നെയ്യാർ ഡാമിൽ കുളിക്കാനിറങ്ങിയ യുവതിയെ ജലസംഭരണിയിൽ മരിച്ച നിലയിൽ കണ്ടെത്തി. പന്ത കാഞ്ചിമൂട് സ്വദേശി നിതിന്റെ ഭാര്യ 24 വയസ്സുള്ള സിമിയാണ് മരിച്ചത്. ഇന്നലെ ഉച്ചയ്ക്ക് 12 മണിയോടെയായിരുന്നു സംഭവം. ഭർത്താവ് നിതിനൊപ്പമാണ് സിമി കുളിക്കാനായി എത്തിയത്. കുളിക്കുന്നതിനിടെ സോപ്പ് എടുക്കാൻ മറന്നതിനാൽ നിതിൻ തിരികെ വീട്ടിലേക്ക് പോയ സമയത്താണ് അപകടം നടന്നത്. പത്ത് മിനിറ്റിനുള്ളിൽ നിതിൻ തിരിച്ചെത്തിയപ്പോൾ സിമിയെ കാണാനില്ലായിരുന്നു. തുടർന്ന് നടത്തിയ തിരച്ചിലിലാണ് ജലസംഭരണിയിൽ വീണുകിടക്കുന്ന നിലയിൽ സിമിയെ കണ്ടെത്തിയത്. ഉടൻ തന്നെ കാട്ടാക്കടയിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

സംഭവത്തിൽ നെയ്യാർ ഡാം പോലീസ് അന്വേഷണം ആരംഭിച്ചു. നിലവിൽ അസ്വാഭാവിക മരണത്തിനാണ് കേസ് രജിസ്റ്റർ ചെയ്തിരിക്കുന്നത്. മരണത്തിൽ ദുരൂഹതയുണ്ടോ എന്ന് പോലീസ് പരിശോധിച്ചുവരികയാണ്. പോസ്റ്റ്മോർട്ടം റിപ്പോർട്ട് ലഭിച്ചാലുടൻ മരണകാരണത്തിൽ കൂടുതൽ വ്യക്തത വരുമെന്ന് അധികൃതർ അറിയിച്ചു.