സംസ്ഥാന പാതയില്‍ ലോറി തട്ടി താഴ്ന്നു കിടന്ന വൈദ്യുതി സ്റ്റേ വയര്‍ കഴുത്തില്‍ കുടുങ്ങിയ ബൈക്ക് യാത്രക്കാരന്‍ രക്ഷപ്പെട്ടത് അത്ഭുതകരമായി
സംസ്ഥാന പാതയില്‍ ലോറി തട്ടി താഴ്ന്നു കിടന്ന വൈദ്യുതി സ്റ്റേ വയര്‍ കഴുത്തില്‍ കുടുങ്ങിയ ബൈക്ക് യാത്രക്കാരന്‍ അത്ഭുതകരമായി രക്ഷപെട്ടു.
തിരുവട്ടൂര്‍ സ്വദേശിയായ ഇസ്മായില്‍ എന്ന യുവാവിനാണ് ഇന്നലെ രാവിലെ കപ്പാലം തങ്ങള്‍ പള്ളിക്ക് സമീപം കഴുത്തില്‍ വയര്‍ കുടുങ്ങി പരുക്കേറ്റത്. ഇതിന് മുന്‍പ് ഇതുവഴി കടന്ന് പോയ ലോറി തട്ടിയാണത്രെ വയര്‍ പൊട്ടിയത്. ഇത് ഉയര്‍ത്തി വെക്കുകയോ അധികൃതരെ വിവരമറിയിക്കുകയോ ചെയ്യുന്നതിന് പകരം തിരക്കേറിയ സംസ്ഥാന പാതയോരത്തുള്ള വൈദ്യുതി തൂണില്‍ ഇത് താഴ്ത്തി കെട്ടി ലോറി ജീവനക്കാര്‍ സ്ഥലം വിടുകയായിരുന്നു.
അല്‍പം കഴിഞ്ഞ് ഇസ്മായില്‍ ബൈക്കില്‍ എത്തിയപ്പോള്‍ പൊട്ടിയ വയര്‍ ടയറില്‍ കുടുങ്ങി ബൈക്ക് മറിയുകയും നിലത്ത് വീണ ഇസ്മയിലിന്റെ കഴുത്തില്‍ വയര്‍ കുടുങ്ങുകയുമായിരുന്നു.
ഓടിയെത്തിയ നാട്ടുകാര്‍ ഇസ്മായിലിന്റെ കഴുത്തില്‍ നിന്ന് വയര്‍ നീക്കുന്നതിനിടയില്‍ ഒരു ലോറിയും വയറിന് തട്ടി. ഇതോടെ കഴുത്തില്‍ മുറിവ് പറ്റുകയും ചെയ്തു.
തുടര്‍ന്ന് സ്വകാര്യ ആശുപത്രിയില്‍ ചികിത്സ തേടി. ഇതുവഴി നടന്ന് പോയ ഒരു യുവതിയും ഇതില്‍ തട്ടി വീണിരുന്നു. വിവരമറിഞ്ഞ് കെഎസ്ഇബി അധികൃതരെത്തിയാണ് വയര്‍ ഉയര്‍ത്തി കെട്ടിയത്.
"
https://www.facebook.com/Malayalivartha
