അങ്ങനെ മണ്ഡലമാസം അല്ലാത്ത സീസണിലും ശബരിമല ചര്‍ച്ചയാകുകയാണ്. ഭരണം കിട്ടാനുള്ള അവസാനത്തെ അടവായാണ് ചെന്നിത്തലയും കൂട്ടരും രംഗത്തെത്തിയിരിക്കുന്നത്. യുഡിഎഫ് അധികാരത്തില്‍ വന്നാല്‍ ബില്ല് കൊണ്ടുവരുമെന്നാണ് പറയുന്നത്. ആചാര ലംഘനം നടത്തിയാല്‍ 2 വര്‍ഷമാണ് തടവ്. മുന്‍കാല പ്രാബല്യത്തില്‍ നടപ്പാക്കുമോ എന്നാണ് ഭക്തര്‍ ചോദിക്കുന്നത്. അങ്ങനെയെങ്കില്‍ ശബരിമലയില്‍ ഇരുട്ടിന്റെ മറവില്‍ കയറിയ ബിന്ദു അമ്മിണിയും കനകദുര്‍ഗയും ഞെട്ടണം.

ശബരിമല യുവതീപ്രവേശനം അനുവദിച്ച സുപ്രീംകോടതി ഭരണഘടനാ ബെഞ്ചിന്റെ വിധി മറികടക്കാനും ആചാരസംരക്ഷണത്തിനും നിയമനിര്‍മ്മാണമെന്ന തുറുപ്പുചീട്ടിറക്കിയ യു.ഡി.എഫ് അതിന്റെ കരട്ബില്ല് പുറത്തു വിട്ടിരിക്കുകയാണ്. ഇതോടെ നിയമസഭാ തിരഞ്ഞെടുപ്പ് പ്രചാരണത്തില്‍ ശബരിമല സജീവ വിഷയമാകുമെന്നുറപ്പായി.

സുപ്രീംകോടതിയുടെ വിശാല ബെഞ്ച് പുനഃപരിശോധിക്കുന്ന വിഷയത്തില്‍ ഏത് ഭരണഘടനയും നിയമവുമനുസരിച്ചാണ് കോണ്‍ഗ്രസ് നിയമമുണ്ടാക്കുന്നതെന്നാണ് സി.പി.എമ്മിന്റെ പരിഹാസം. യുവതീപ്രവേശന വിധിക്കെതിരായ റിവ്യൂ ഹര്‍ജികളില്‍ വിശാലബെഞ്ച് തീരുമാനമെടുത്താല്‍ എല്ലാ വിഭാഗങ്ങളുമായും ചര്‍ച്ച ചെയ്ത് നിലപാടെടുക്കാം. വിശാല ബെഞ്ചിന്റെ പരിഗണനയിലായതിനാല്‍ തന്നെ ഇപ്പോള്‍ അതൊരു ചര്‍ച്ചാവിഷയമല്ലെന്നും സി.പി.എം കരുതുന്നു.

നിയമസഭാ തിരഞ്ഞെടുപ്പില്‍ വോട്ട് കിട്ടാനുള്ള യു. ഡി. എഫ് തന്ത്രമായി കണ്ടുള്ള പ്രചാരണത്തിന് ഇടതുമുന്നണി ഒരുങ്ങുമ്പോള്‍, പ്രചാരണത്തില്‍ ശബരിമലയെ വിടില്ലെന്നാണ് കരട് ബില്ലിലൂടെ യു.ഡി.എഫ് നേതൃത്വം വ്യക്തമാക്കുന്നത്. ശബരിമല ക്ഷേത്രത്തിന്റെ പരമാധികാരി തന്ത്രിയാണെന്ന് വ്യക്തമാക്കുന്ന ബില്ലില്‍ ആചാരലംഘനത്തിന് രണ്ട് വര്‍ഷത്തെ തടവ് ശിക്ഷയാണ് വ്യവസ്ഥ ചെയ്യുന്നത്.

യു.ഡി.എഫ് അധികാരത്തിലെത്തിയാല്‍ നിയമനിര്‍മ്മാണം നടത്തുമെന്ന് കോണ്‍ഗ്രസ് നേതാക്കള്‍ ആവര്‍ത്തിക്കുന്നുണ്ടായിരുന്നു. എങ്കില്‍ ബില്ലിന്റെ കരട് പുറത്തുവിടാന്‍ മന്ത്രി എ.കെ. ബാലന്‍ വെല്ലുവിളിച്ചതിന് പിന്നാലെയാണ് ഇന്നലെ കോട്ടയത്ത് തിരുവഞ്ചൂര്‍ രാധാകൃഷ്ണന്‍ ബില്‍ പുറത്തുവിട്ടത്. നിലപാട് ആത്മാര്‍ത്ഥമാണെന്ന് സ്ഥാപിച്ച് വിശ്വാസി വികാരം മുതലെടുക്കാനാണ് യു.ഡി.എഫ് ശ്രമം. റിവ്യൂ ഹര്‍ജികള്‍ സുപ്രീം കോടതി പരിഗണിക്കുമ്പോള്‍, യുവതീ പ്രവേശനത്തിന് അനുകൂലമായ സര്‍ക്കാരിന്റെ സത്യവാങ്മൂലം തിരുത്തി ആചാരസംരക്ഷണം ഉറപ്പാക്കുന്ന സത്യവാങ്മൂലം നല്‍കണമെന്നും യു.ഡി.എഫ് ആവശ്യപ്പെടുന്നു.

ഇത് വ്യാജബില്ലാണെന്നും കോടതി വിധിക്ക് മുകളില്‍ ഇങ്ങനൊരു നിയമം പാസാക്കാന്‍ സംസ്ഥാനത്തിനാവില്ലെന്നും ജനങ്ങളെ പറ്റിക്കാനാണിതെന്നും സിപിഎം സെക്രട്ടറി എ. വിജയരാഘവന്‍ പറഞ്ഞു.

ലോക്‌സഭാ തെരഞ്ഞെടുപ്പിന് മുമ്പ് വന്ന യുവതീ പ്രവേശന വിധി സംസ്ഥാനത്ത് നാമജപ സമരമടക്കം കോളിളക്കമുണ്ടാക്കിയിരുന്നു. നവോത്ഥാന മൂല്യസംരക്ഷണ സമിതിയിലൂടെ പ്രതിരോധത്തിന് ശ്രമിച്ച സര്‍ക്കാര്‍ വനിതാ മതിലും സംഘടിപ്പിച്ച് കോടതിവിധി ഉയര്‍ത്തിപ്പിടിച്ചു. പ്രക്ഷോഭത്തിന് ബി.ജെ.പി ഇറങ്ങിയതോടെ സംഘര്‍ഷാവസ്ഥയായി.

ലോക്‌സഭാ തിരഞ്ഞെടുപ്പിലെ തിരിച്ചടിക്ക് കാരണമായി സി.പി.എം വിലയിരുത്തിയത്, യുവതീപ്രവേശന വിധിയുടെ പേരില്‍ ചിലര്‍ തെറ്റിദ്ധാരണ പരത്തിയതാണ്. തെറ്റിദ്ധാരണ മാറ്റാന്‍ ഗൃഹസന്ദര്‍ശനത്തിലേക്കടക്കം സി.പി.എം നീങ്ങി. തദ്ദേശ തെരഞ്ഞെടുപ്പിലും ഇത് വിഷയമാക്കാനുള്ള ശ്രമമുണ്ടായെങ്കിലും ഫലിച്ചില്ല.

ശബരിമല യുവതീപ്രവേശനം തടയാന്‍ യു.ഡി.എഫ് നടപ്പാക്കാന്‍ ഉദ്ദേശിക്കുന്ന നിയമത്തിന്റെ കരട് കോണ്‍ഗ്രസ് നേതാവ് തിരുവഞ്ചൂര്‍ രാധാകൃഷ്ണന്‍ ഇന്നലെ പത്രസമ്മേളനത്തില്‍ പുറത്തുവിട്ടു. മുന്‍ പ്രോസിക്യൂഷന്‍ ഡയറക്ടര്‍ ജനറല്‍ ടി. അസഫ് അലിയാണ് കരട് തയ്യാറാക്കിയത്.ആചാരം ലംഘിച്ചു കയറുന്ന യുവതികള്‍ക്ക് രണ്ടു വര്‍ഷം തടവ് ശിക്ഷ വ്യവസ്ഥ ചെയ്യുന്ന നിയമത്തില്‍, ആചാരങ്ങള്‍ നിശ്ചയിക്കാനുള്ള പരമാധികാരം തന്ത്രിക്കാണെന്ന് വ്യക്തമാക്കുന്നു.