ശബരിമല വിഷയത്തില്‍ യു.ഡി.എഫ് ആദ്യം മുതല്‍ വിശ്വാസികള്‍ക്കൊപ്പമായിരുന്നെന്നും ഇനിയും അങ്ങനെയായിരിക്കുമെന്നും പ്രതിപ​ക്ഷ നേതാവ്​ രമേശ്​ ചെന്നിത്തല. എന്‍.എസ്.എസിന്റെ പ്രസ്​താവന തെറ്റിദ്ധാരണമൂലമായിരുന്നു. ശബരിമലക്കേസില്‍ സുപ്രീംകോടതിയില്‍ പോയത് കോണ്‍ഗ്രസ് മാത്രമാണ്. മ​റ്റൊരു പാര്‍ട്ടിയും ഇതില്‍ കക്ഷിചേര്‍ന്നിട്ടില്ല. കേരള, കേന്ദ്ര സര്‍ക്കാറുകള്‍ വിശ്വാസികള്‍ക്കെതിരായ നിലപാടാണ് സ്വീകരിച്ചത്. ഇക്കാര്യത്തില്‍ ദൃഢ നിലപാടെടുത്തത് കോണ്‍ഗ്രസാണ്.

അത് താന്‍ വിശദീകരിച്ചത് എന്‍.എസ്.എസിന് ബോധ്യമായതില്‍ സന്തോഷമുണ്ടെന്നും വാര്‍ത്തസമ്മേളനത്തില്‍ രമേശ്​ പറഞ്ഞു.പൗരത്വ ഭേദഗതി നിയമം കേരളത്തില്‍ നടപ്പാക്കില്ലെന്ന് മുഖ്യമന്ത്രി പറയുന്നു. ഇന്ത്യയില്‍തന്നെ അത് നടപ്പാക്കാന്‍ കോണ്‍ഗ്രസ് അനുവദിക്കില്ല. ഇന്ത്യയിലുടനീളം ഇതിനെതിരായ നിലപാട് സ്വീകരിച്ചത് കോണ്‍ഗ്രസാണ്.

വര്‍ഗീയത ആളിക്കത്തിച്ച്‌ ന്യൂനപക്ഷങ്ങളെ ഒറ്റപ്പെടുത്താന്‍ മുഖ്യമന്ത്രി ശ്രമം നടത്തിയതി​െന്‍റ ജാള്യം മറച്ചുവെക്കാനാണ് അദ്ദേഹം ഈ വിഷയം ഇപ്പോള്‍ എടുത്തിട്ടത്​.ഇതുപോലെ ജനങ്ങളെ പറ്റിച്ച ഒരുസര്‍ക്കാറില്ല. സ്വന്തമായി ഒരുനേട്ടവുമില്ലാത്ത ഇടതുസര്‍ക്കാര്‍ യു.ഡി.എഫ് സര്‍ക്കാറി​െന്‍റ നേട്ടം തങ്ങളുടേതാണെന്ന് വരുത്തിത്തീര്‍ക്കാന്‍ ശ്രമിക്കുന്നെന്നും ചെന്നിത്തല ആരോപിച്ചു.