കഞ്ഞിക്കുഴിയില്‍ നിയന്ത്രണം വിട്ട കാറും ബൈക്കും കൂട്ടിയിടിച്ച് ചുങ്കം സ്വദേശി മരിച്ചു. ഒപ്പമുണ്ടായിരുന്ന സുഹൃത്തിന് ഗുരുതരമായി പരിക്കേറ്റു. ചുങ്കം സ്വദേശിയായ തോമസ് പുന്നൂസ്(23) മരിക്കുകയും ഇയാള്‍ക്ക് ഒപ്പമുണ്ടായിരുന്ന സുഹൃത്ത കഞ്ഞിക്കുഴി മുട്ടമ്പലം നടുപ്പറമ്പില്‍ കിരണ്‍ മനോജിന് പരിക്കേല്‍ക്കുകയും ചെയ്തു.

പരിക്കേറ്റയാളെ കോട്ടയം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ഞായറാഴച്ച രാത്രി പത്ത് മണിയോടെ കഞ്ഞിക്കുഴി ജംഗ്ഷനിലെ പെട്രോള്‍ പമ്പിന് മുന്നിലായിരുന്നു അപകടം. കളക്ടറേറ്റ് ഭാഗത്ത് നിന്നും ഭക്ഷണം കഴിക്കുന്നതിനായാണ് ഇരുവരും ബൈക്കില്‍ കഞ്ഞിക്കുഴി ജംഗ്ഷനില്‍ എത്തിയത്.

കഞ്ഞിക്കുഴി പെട്രോള്‍ പമ്പിന് സമീപത്ത് വച്ച് റോഡിന്റെ മധ്യഭാഗത്ത് ഇവര്‍ സഞ്ചരിച്ചിരുന്ന ബൈക്കും എതിര്‍ ദിശയില്‍ നിന്നും കാറും തമ്മില്‍ കൂട്ടിയിടിക്കുകയായിരുന്നു. തുടര്‍ന്ന് റോഡില്‍ തെറിച്ച് വീണ ഇരുവരെയും പൊലീസ് കണ്‍ട്രോള്‍ റൂമിന്റെ വാഹനത്തിലാണ് ജില്ലാ ജനറല്‍ ആശുപത്രിയിലെത്തിച്ചത്.

ഇവിടെ എത്തിച്ചപ്പോഴും തോമസിന് മരണം സംഭവിച്ചിരുന്നു. ഒപ്പമുണ്ടായിരുന്ന സുഹൃത്തിനെ ഗുരുതര പരിക്കുകളോടെ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ഇയാളുടെ പരിക്ക് ഗുരുതരമാണെന്നാണ് സൂചന. അപകടത്തെ തുടര്‍ന്ന് കെ.കെ റോഡില്‍ ഇരുപത് മിനിട്ടോളം ഗതാഗതം സ്തംഭിച്ചു.

മൃതദേഹം ജില്ലാ ജനറല്‍ ആശുപത്രിയില്‍ സൂക്ഷിച്ചിരിക്കുകയാണ്. അപകടത്തെ തുടര്‍ന്നുണ്ടായ രക്തവും ശരീരവശിഷ്ടങ്ങളും റോഡില്‍ കിടക്കുകയാണ്.