വിധിയ്ക്ക് പുല്ലുവില.'