സ്റ്റാറായി സുധാകരന്... സുധാകരന്റെ വിലയറിഞ്ഞ് കോണ്ഗ്രസ്; ഇനിയും സുധാകരനോട് കളിച്ചാല് പാളുമെന്ന് മനസിലാക്കിയ ഷാനിമോള് ക്ഷമ പറഞ്ഞ് തടിയൂരി; വിവാദത്തില് നിന്നും പുറത്ത് കടക്കാന് കോണ്ഗ്രസ് പരിശ്രമിക്കുമ്പോള് ആയുധമാക്കി സി.പി.എം
ഐശ്വര്യ കേരള യാത്രയുമായി ചെന്നിത്തലയാണ് ഷൈന് ചെയ്ത് തുടങ്ങിയതെങ്കിലും പൊടുന്നനെ കെ. സുധാകരന് സ്റ്റാറാകുന്ന കാഴ്ചയാണ് കാണാന് കഴിഞ്ഞത്. 'ചെത്തുകാരന്റെ മകന്' എന്ന പരാമര്ശത്തോടെ എല്ലാവരാലും ഒറ്റെപ്പെടുമെന്ന് കരുതിയ കെ. സുധാകരനെതിരെ എല്ലാവരും മാപ്പ് പറയുന്ന കാഴ്ചയാണ് കാണാന് കഴിഞ്ഞത്. വിവാദത്തിന് തുടക്കമിട്ട ഷാനിമോള് ഉസ്മാന് തിരുത്തലുമായി രംഗത്തെത്തി. സുധാകരനോട് ക്ഷമ ചോദിക്കുന്നെന്നും ഫോണില്പ്പോലും ബന്ധപ്പെടാതെ പെട്ടെന്ന് പ്രതികരിച്ചത് തന്റെ പിഴവാണെന്നും ഷാനിമോള് ഫേസ്ബുക്കില് കുറിച്ചു. മന്ത്രി ജു.സുധാകരന് തന്നെയും ലതികാ സുഭാഷിനെയും, വിജയരാഘവന് രമ്യാ ഹരിദാസ് എം.പിയെയും വ്യക്തിപരമായി അപമാനിച്ചത് മനസില് മായാതെ നില്ക്കുന്നുണ്ട്. കോണ്ഗ്രസില് നിന്ന് അത്തരത്തില് ആരും പ്രതികരിക്കരുതെന്ന് ആഗ്രഹിച്ചിരുന്നു. തന്റെ രാഷ്ട്രീയ പ്രവര്ത്തനങ്ങളില് ഏറെ പ്രോത്സാഹനം നല്കുകയും അരൂര് ഉപതിരഞ്ഞെടുപ്പില് വിജയത്തിനായി പ്രവര്ത്തിക്കുകയും ചെയ്ത സുധാകരനോട് മാപ്പു ചോദിക്കുന്നു.
ചെത്തുകാരന്റെ വീട്ടില് നിന്ന് വന്ന പിണറായിക്ക് മുഖ്യമന്ത്രിയെന്ന നിലയില് സഞ്ചരിക്കാന് ഹെലികോപ്ടര് വാടകയ്ക്കെടുത്തത് അഭിമാനിക്കാന് വക നല്കുന്നതല്ലെന്ന കെ.സുധാകരന് എം.പിയുടെ വിവാദ പരാമര്ശത്തെ പിന്തുണച്ച് കോണ്ഗ്രസിന് പുറമെ ബി.ജെ.പി രംഗത്ത് എത്തുകയും, മുഖ്യമന്ത്രിയെ ജാതീയമായി അധിക്ഷേപിച്ച സുധാകരനെയും അതിനെ കണ്ണടച്ച് പിന്താങ്ങിയവരെയും തുറന്നുകാട്ടാനുള്ള രാഷ്ട്രീയായുധമാക്കി മാറ്റാന് സി.പി.എം കരുക്കള് നീക്കുകയും ചെയ്തതോടെ വിവാദം നിയമസഭാ തിരഞ്ഞെടുപ്പ് ഗോദയിലേക്ക് എത്തിയിരിക്കുകയാണ്.
വിവാദം അവസാനിപ്പിച്ച് എത്രയുംവേഗം തലയൂരാനുള്ള തിടുക്കത്തിലായിരുന്നു കോണ്ഗ്രസ് നേതാക്കള് ഇന്നലെ. സുധാകരന്റെ വിമര്ശനം രാഷ്ട്രീയമാണെന്നും, അതില് ജാതിയില്ലെന്നും സ്ഥാപിക്കാനാണ് നീക്കം. സര്ക്കാരിന്റെ അഴിമതിയും ധൂര്ത്തും തുറന്നുകാട്ടി വിമര്ശനം ശക്തമാക്കേണ്ട ഘട്ടത്തില്, സ്വയം പ്രതിരോധത്തിലകപ്പെടുത്തുന്ന വിവാദം പാടില്ലെന്ന് കോണ്ഗ്രസ് നേതൃത്വം കരുതുന്നു. രാഷ്ട്രീയ ആരോപണങ്ങളില് നിന്ന് വിഷയം വഴിതിരിച്ചുവിടാനേ ഇതുപകരിക്കൂവെന്നും വിലയിരുത്തുന്നു.
വിവാദ പരാമര്ശത്തില് സുധാകരനോട് ഹൈക്കമാന്ഡ് വിശദീകരണം തേടിയിരുന്നു. ഒരു തൊഴിലാളി നേതാവിന്റെ ആഢംബര ഭ്രമത്തിനെതിരായ വിമര്ശനമാണ് താന് നടത്തിയതെന്ന സുധാകരന്റെ വിശദീകരണം മുഖവിലയ്ക്കെടുക്കാനാണ് തീരുമാനം. സുധാകരന് നടത്തിയത് നാടന് പ്രയോഗമാണെന്ന് എ.ഐ.സി.സി സംഘടനാ ജനറല് സെക്രട്ടറി കെ.സി. വേണുഗോപാല് പ്രതികരിച്ചത് ഈ പശ്ചാത്തലത്തിലാണ്.കെ. സുധാകരന്റെ പ്രസംഗത്തില് വിവാദം ക്ഷണിച്ചുവരുത്തിയത് ഷാനിമോള് ഉസ്മാന്റെ പെട്ടെന്നുണ്ടായ പ്രതികരണമാണെന്നാണ് കോണ്ഗ്രസിനകത്തെ ചര്ച്ച.
കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന് കോഴിക്കോട് ജില്ലയിലെ കൊടുവള്ളിയിലോ, കൊയിലാണ്ടിയിലോ സ്ഥാനാര്ത്ഥിയായേക്കും. ആ ഒഴിവിലേക്ക് കെ.പി.സി.സി ആക്ടിംഗ് പ്രസിഡന്റായി കെ. സുധാകരനെ പരിഗണിക്കാന് കോണ്ഗ്രസിനകത്ത് അനൗപചാരിക ധാരണയുണ്ട്. തെരഞ്ഞെടുപ്പ് വേളയില് അണികളെ ആവേശം കൊള്ളിക്കാന് സുധാകരന്റെ സാന്നിദ്ധ്യം ഉപകരിക്കുമെന്ന് ഹൈക്കമാന്ഡും കണക്കുകൂട്ടുന്നു.
അതേസമയം മുഖ്യമന്ത്രിക്കെതിരായ കെ.സുധാകരന്റെ അധിക്ഷേപത്തെ അനുകൂലിച്ച് ബി.ജെ.പി സംസ്ഥാന പ്രസിഡന്റ് കെ.സുരേന്ദ്രന് ഇന്നലെ രംഗത്തെത്തിയതും വിവാദം കൊഴുപ്പിച്ചു. ചെത്തുകാരന്റെ മകനെ അങ്ങനെ പറയുന്നത് എങ്ങനെ അധിക്ഷേപമാവുമെന്നും, മറ്റുള്ളവരെ അധിക്ഷേപിക്കുന്ന പിണറായി വിജയന്റെ ശൈലിയാണ് സുധാകരന്റേതെന്നുമായിരുന്നു സുരേന്ദ്രന്റെ ന്യായീകരണം.
സി.പി.എംഅതേസമയം,സുധാകരന്റെ ജാതീയ അധിക്ഷേപത്തില് കോണ്ഗ്രസ് നേതാക്കളുടെ മലക്കം മറിച്ചിലിന് പിന്നില്, താന് ബി.ജെ.പിയിലേക്ക് പോകുമെന്ന സുധാകരന്റെ ഭീഷണിയാണെന്നാണ് സി.പി.എമ്മിന്റെ ആരോപണം. ആര്.എസ്.എസിനോട് കെ.സുധാകരന് മൃദുസമീപനമാണെന്ന് ഇടതുമുന്നണി നേരത്തേ മുതല് ആക്ഷേപമുയര്ത്തുന്നുണ്ട്. സുധാകരനെ പിന്തുണച്ച് ബി.ജെ.പി നേതൃത്വവും രംഗത്തെത്തിയതും ഇതിന് തെളിവായി പാര്ട്ടി ചൂണ്ടിക്കാട്ടുന്നു.
https://www.facebook.com/Malayalivartha
