കാലടി സംസ്‌കൃത സര്‍വ്വകലാശാലയിലെ നിയമനം അട്ടിമറിച്ചെന്ന വിവാദങ്ങളിൽ പ്രതികരണവുമായി ‌ എംബി രാജേഷിന്റെ ഭാര്യ നിനിത കണിച്ചേരി രംഗത്ത്. മാധ്യമങ്ങള്‍ തനിക്കെതിരെ വ്യക്തിഹത്യ നടത്തുന്നുവെന്ന് നിനിത ആരോപിക്കുകയുണ്ടായി . ഏഴ് വര്‍ഷം മുന്‍പുള്ള ഒരു പിഎസ്‌സി റാങ്ക് ലിസ്റ്റിലെ തന്റെ 212 ആം റാങ്ക് ചൂണ്ടിക്കാണിച്ചായിരുന്നു എല്ലാവരും സംസാരിക്കുന്നതെന്നും ഇത് വലിയ ഒരു ഗൂഢാലോചനയുടെ ഭാഗമാണെന്നും നിനിത ആരോപിക്കുകയുണ്ടായി. ഏഴ് വര്‍ഷം മുന്‍പത്തെ റാങ്ക് ലിസ്റ്റില്‍ തനിക്ക് 212 ആം സ്ഥാനമാണുള്ളതെന്ന് മാധ്യമങ്ങള്‍ പ്രചരിപ്പിക്കുന്നു. എന്നാൽ അതേ ലിസ്റ്റില്‍ തന്നെക്കാള്‍ യോഗ്യരായവര്‍ ആരാണുള്ളതെന്ന് മാധ്യമങ്ങള്‍ തെളിയിക്കണമെന്നും നിനിത പറഞ്ഞു . തന്നേക്കാള്‍ ഉയര്‍ന്ന യോഗ്യതയുള്ളവര്‍ ലിസ്റ്റില്‍ ആരാണെന്നും അവരുടെ പേരുവിവരങ്ങളും റാങ്ക് ലിസ്റ്റില്‍ കാണിച്ചുതരാനാകുമോ എന്നും നിനിത അവതാരകനെ നേരിട്ട് വിളിച്ച്‌ ചോദിക്കുകയുണ്ടായി .

തനിക്കെതിരെ ഇപ്പോള്‍ നടന്നുകൊണ്ടിരുന്ന ചര്‍ച്ചകളുടെയും വിവാദങ്ങളുടെയും ലക്ഷ്യം താനല്ലെന്ന് ബോധ്യമുള്ളത് കൊണ്ടായിരുന്നു ആദ്യമൊന്നും വിഷയത്തോട് പ്രതികരിക്കാതിരുന്നതെന്ന് നിനിത പറഞ്ഞു . എന്നാല്‍ വിവാദമുണ്ടായ ശേഷം തന്നെ മാറ്റി നിര്‍ത്താന്‍ സമ്മര്‍ദ്ദമുണ്ടായ പശ്ചാത്തലത്തിലാണ് ജോലിക്ക് കയറാന്‍ തീരുമാനിച്ചത്. വ്യക്തിപരമായ ബുദ്ധിമുട്ടുകള്‍ ഉള്ളതിനാല്‍ ജോലിയില്‍ പ്രവേശിക്കണോയെന്ന സംശയത്തിലായിരുന്നു ആദ്യമെന്നും നിനിത പറഞ്ഞു. നിനിതയുടെ നിയമനത്തിനെതിരെ ഇന്റര്‍വ്യൂ ബോര്‍ഡിലെ മൂന്ന് വിഷയ വിദഗ്ധര്‍ വിസിക്കും രജിസ്ട്രാര്‍ക്കും കത്ത് നല്‍കിയിരുന്നു . ലിസ്റ്റ് അട്ടിമറിച്ചതാണെന്നും നിനിത കണിച്ചേരി പട്ടികയിലുണ്ടായിരുന്നില്ലെന്നും മൂവരും കത്തില്‍ വ്യക്തമാക്കിയിട്ടുണ്ട് . ഉദ്യോഗാര്‍ത്ഥിക്ക് യോഗ്യതയുണ്ടോ എന്ന് പരിശോധിക്കേണ്ടത് വിഷയ വിദഗ്ധരാണ്. ഇവരുടെ തെരഞ്ഞെടുപ്പ് അനുസരിച്ച്‌ നിനിതയ്ക്ക് യോഗ്യത ഉണ്ടായിരുന്നില്ലെന്നും റിപ്പോര്‍ട്ടുകൾ സൂചിപ്പിക്കുന്നു. മറ്റൊരു ഉദ്യോഗാര്‍ത്ഥിക്കായിരുന്നു മുസ്ലിം സംവരണ വിഭാഗത്തില്‍ വിഷയ വിദഗ്ധര്‍ യോഗ്യത നല്‍കിയത്. ഈ പട്ടികയാണ് ഇപ്പോൾ അട്ടിമറിക്കപ്പെട്ടത്.