യു ഡി എഫിന്റെ ശക്തിദുര്‍ഗമായ മലപ്പുറം ജില്ലയിലെ രണ്ടു   ദിവസത്തെ വിജയകരമായ പര്യടനം പൂര്‍ത്തിയാക്കി പ്രതിപക്ഷ നേതാവ്  രമേശ് ചെന്നിത്തല നയിക്കുന്ന ഐശ്വര്യകേരളായാത്ര    ചരിത്രമുറങ്ങുന്ന പാലക്കാടിന്റെ  മണ്ണില്‍ പ്രവേശിച്ചു. ഇന്ന് മലപ്പുറം ജില്ലയുടെ ഭാഗമായ തവനൂരിലെയും പൊന്നാനിയിലെയും സ്വീകരണം ഏറ്റുവാങ്ങി കൊണ്ടാണ്  ഐശ്വര്യകേരളയാത്ര പാലക്കാട്  ജില്ലയില്‍ പ്രവേശിച്ചത്.

മലപ്പുറം ജില്ലയില്‍ ലഭിച്ച  അത്യുജ്വല സ്വീകരണത്തിന് കിടപിടിക്കുന്ന  വമ്പിച്ച സ്വീകരണം   തന്നെയാണ് പാലക്കാട് ജില്ലയിലേക്ക് കടന്നപ്പോള്‍ ഐശ്വര്യ കേരളായാത്രക്ക് ലഭിച്ചത്.  മലപ്പുറം - പാലക്കാട് ജില്ലാ അതിര്‍ത്തിയായ നിലീയാട് നിന്നും ലഭിച്ച വരവേല്‍പ്പ് മുതല്‍ തന്നെ ഇത് വ്യക്തമായിരുന്നു. പാലക്കാട് ജില്ലയിലെ യുഡിഎഫ് ജനപ്രതിനിധികളും, നേതാക്കളും പ്രവര്‍ത്തകരും ചേര്‍ന്നാണ് നീലിയാട് ഐശ്വര്യ യാത്രയെ വരവേറ്റത്.  

തുടര്‍ന്ന് ആയിരങ്ങള്‍ ആര്‍ത്തിരമ്പിയ ജില്ലയിലെ ആദ്യത്തെ ആവേശ്വേജ്വല സ്വീകരണം  തൃത്താലയില്‍ നടന്നു. തുടര്‍ന്ന് പട്ടാമ്പി, ഷൊര്‍ണ്ണൂര്‍, ഒറ്റപ്പാലം എന്നിവിടങ്ങളിലെ സ്വീകരണം ഏറ്റുവാങ്ങി മണ്ണാര്‍ക്കാട് ഇന്നത്തെ യാത്ര സമാപിച്ചു. യു.ഡി.എഫ് പ്രവര്‍ത്തകരുടെയും നേതാക്കളുടെയും പ്രതീക്ഷയെ  കവച്ച് വയ്കുന്നജനക്കൂട്ടമാണ് ഓരോ സ്വീകരണ പരിപാടിയിലും ദൃശ്യമായത്.  ഇതിനെ തുടര്‍ന്ന് നിശ്ചയിച്ചതിലും വൈകിയാണ് യാത്രയുടെ  സമാപനം  മണ്ണാര്‍ക്കാട്  നടന്നത്.

സംസ്ഥാന സര്‍ക്കാരിന്റെ അഴിമതിയും സ്വജനപക്ഷപാതവും വികസന മുരടിപ്പിനുമൊപ്പം ഒരോ നിയോജമണ്ഡലത്തിലെ പ്രദേശിക പ്രശ്‌നങ്ങളും ജനങ്ങള്‍ക്കിടയില്‍ ചര്‍ച്ചയാക്കാന്‍ ഐശ്വര്യ കേരള യാത്രക്ക് സാധിക്കുന്നുണ്ട്.

പുതിയ തൊഴിലവസരങ്ങളൊന്നും സൃഷ്ടിക്കാതിരിക്കുകയും, ഉള്ള തൊഴിലുകളെല്ലാം പിന്‍വാതിലിലൂടെ പാര്‍ട്ടി അനുഭാവികള്‍ക്കും, ബന്ധുക്കള്‍ക്കും നല്‍കുകയും ചെയ്യുന്ന 'ബന്ധുജന സര്‍ക്കാരി'നെ  തകര്‍ത്ത് തരിപ്പണമാക്കുന്നതാകും  വരുന്ന നിയമസഭാ തെരെഞ്ഞെടുപ്പിന്റെ ഫലമെന്നും രമേശ് ചെന്നിത്തല യോഗങ്ങളില്‍ അഭിപ്രായപ്പെട്ടു.

പൊന്നാനിയില്‍ ലഭിച്ച സ്വീകരണ യോഗത്തില്‍ സ്പീക്കര്‍ ശ്രീരാമകൃഷ്ണനെതിരെ രൂക്ഷമായ വിമര്‍ശനമാണ് പ്രതിപക്ഷ നേതാവ് നടത്തിയത്. ഇരിക്കുന്ന  പദവിക്ക് യോജിക്കാത്ത  ചെയ്തികളാണ് അദ്ദേഹത്തിന്റെ ഭാഗത്ത് നിന്നും ഉണ്ടാകുന്നതെന്നും സ്വര്‍ണ്ണക്കള്ളക്കടത്തു പ്രതികളുമായി സൂക്ഷിക്കുന്ന ദുരൂഹ ബന്ധങ്ങള്‍, റിവേഴ്സ് ഹവാലയുമായി ബന്ധപ്പെട്ട ആരോപണങ്ങള്‍,  നിഷ്പക്ഷത പാലിക്കേണ്ട സ്ഥാനത്തിരുന്ന് ഏകപക്ഷീയമായി പെരുമാറുന്ന രീതി തുടങ്ങി നിയമസഭക്ക് തന്നെ അപമാനകരമായ  പ്രവര്‍ത്തനങ്ങളാണ്   സ്പീക്കര്‍  നടത്തിയതെന്നും രമേശ്  ചെന്നിത്തല കുറ്റപ്പെടുത്തി.