5 ലക്ഷം കൊണ്ട് 5 കോടിയുടെ പരസ്യം ഉണ്ടാക്കുന്ന മാന്ത്രികവിദ്യ പല മുതലാളിമാരും ചെയ്യുന്നതാണ്. അത് പലപ്പോഴും ഫലം കാണുകയും അദ്ദേഹത്തെ മഹാനായി പ്രഖ്യാപിക്കുകയും ചെയ്യുന്നതാണ്. എന്നാല്‍ ബോബി ചെമ്മണ്ണൂരിനെ സംബന്ധിച്ച് അതുണ്ടായില്ലെന്ന് മാത്രമല്ല നെഗറ്റീവ് പബ്ലിസിറ്റി ഉണ്ടാക്കുകയും ചെയ്തു. മലപ്പുറം കത്തി, മെഷീന്‍ ഗണ്ണ്, ഉലക്കേടമൂട് എന്നിവയുമായാണ് ആരു പറഞ്ഞിട്ടും കോള്‍ക്കാത്ത വസന്തയെ കീഴടക്കാന്‍ ബോബി ചെമ്മണ്ണൂര്‍ ഒരു മീന്‍ കുഞ്ഞും അറിയാതെ നെയ്യാറ്റിന്‍കരയില്‍ എത്തുന്നത്.

ഉച്ചകഴിഞ്ഞപ്പോള്‍ പത്രക്കാരുടെ ഗ്രൂപ്പില്‍ ഒരു മെസേജ് വന്നു. ബോബി ചെമ്മണ്ണൂര്‍ വിവാദ ഭൂമി വാങ്ങി കുട്ടികള്‍ക്ക് നല്‍കുന്നൂന്ന്. എല്ലാവരും കവര്‍ ചെയ്യാന്‍ എത്തണം. നല്ല കാര്യം. ആ മഹാമനസിന് കോടി പ്രമാണം. അതിനിടെ ചില പത്രക്കാര്‍ ചര്‍ച്ച തുടങ്ങി കോടതിയിലിരിക്കുന്ന തര്‍ക്കഭൂമി വിലയ്ക്ക് വാങ്ങാന്‍ പറ്റുമോ. തര്‍ക്കം നടക്കുന്നതിനിടെ ബോബി ചെമ്മണ്ണൂര്‍ അമ്മച്ചിയില്‍ നിന്നും എഗ്രിമെന്റ് വാങ്ങുന്ന ഫോട്ടോ വന്നു. അവസാനം ചാനലുകാരുടെ സാന്നിധ്യത്തില്‍ അഭിമാനത്തോടെ എഗ്രിമെന്റ് കുട്ടികള്‍ക്ക് നല്‍കാനായെത്തി. അവിടെയാണ് മുതലാളി തകര്‍ന്ന് പോയത്. പിള്ളേരോടാണോ കളി എന്നപോലെ അവരത് വാങ്ങിയില്ല. അതോടെ ബോബി ചെമ്മണ്ണൂരെന്ന വലിയ സ്വര്‍ണ മുതലാളി ലൈവായി ശൂ ആയിപ്പോയി. ചാനലുകാര്‍ക്കാര്‍ക്കെല്ലാം ചിരിപൊട്ടി. പക്ഷെ വലിയ പരസ്യക്കാനായ മുതലാളിയെ പിണക്കിയാല്‍ ചാനലുകാരുടെ മുതലാളികള്‍ ഇടയും. അതിനാല്‍ എല്ലാവരും നല്ലവനായ മുതലാളിക്ക് വേദനയുണ്ടാക്കാത്ത രീതിയില്‍ ലൈറ്റായാണ് വാര്‍ത്ത നല്‍കിയത്. എന്തായാലും സോഷ്യല്‍ മീഡിയക്കാര്‍ക്ക് മുതലാളിമാരില്ലാത്തതിനാല്‍ ബോബിയുടെ ചമ്മല്‍ ആഘോഷിക്കുകയാണ്.

പൊലീസ് വീട് ഒഴിപ്പിക്കുന്നതിനിടെ തീകൊളുത്തി ആത്മഹത്യ ചെയ്ത ദമ്പതികളുടെ മക്കള്‍ക്ക് വേണ്ടി ബോബി ഫാന്‍സ് ചാരിറ്റബിള്‍ ട്രസ്റ്റ് വാങ്ങി നല്‍കാമെന്ന് വാഗ്ദാനം ചെയ്ത വസ്തുവും വീടുമാണ് രാജന്റെ മക്കള്‍ തിരസ്‌കരിച്ചു.

അയല്‍വാസി വസന്ത സ്വന്തമെന്ന് അവകാശപ്പെടുന്ന രാജന്റെ വീട് ഉള്‍പ്പെടുന്ന വസ്തുവിന്റെ രേഖകള്‍ അവര്‍ വ്യാജമായി നിര്‍മ്മിച്ചതാണെന്നും അതു വിലകൊടുത്ത് വാങ്ങിയാല്‍ നിലനില്‍ക്കില്ലെന്നും ചൂണ്ടിക്കാട്ടിയാണ് ബോബി ചെമ്മണ്ണൂരിന്റെ വാഗ്ദാനം കുട്ടികള്‍ നിരാകരിച്ചത്. കോളനി ഭൂമി സര്‍ക്കാര്‍ വക വസ്തു ആയതിനാല്‍ സര്‍ക്കാര്‍ നല്‍കുന്ന പട്ടയത്തിന് മാത്രമേ നിയമ സാധുത ഉണ്ടാവുകയുള്ളു.

രാജനെയും ഭാര്യ അമ്പിളിയെയും അടക്കം ചെയ്ത നാല് സെന്റ് വസ്തു മക്കള്‍ക്ക് പതിച്ച് നല്‍കി പട്ടയം കൊടുക്കാമെന്നും അവിടെ വീടുവച്ച് നല്‍കാമെന്നും സര്‍ക്കാര്‍ വാഗ്ദാനം ചെയ്തിട്ടുണ്ട്. ഇന്നലെ ഉച്ചക്ക് അഭിഭാഷകനോടൊപ്പം പൊങ്ങില്‍ എത്തിയ ബോബി ചെമ്മണ്ണൂരും സംഘവും വസന്തയുടെ വീട്ടില്‍ എത്തി രാജന്റെ വീട് ഉള്‍പ്പെടുന്ന നാല് സെന്റ് വസ്തു വാങ്ങുന്നതിനായി അഡ്വാന്‍സ് നല്‍കി കരാര്‍ ഒപ്പിട്ട് അതുമായാണ് രാജന്റെ മക്കളെ കാണാനെത്തിയത്. സഹായ വാഗ്ദാനങ്ങള്‍ക്ക് നന്ദി പറഞ്ഞ രാജന്റെ മക്കള്‍, വസ്തു കൈമാറാന്‍ നിയമമില്ലെന്നിരിക്കെ വസന്ത സ്വന്തമാക്കിയ വ്യാജ പട്ടയത്തിന്മേലുള്ള കരാര്‍ നടപടികളിലൂടെ ബോബി ചെമ്മണ്ണൂരും കബളിക്കപ്പെട്ടെന്നും അഡ്വാന്‍സ് നല്‍കിയ തുക തിരികെ വാങ്ങി മറ്റ് ജീവകാരുണ്യ പ്രവര്‍ത്തനങ്ങള്‍ക്ക് ഉപയോഗപ്പെടുത്തണമെന്നും പറഞ്ഞു.

വസന്ത തെറ്റിദ്ധരിപ്പിച്ചതാണെങ്കില്‍ അതിനെതിരെ നിയമ നടപടികളുമായി മുന്നോട്ട് പോകുമെന്നായിരുന്നു ബോബി ചെമ്മണ്ണൂരിന്റെ പ്രതികരണം. രാജന്റെ മക്കളായ രാഹുലിനെയും രഞ്ജിത്തിനെയും തൃശൂര്‍ ശോഭ സിറ്റിയിലേക്ക് കൂട്ടിക്കൊണ്ടുപോകാനും സഹായം നല്‍കാനും ബോബി ചെമ്മണ്ണൂര്‍ സന്നദ്ധത പ്രകടിപ്പിച്ചു. എന്തായാലും പിള്ളേരല്ലേ ആള് തത്ക്കാലം എല്ലാം സ്‌നേഹപൂര്‍വം നിരസിച്ചു. അതോടെ മുതലാളി സ്വന്തം വണ്ടിയില്‍ സ്ഥലംവിട്ടു.