ശബരിമലയില്‍ അടി കൊണ്ടത് ബിജെപിക്കാരാണെങ്കിലും നേട്ടം കൊണ്ടുപോയത് മണ്ണും ചാരി നിന്ന യുഡിഎഫുകാരാണ്. ഒറ്റയടിക്ക് 19 സീറ്റാണ് അവര്‍ നേടിയത്. ലോക്‌സഭയില്‍ മൃഗീയ ഭൂരിപക്ഷം കിട്ടിയ കോണ്‍ഗ്രസുകാര്‍ ശബരിമലയേയും അയ്യപ്പനേയും എല്ലാം മറന്നു. തദ്ദേശ സ്വയംഭരണ തെരഞ്ഞെടുപ്പില്‍ യുഡിഎഫ് തകര്‍ന്നു. ചെന്നിത്തലയെ വെട്ടി ഉമ്മന്‍ ചാണ്ടി രംഗത്തെത്തിയതോടെയാണ് പഴയ ശബരിമല വിഷയം വീണ്ടും എടുത്തിട്ടത്. അതിനെ അര്‍ഹിക്കുന്ന മറുപടി നല്‍കി ഒതുക്കുകയാണ് മുഖ്യമന്ത്രി പിണറായി വിജയന്‍.

ശബരിമലയില്‍ നിലവില്‍ ഒരു പ്രശ്‌നവുമില്ലെന്നും അങ്ങനെയൊരു സാഹചര്യത്തില്‍ യുഡിഎഫിന് ശബരിമല പ്രചാരണ വിഷയമാക്കിയാല്‍ വോട്ടുകള്‍ കിട്ടും എന്ന തോന്നല്‍ ഉണ്ടായിരിക്കുകയാണെന്നും പരിഹസിച്ച് മുഖ്യമന്ത്രി പിണറായി വിജയന്‍. ശബരിമലയുമായി ബന്ധപ്പെട്ട് ഇപ്പോള്‍ എന്തെങ്കിലും പ്രശ്‌നങ്ങള്‍ നിലനില്‍ക്കുന്നുണ്ടോ എന്നും സുപ്രീം കോടതി റിവ്യൂ ആരംഭിച്ചതിനു ശേഷം ശബരിമലയുമായി ബന്ധപ്പെട്ട് എന്തെങ്കിലും പ്രശ്‌നം റിപ്പോര്‍ട്ട് ചെയ്യേണ്ടതായി വന്നിട്ടുണ്ടോ എന്നും മുഖ്യമന്ത്രി മാദ്ധ്യമങ്ങളോട് ചോദിച്ചു.

ശബരിമലയുടെ കാര്യത്തില്‍ നേരത്തെ സുപ്രീം കോടതി ഒരു വിധി പുറപ്പെടുവിച്ചുവെന്നും പിന്നീട് ആ വിധി സുപ്രീം കോടതി തന്നെ റിവ്യൂ ചെയ്യാന്‍ തീരുമാനിച്ചതായി തീരുമാനിച്ചു. അതിനുശേഷം ശബമലയില്‍ ഉത്സവങ്ങള്‍ നടക്കുന്നുണ്ട്. തുടര്‍ച്ചയായ വര്‍ഷങ്ങളില്‍ ഉത്സവങ്ങള്‍ നടക്കുന്നുണ്ട്. അവിടെ ഇപ്പോള്‍ ഒരു പ്രശ്‌നവുമില്ല. സാധാരണ ഗതിയില്‍ ഉത്സവങ്ങള്‍ നടക്കുകയാണ്. ആ വിധിയുടെ ഭാഗമായി സുപ്രീകോടതിയുടെ വിധി വരുമ്പോള്‍ മാത്രമേ ഇനിയെന്ത് വേണമെന്ന് നമ്മള്‍ ആലോചിക്കേണ്ടതുള്ളൂ എന്നും മുഖ്യമന്ത്രി പറഞ്ഞു.

ശബരിമല സംബന്ധിച്ച് നമ്മുടെ സമൂഹത്തിന്റെ ശ്രദ്ധയില്‍ ഒന്നുമില്ലെന്നും ആ സമയത്താണ് യുഡിഎഫ് ശബരിമല വിഷയവുമായി പ്രചരണത്തിന് ഇറങ്ങുന്നതെന്നും മുഖ്യമന്ത്രി പറഞ്ഞു. ഇക്കാര്യത്തില്‍ തങ്ങള്‍ക്ക് എന്തെങ്കിലും ചെയ്യാനാകുമോ. കോടതിയുടെ വിധി വരുമ്പോഴാണ് സര്‍ക്കാരിന് ഇനി റോളുള്ളത്. വിധി പുറത്തുവരുമ്പോള്‍ നമ്മെ പൊതുവായി ബാധിക്കുന്ന എന്തെങ്കിലും പ്രശ്‌നങ്ങള്‍ അതിലുണ്ടെങ്കില്‍ അപ്പോള്‍ ഒരു നിലപാട് സ്വീകരിക്കേണ്ടതായി വരുമെന്നും മുഖ്യമന്ത്രി പറഞ്ഞു.

അപ്പോള്‍ മാത്രമേ സമൂഹത്തിലെ വിവിധ വിഭാഗങ്ങളുമായി ചര്‍ച്ച ചെയ്തുകൊണ്ട് അത്തരത്തില്‍ നിലപാട് സ്വീകരിക്കേണ്ടി വരികയുള്ളൂവെന്നും അദ്ദേഹം വിശദീകരിച്ചു. യുഡിഎഫ് ഇപ്പോള്‍ പ്രചരണത്തിന് വേണ്ടിയുള്ള ഒരായുധമാക്കി ശബരിമല വിഷയത്തെ ഉപയോഗിക്കുകയാണെന്നും അതിനു പിറകെ തങ്ങള്‍ പോകേണ്ടതില്ലെന്നും മുഖ്യമന്ത്രി പറഞ്ഞു. ഒരു പ്രശ്‌നവും ശബരിമലയില്‍ ഇല്ലാത്ത സാഹചര്യത്തെ 'ഇതാ പ്രശ്‌നം' എന്ന് പറഞ്ഞുകൊണ്ട് യുഡിഎഫ് തെറ്റായ പ്രചരണം നടത്തുകയാണെന്നും മുഖ്യമന്ത്രി വിമര്‍ശിച്ചു.

മുസ്ലിം ലീഗ് ഒരു രാഷ്ട്രീയപാര്‍ട്ടിയല്ല എന്ന നിലപാട് എല്‍ഡിഎഫിനില്ലെന്നും വിമര്‍ശിക്കുമ്പോള്‍ വര്‍ഗീയതായി കാണേണ്ടതില്ലെന്നും ലീഗിനെ വിമര്‍ശിച്ചാല്‍ അതിന്റെ പിന്നില്‍ എന്താണ് വര്‍ഗീയതെയെന്നും അദ്ദേഹം ചോദിച്ചു. മുന്‍പ് ചില കക്ഷികളുമായി യുഡിഎഫ് സഖ്യം ചേര്‍ന്നിരുന്നുവെന്നും ഇപ്പോള്‍ ലീഗ് വീണ്ടും അവരുമായി ചേരുകയാണെന്നും മുഖ്യമന്ത്രി വിമര്‍ശിച്ചു. യുഡിഎഫ് വര്‍ഗീയതയുമായി സമരസപ്പെടുകയാണെന്നും നാലു വോട്ടിനു വേണ്ടിയാണ് അവരിത് ചെയ്യുന്നതെന്നും അദ്ദേഹം പറഞ്ഞു.

യുഡിഎഫ് ശബരിമല എടുത്തിട്ടതിന് പിന്നാലെയാണ് കെ. സുധാകരന്‍ ചെത്തുകാരന്റെ മകന്‍ പ്രയോഗവുമായി രംഗത്തെത്തിയത്. അതോടെ സുധാകരനും കോണ്‍ഗ്രസുകാരും തമ്മിലുള്ള പൊരിഞ്ഞ അടിയായി. അതിന് പിന്നാലെയാണ് മുഖ്യമന്ത്രി തന്നെ ശബരിമലയ്ക്കായി പറയാതെ പറഞ്ഞ് രംഗത്തെത്തിയത്.