കേരളം കഴിഞ്ഞ ദിവസം ചര്ച്ച ചെയ്ത കോള് പാറ്റേണ് സിപിഎമ്മിനെയും കോടിയേരിയേയും അതുവഴി മുഖ്യനേയും പൂട്ടാനുള്ള തുറുപ്പാകുമോ?
പഴുതടക്കുമ്പോള് എല്ലാം അടയ്ക്കണമല്ലോ. അങ്ങനെയെങ്കില് കേരളം കഴിഞ്ഞ ദിവസം ചര്ച്ച ചെയ്ത കോള് പാറ്റേണ് സിപിഎമ്മിനെയും കോടിയേരിയേയും അതുവഴി മുഖ്യനേയും പൂട്ടാനുള്ള തുറുപ്പാകുമോ എന്നാണ് ഇനി അറിയേണ്ടത്.
ലൈഫ് മിഷന് പദ്ധതിയുടെ കരാറുകാരനായ സന്തോഷ് ഈപ്പന് ഫോണ് വാങ്ങിയ ബില്ലില്നിന്നും ലഭിച്ച ഐഎംഇഐ നമ്പര് ഉപയോഗിച്ചാണ് കോടിയേരിയുടെ ഭാര്യ വിനോദിനി ഐ ഫോണ് ഉപയോഗിച്ചിരുന്നതായി കണ്ടെത്തിയതെന്നാണ് കസ്റ്റംസ് വാദം. ഫോണ് കണ്ടെത്താനായില്ലെങ്കിലും ഐഎംഇഐ നമ്പര് കണ്ടെത്തിയതിനാല് ആ നമ്പരിലെ സിം ഉപയോഗിക്കുന്ന ആള് ആരെയൊക്കെ വിളിച്ചു എവിടെയെല്ലാം പോയി എന്നത് 'കോള് പാറ്റേണ് അനാലിസിസിലൂടെയും' 'ടവര് പാറ്റേണ് അനാലിസിസിലൂടെയും' കണ്ടെത്താനാകും.
ഇതുവഴി ഒരാഴ്ചകൊണ്ട് മേല്പറഞ്ഞ രീതിയില് ഫോണ് ഉപയോഗിക്കുന്ന വ്യക്തിയെ കണ്ടെത്താമെന്നിരിക്കേ ഇത്രയും കാലതാമസം ഉണ്ടായതിന്റെ കാരണം വ്യക്തമല്ല. ഓരോ ഫോണിലും ഐഎംഇഐ നമ്പര് വ്യത്യാസമായിരിക്കും. സിം മാറിയാലും ഏത് വ്യക്തിയുടെ പേരിലെടുത്ത സിമ്മാണ് പുതുതായി ഉപയോഗിക്കുന്നതെന്നു വ്യക്തമാകും. ഒന്നിലധികം സിം ഉപയോഗിച്ചെങ്കില് അതും കണ്ടെത്താനാകും.
വിനോദിനിക്കെതിരെ കൃത്യമായ സൈബര് തെളിവുകള് ശേഖരിച്ചതിനുശേഷമാകും കസ്റ്റംസ് നോട്ടിസ് നല്കിയിരിക്കുക. അതിനാല് ഫോണ് ഉപയോഗിച്ചില്ല എന്നു പറയാന് കഴിയില്ല. ഉപയോഗിച്ചില്ല എന്നാണ് നിലപാടെങ്കില് പകരം ആര്, ആരൊക്കെ ഫോണ് ഉപയോഗിച്ചെന്നു പറയേണ്ടിവരും. നേരത്തെ കസ്റ്റംസ് ശേഖരിച്ച സൈബര് തെളിവുമായി ഒത്തുപോകുന്നില്ലെങ്കില് കാര്യങ്ങള് സങ്കീര്ണമാകും. ഫോണ് ഉപയോഗിച്ചു എന്നാണ് നിലപാടെങ്കില് എന്തിനു ഫോണ് സ്വീകരിച്ചു എന്നതിനു മറുപടി പറയേണ്ടിവരും.
ഐഎംഇഐ നമ്പര് ലഭിച്ചു കഴിഞ്ഞാല് കോള് പാറ്റേണ് അനാലിസിസിലൂടെയും ടവര് പാറ്റേണ് അനാലിസിസിലൂടെയുമാണ് സൈബര് വിദഗ്ധര് തെളിവുകള് കണ്ടെത്തുന്നത്. ഈ രണ്ട് രീതികളിലൂടെയും ആ ഫോണ് ഉപയോഗിക്കുന്ന വ്യക്തിയേയും ആ വ്യക്തിയുടെ ജീവിതരീതികളും ഏകദേശം മനസ്സിലാക്കാനാകും. ഫോണ് ഏറ്റവും കൂടുതല് ഉപയോഗിച്ച സ്ഥലങ്ങള് ടവര് പാറ്റേണ് അനാലിസിസിലൂടെ മനസ്സിലാകും.ഏത് സ്ഥലത്തായിരുന്നു കൂടുതല് സമയം, എവിടെയാണ് കുറച്ചു സമയം ചെലവഴിച്ചത് തുടങ്ങിയ കാര്യങ്ങള് മനസ്സിലാക്കി വ്യക്തിയുടെ സഞ്ചാരപഥം കണക്കാക്കും.
കള്ളം പറഞ്ഞാല് സൈബര് തെളിവുകള് നിരത്തി അന്വേഷണ ഉദ്യോഗസ്ഥര് അതിനെ ഖണ്ഡിക്കും. ഇത് ആ വ്യക്തിയെ കൂടുതല് പ്രതിരോധത്തിലാക്കും. സത്യം തുറന്നുപറയാന് നിര്ബന്ധിതനാകും.ആരെയൊക്കെയാണ് കൂടുതല് സമയം വിളിച്ചത് എന്നതാണ് കോള് പാറ്റേണ് അനാലിസിസിലൂടെ കണ്ടെത്തുന്നത്. സംശയിക്കുന്ന വ്യക്തി കൂടുതലായി വിളിച്ച ഏഴോ എട്ടോ പേരുടെ പട്ടിക തയാറാക്കും. ഏറ്റവും കൂടുതല് വിളിച്ച ആളായിരിക്കും പട്ടികയില് ആദ്യം.
പട്ടികയിലുള്ളവരുടെ ഫോണില്നിന്നും നേരിട്ടും വിവരങ്ങള് ശേഖരിച്ച ശേഷമായിരിക്കും സംശയമുള്ള വ്യക്തിയെ ചോദ്യം ചെയ്യുക. ഈ അന്വേഷണത്തിനൊന്നും ഫോണ് കണ്ടുപിടിക്കേണ്ട ആവശ്യവുമില്ല.അന്വേഷിക്കുന്ന ഫോണ് സ്വിച്ച് ഓഫ് ആണെങ്കിലും ഐഎംഇഐ നമ്പര് ഉപയോഗിച്ചുള്ള അന്വേഷണത്തിനു തടസ്സമില്ല. ഫോണ് സ്വിച്ച് ഓഫ് ചെയ്യപ്പെട്ടത് ഏത് ടവറിനു കീഴിലാണോ അതുവരെയുള്ള സൈബര് വിവരങ്ങള് ശേഖരിച്ച് ഫോണുപയോഗിച്ച വ്യക്തിയെ അടയാളപ്പെടുത്തിയ ശേഷമാകും അന്വേഷണോദ്യോഗസ്ഥര് ആ വ്യക്തിയെ ചോദ്യം ചെയ്യാന് വിളിക്കുക.
https://www.facebook.com/Malayalivartha