തെരുവു നായയെ ഉപദ്രവിച്ച ശേഷം കുരുക്കിട്ട് റോഡിലൂടെ വലിച്ചിഴച്ച് കൊടും ക്രൂരത... മനുഷ്യപറ്റ് ഇല്ലാത്ത പ്രവര്ത്തിക്ക് കേസെടുത്ത് പൊലീസ്...
കട്ടപ്പനയില് തെരുവുനായയെ നടുറോഡിലൂടെ കെട്ടിവലിച്ച് കൊടും ക്രൂരത. കട്ടപ്പന സ്വദേശി ഷാബുവാണ് നായയെ കെട്ടിവലിച്ചിഴച്ചത്.
സംഭവത്തില് കട്ടപ്പന പൊലീസ് കേസെടുത്തു. തന്നെ അക്രമിക്കാന് വന്നപ്പോള് തിരിച്ച് പ്രതിരോധിച്ച് ചെയ്തതെന്നാണ് ഷാബു നല്കിയ വിശദീകരണം. സംഭവത്തില് കട്ടപ്പന കൈരളി ജംക്ഷന് മാണ്ടിയില് ഷാബുവിനെതിരെ പൊലീസ് കേസെടുത്തു.
നായയുടെ കഴുത്തില് കുരുക്കിട്ട് ടാര് റോഡിലൂടെ വലിച്ചിഴച്ചു കൊണ്ടുപോകുന്ന ദൃശ്യം നാട്ടുകാരന് സമൂഹമാധ്യമങ്ങളിലൂടെ പങ്കുവച്ചതോടെയാണ് സംഭവം പുറം ലോകം അറിയുന്നത്. തുടര്ന്ന് സിദ്ധാര്ഥ് അടക്കമുള്ള ദൃക്സാക്ഷികളുടെ മൊഴി രേഖപ്പെടുത്തി പൊലീസ് കേസെടുത്തു. ഞായറാഴ്ച ഉച്ചകഴിഞ്ഞ് മൂന്നോടെയായിരുന്നു സംഭവം. കൈരളി ജംക്ഷന് മേഖലയില് നായ ആക്രമിക്കാന് എത്തിയപ്പോള് പ്രതിരോധിച്ചശേഷം കുരുക്കിട്ട് വലിച്ചുകൊണ്ടു പോകുകയായിരുന്നെന്ന് ഷാബു പറഞ്ഞതായി പൊലീസ് അറിയിച്ചു.
സാരമായി പരുക്കുകളേറ്റ നായയെ വെറ്ററിനറി ഡോക്ടര് വിശദമായി പരിശോധിച്ച ശേഷം മരുന്നുകള് നല്കി. പരാതിക്കാരായ 2 യുവാക്കളെ നായയുടെ സംരക്ഷണം താല്ക്കാലികമായി ഏല്പിച്ചതായി പൊലീസ് അറിയിച്ചു. മൃഗങ്ങള്ക്കെതിരായ ക്രൂരത തടയുന്ന നിയമപ്രകാരമാണ് പൊലീസ് ഇയാള്ക്കെതിരെ കേസെടുത്തിരിക്കുന്നത്.
https://www.facebook.com/Malayalivartha
