ചെത്തുകാരന്‍ പ്രയോഗത്തില്‍ കോണ്‍ഗ്രസ് അവസാനം കെ സുധാകരനൊപ്പം. മലക്കം മറിഞ്ഞ രമേശ് ചെന്നിത്തലയും ഷാനിമോള്‍ ഉസ്മാനും കെസി വേണുഗോപാലുമൊക്കെ അവസാനം സുധാകരനെ പിന്തുണച്ചിരിക്കുന്നു. അങ്ങനെ കണ്ണൂരിലെ കോണ്‍ഗ്രസ് നായകന്‍ സുധാകരണന്‍ സെല്‍ഫ് ഗോളടിച്ചു മുന്നേറുന്നു. മുഖ്യമന്ത്രി പിണറായി വിജയനെ ചെത്തുകാരന്‍ എന്ന് ജാതിപ്പേര് വിളിച്ചത് രാഷ്ട്രീയ കൊടുങ്കാറ്റാക്കി മുതലെടുക്കാനുള്ള സിപിഎം നീക്കത്തെ സുധാകരന്‍ ഒറ്റയ്ക്കു ചെറുക്കുകയാണ്. ചെത്തുകാരന്‍ എന്നത് മോശം ജാതിപ്പേരല്ലെന്നും താന്‍ പറഞ്ഞതില്‍ ഉറച്ചുനില്‍ക്കുന്നുവെന്നും സുധാകരന്‍ ഡല്‍ഹിയില്‍ ആവര്‍ത്തിക്കുക മാത്രമല്ല പഴയതിലും കടുത്ത നിലപാടിലേക്ക് മാറുകയും ചെയ്തിരിക്കുന്നു. പിണറായി വിജയന്‍ വിമര്‍ശനത്തിന് അതീതനല്ലെന്നും എക്കാലവും കോണ്‍ഗ്രസിന്റെ രാഷ്ട്രീയ ശത്രുവാണെന്നും സുധാകരന്‍ ആഞ്ഞിടിക്കുകയാണ്.

ഇക്കാര്യത്തില്‍ തന്റെ വീക്ഷണത്തെ എതിര്‍ത്തവര്‍ അവരുടെ അഭിപ്രായം പറഞ്ഞോട്ടെയെന്നും പിണറായിയെ നീതീകരിക്കാന്‍ തന്റെ രാഷ്ട്രീയം അനുവദിക്കില്ലെന്നും ഇദ്ദേഹം ആവര്‍ത്തിച്ചിരിക്കുകയാണ്.ഷാനിമോള്‍ ഉസ്മാനെയും രമ്യ ഹരിദാസിനെയും ലതിക സുഭാഷിനെയുമൊക്കെ സിപിഎം നേതാക്കള്‍ പെരുവഴിയില്‍ അപമാനവാക്കുകള്‍ക്കൊണ്ട് മൂടിയ അനുഭവങ്ങളെ ഏതെങ്കിലും സിപിഎം നേതാവ് അപലപിച്ചോ എന്ന മറുചോദ്യവുമായാണ് സുധാകരന്‍ വീണ്ടും രംഗത്തു വരുന്നത്.

തെങ്ങും പനയും ചെത്തി ചെത്തി ജീവിക്കുന്ന ആയിരക്കണക്കിന് പേരെ ചെത്തുകാരനെന്നും ഏറ്റക്കാരനെന്നും വിളിക്കുന്നത് കേരള നാട്ടിലെ സാധാരണ പദമാണെന്നും കുശവന്‍, കശാപ്പുകാരന്‍, തോട്ടി എന്നിവയൊന്നും ആക്ഷേപ പേരല്ലെന്നുമുള്ള നിര്‍വചനമാണ് സുധാകരന്‍ പറയുന്നത്. കേരള നിയമസഭയില്‍ മുന്‍പ് ഒരു എംഎല്‍എയെ പട്ടികജാതിക്കാരനെന്നു വിളിച്ച വിവാദസംഭവം വരെയുണ്ടായിട്ടുണ്ട്. ജാതിയും ജാതിപ്പേരും കേരളത്തില്‍ ഏറെ വിവാദങ്ങള്‍ക്ക് വഴി തെളിച്ചിട്ടുമുണ്ട്. എന്നാല്‍ ചെത്തുകാരന്‍ എന്ന പദത്തില്‍ യാതൊരു ആക്ഷേപവുമില്ലെന്നാണ് സുധാകരന്റെ പക്ഷം. സ്വാതന്ത്ര്യ സമര സേനാനികളെ വരെ അധിക്ഷേപിച്ച പാരമ്പര്യമാണ് പിണറായി വിജയന്റേതെന്നും ഒരിക്കല്‍പോലും അദ്ദേഹം അതൊന്നു തിരുത്താന്‍ തയാറായിട്ടില്ലെന്നും സുധാകരന്‍ ഡല്‍ഹിയില്‍ പറഞ്ഞു.

പരനാറി, നികൃഷ്ടജീവി, അഭിവന്ദ്യന്‍ തുടങ്ങിയ പിണറായിയുടെ പഴയ വിവാദ പരാമര്‍ശങ്ങള്‍ പുറത്തെടുത്ത് പ്രതിരോധിക്കാനുള്ള തന്ത്രമാണ് സുധാകരന്‍ മുന്നോട്ടുവയ്ക്കുന്നത്. അക്കാലങ്ങളിലൊന്നും പിണറായി മതനേതാക്കള്‍ക്കെതിരെ നടത്തിയ അധിക്ഷേപങ്ങള്‍ തിരുത്തുകയോ മാറ്റിപ്പറയുകയോ ചെയ്തിട്ടുമില്ല.കണ്ണൂര്‍ പോലൊരു ജില്ലയില്‍ എക്കാലവും സിപിഎമ്മിനെ വെല്ലുവിളിക്കുകയും ചെറുക്കുകയും ചെയ്തുപോരുന്ന സുധാകരന്റെ ശൈലിക്ക് മാറ്റമുണ്ടാകില്ല. ചെത്തുകാരന്‍ പരാമര്‍ശം തെറ്റായിപ്പോയെന്ന് കോണ്‍ഗ്രസിലെ ഒരു നിര ഗ്രൂപ്പുകാര്‍ നിലപാടെത്തുപ്പോള്‍ അവര്‍ക്ക് അവരുടെ പക്ഷം എന്നാണ് മറുപടി. മാത്രവുമല്ല വാക്കുകളുടെ കാര്യത്തില്‍ പിണറായി ആദരവ് അര്‍ഹിക്കുന്നില്ലെന്നും സുധാകരന്‍ ആവര്‍ത്തിച്ചു.സുധാകരനുണ്ടായ മനക്ലേശത്തില്‍ വിഷമിക്കുന്നതായും അദ്ദേഹത്തോട് ചോദിക്കാതെ ഇത്തരത്തില്‍ പ്രതികരിച്ചതില്‍ വീഴ്ചയുണ്ടായെന്നുമാണ് ഷാനിമോള്‍ ഉസ്മാന്‍ സോഷ്യല്‍ മീഡിയയില്‍ കുറിച്ചു. ചെത്തുകാരന്‍ ഒരു നാടന്‍ പ്രയോഗം മാത്രമായി കൂട്ടിയാല്‍ മതിയെന്നാണ് കെസി വേണുഗോപാല്‍ ഇന്നു പ്രതികരിച്ചത്.