ഒരു തെറ്റും ചെയ്തിട്ടില്ല, ഇഡിക്ക് ഒന്നും ചെയ്യാന്‍ കഴിയില്ല എന്നു പറഞ്ഞ് ബംഗളുരുവിലേക്ക് വണ്ടി കയറിയ ബിനീഷ് കോടിയേരിയെ മൂന്ന് മാസമായിട്ടും പുറം ലോകം കാണാനേയായില്ല. കള്ളപ്പണം വെളുപ്പിക്കല്‍ കേസുമായി ബന്ധപ്പെട്ട് കഴിഞ്ഞ ഒക്‌േടാബര്‍ 29ന് അറസ്റ്റിലായ ബിനീഷ് ഇപ്പോഴും ബംഗളുരു പരപ്പന അഗ്രഹാര ജയിലിലാണ്. ഇനി എന്ന് പുറത്തിറങ്ങാന്‍ പറ്റുമെന്ന് ഒരു ധാരണയുമില്ല.

അതേസമയം ബിനീഷിനെതിരെ ഗുരുതര ആരോപണങ്ങളുമായി എന്‍ഫോഴ്‌സ്‌മെന്റ് ഡയറക്ടറേറ്റിന്റെ കുറ്റപത്രം. ലഹരിക്കടത്തു കേസില്‍ പിടിക്കപ്പെട്ട അനൂപ് മുഹമ്മദ്, റിജേഷ് രവീന്ദ്രന്‍ എന്നിവരുമായി ബിനീഷ് കോടിയേരി ബന്ധം സ്ഥാപിച്ചതും പണം നല്‍കി സഹായിച്ചതും കള്ളപ്പണം വെളുപ്പിക്കാനായാണെന്ന് ഇ.ഡി. കണ്ടെത്തി. ബിനീഷിന്റെ ബിനാമിയാണ് അനൂപ് മുഹമ്മദെന്ന് ഇ.ഡി. നേരത്തേ കോടതിയെ അറിയിച്ചിരുന്നു.

കേരള സര്‍ക്കാരിലുള്ള വിപുലമായ സ്വാധീനമുപയോഗിച്ച് വിവിധ കരാറുകള്‍ തരപ്പെടുത്താന്‍ കഴിയുമെന്നു പലരോടും അവകാശപ്പെടുകയും കമ്മീഷന്‍ പറ്റുകയും ചെയ്തു. മൂന്നു മുതല്‍ നാലു വരെ ശതമാനം കമ്മീഷന്‍ വാഗ്ദാനം ചെയ്തിരുന്നെന്ന ചിലരുടെ മൊഴികള്‍ കുറ്റപത്രത്തിലുണ്ട്.

ഏഴു വര്‍ഷത്തിനിടെ ബിനീഷ് 5.17 കോടി രൂപയുടെ ബാങ്ക് ഇടപാടുകള്‍ നടത്തി. ഇതില്‍ 1.22 കോടി രൂപയ്ക്കു മാത്രമാണ് ആദായനികുതി റിട്ടേണ്‍ സമര്‍പ്പിച്ചതെന്നു രേഖകള്‍ സഹിതം കുറ്റപത്രത്തില്‍ വിവരിക്കുന്നു. 2017 ജൂണിനും 2018 ജൂലൈയ്ക്കുമിടെ എസ്. അരുണ്‍ എന്നയാള്‍ പലപ്പോഴായി 25 ലക്ഷം രൂപ ബിനീഷിന്റെ അക്കൗണ്ടിലേക്ക് അയച്ചിട്ടുണ്ട്.

കള്ളപ്പണം വെളുപ്പിക്കല്‍ നിയമത്തിലെ 19 (എ), 69 വകുപ്പുകള്‍ പ്രകാരമാണു കുറ്റപത്രം. നര്‍ക്കോട്ടിക് കണ്‍ട്രോള്‍ ബ്യൂറോ അറസ്റ്റ് ചെയ്ത അനൂപിന്റെ മൊഴിയാണ് കേസില്‍ ബിനീഷിനെതിരെ നിര്‍ണായകമായത്.

അറസ്റ്റിലായി 60 ദിവസത്തിനുമുമ്പ് താത്കാലിക കുറ്റപത്രം സമര്‍പ്പിച്ചില്ലെങ്കില്‍ സ്വാഭാവിക ജാമ്യത്തിന് ബിനീഷിന് അര്‍ഹതയുണ്ടാകും. അത് തടയിട്ട പ്രാഥമിക കുറ്റപത്രത്തിന് ശേഷമാണ് ഇഡി ശക്തമായ കുറ്റപത്രം നല്‍കിയത്. ലഹരിമരുന്നുകേസില്‍ നര്‍ക്കോട്ടിക്‌സ് കണ്‍ട്രോള്‍ ബ്യൂറോ(എന്‍.സി.ബി) അറസ്റ്റുചെയ്ത എറണാകുളം സ്വദേശി മുഹമ്മദ് അനൂപിന്റെ മൊഴിയുടെ അടിസ്ഥാനത്തിലാണ് ബിനീഷിനെതിരേ ഇ.ഡി. കേസെടുത്തത്. മുഹമ്മദ് അനൂപ് ബിനീഷിന്റെ ബിനാമിയാണെന്നാണ് ഇ.ഡി.യുടെ കണ്ടെത്തല്‍. ബിനീഷിന്റെ ബിനാമിയാണെന്ന് സംശയിക്കുന്ന അബ്ദുല്‍ ലത്തീഫ്, മുഹമ്മദ് അനൂപിന്റെ റെസ്‌റ്റോറന്റ് പങ്കാളി റഷീദ് എന്നിവരെ ചോദ്യം ചെയ്തതില്‍നിന്നുള്ള വിവരങ്ങളും പ്രാഥമിക കുറ്റപത്രത്തില്‍ ഉള്‍പ്പെടുത്തി.

ബിനീഷിന്റെ ജാമ്യാപേക്ഷ ബെംഗളൂരു പ്രത്യേക കോടതി (സെഷന്‍സ് കോടതി) പല പ്രാവശ്യമാണ് തള്ളിയത്. ഇതിനെതിരേ കര്‍ണാടക ഹൈക്കോടതിയിലും ഹര്‍ജി നല്‍കിയിരുന്നു. നടപടിക്രമങ്ങള്‍ പാലിക്കാതെയാണ് അറസ്‌റ്റെന്നാണ് കോടതിയെ ബോധിപ്പിച്ചത്. ഹൈക്കോടതിയില്‍ നിന്നും ബിനീഷിന് ജാമ്യം ലഭിച്ചില്ല.

കഴിഞ്ഞ 7 വര്‍ഷത്തിനിടെ ബിനീഷ് വിവിധ ബാങ്ക് അക്കൗണ്ടുകളിലൂടെ കോടിക്കണക്കിന് രൂപയുടെ ഇടപാട് നടത്തിയിട്ടുണ്ടെന്നും, ഇതില്‍ 1.22 കോടി രൂപയ്ക്ക് മാത്രമാണ് ആദായ നികുതി റിട്ടേണ്‍ സമര്‍പ്പിച്ചതെന്നുമാണ് ഇഡിയുടെ കണ്ടെത്തല്‍. ബാക്കി തുക മയക്കുമരുന്ന് ഇടപാടിലൂടെ സമ്പാദിച്ച പണമാണെന്നാണ് ഇഡി കോടതിയില്‍ വാദിച്ചത്. ഇതിനെ സാധൂകരിക്കുന്ന കുറ്റപത്രമാണ് ഇഡി ഇപ്പോള്‍ നല്‍കിയിരിക്കുന്നത്.