ജോസഫും സംഘവും തീര്ന്നു... മാണി സാറിന്റെ മരണത്തിന് ശേഷമുള്ള ആദ്യ തെരഞ്ഞെടുപ്പില് മകന് ജോസ് കെ മാണിക്ക് പണികൊടുത്ത് രണ്ടില കൊടുക്കാത്ത പിജെ ജോസഫിന് 16 മാസത്തിന് ശേഷം അതേ സാഹചര്യം; ഗതികെട്ട പിജെ ജോസഫിന് രാജി വയ്ക്കേണ്ടി വന്നു; പിസി തോമസിന് പുറകേ പോയ ജോസഫിന് നേരെ ബിജെപി ആരോപണവും
ഒരു രണ്ടില നല്കിയിരുന്നെങ്കില് ജോസ് കെ മാണി എല്ഡിഎഫില് പോകില്ലായിരുന്നു. ഇപ്പോള് എല്ഡിഎഫിലെ സൂപ്പര് താരമാണ് ജോസ് കെ മാണി.
അതേസമയം പിജെ ജോസഫിന് സ്വയം എംഎല്എ സ്ഥാനം രാജി വയ്ക്കേണ്ട ഗതിയാണ്. മാത്രമല്ല തെരഞ്ഞെടുപ്പ് ചിഹ്നവും ഏത് കിട്ടിയെന്ന് ജനങ്ങള്ക്കറിയില്ല. തെങ്ങുംതോപ്പ്, ട്രാക്ടര്, ഫുട്ബോള് എന്നിവയാണ് ചോദിച്ചത്. ട്രാക്ടറാണ് പ്രിയമെന്നാണ് വയ്പ്പ്. ചിഹ്നമില്ലാതെയാണ് ജോസഫിന്റെ സ്ഥാനാര്ത്ഥികളുടെ പോരും ചുവരെഴുത്തും. ഇതോടെ പകുതി പരാജയം ഉറപ്പായി.
പിജെ ജോസഫും മോന്സ് ജോസഫും എംഎല്എ സ്ഥാനം ഇന്നലെയാണ് രാജിവച്ചത്. ഇരുവരും തങ്ങളുടെ രാജിക്കത്ത് സ്പീക്കര്ക്ക് നല്കി. നാമനിര്ദേശ പത്രിക സമര്പ്പിക്കുന്നതിന് തൊട്ടുമുന്പായാണ് ഇരുവരും രാജി വച്ചത്. അയോഗ്യത പ്രശ്നം ഒഴിവാക്കുന്നതിനായിട്ടാണ് ജോസഫും മോന്സും രാജിവച്ചത് എന്നാണ് സൂചന.
കേരള കോണ്ഗ്രസ് എം സ്ഥാനാര്ത്ഥികളായി രണ്ടില ചിഹ്നത്തിലാണ് പി.ജെ. ജോസഫും മോന്സ് ജോസഫും 2016 നിയമസഭാ തെരഞ്ഞെടുപ്പില് മത്സരിച്ചു ജയിച്ചത്. കഴിഞ്ഞ ദിവസം പി.സി.തോമസ് നയിക്കുന്ന കേരള കോണ്ഗ്രസില് പി.ജെ.ജോസഫ് വിഭാഗം ലയിച്ചിരുന്നു. പുതിയ പാര്ട്ടിയില് ലയിച്ച ശേഷവും കേരള കോണ്ഗ്രസ് എം എംഎല്എമാരായി തുടരുന്നതിലെ നിയമപ്രശ്നം ഒഴിവാക്കാനാണ് രാജിവയ്ക്കുന്നതാണ് നല്ലത് എന്ന നിയമോപദേശത്തിന്റെ അടിസ്ഥാനത്തിലാണ് രണ്ട് പേരും രാജിവച്ചത്. ഇരുവരുടേയും രാജിക്കത്ത് ലഭിച്ചതായി സ്പീക്കറുടെ ഓഫീസ് അറിയിച്ചു.
അതേസമയം പാര്ട്ടി ചിഹ്നം സംബന്ധിച്ച് ആശയക്കുഴപ്പം തുടരുന്നതിനാല് പി.ജെ.ജോസഫ് വിഭാഗം സ്ഥാനാര്ത്ഥികള് അവസാന മണിക്കൂറാണ് നാമനിര്ദേശക പത്രിക സമര്പ്പിച്ചത്. ഇന്ന് മുതല് പത്രികകളുടെ സൂക്ഷമപരിശോധന ആരംഭിക്കുകയാണ്. കേരള കോണ്ഗ്രസിന്റെ തെരഞ്ഞെടുപ്പ് ചിഹ്നം നേരത്തെ സൈക്കിളായിരുന്നു. എന്നാല് ദേശീയ പാര്ട്ടിയായ എസ്.പിയുടെ തെരഞ്ഞെടുപ്പ് ചിഹ്നവും സൈക്കിളായതിനാല് മറ്റേതെങ്കിലും ചിഹ്നമായിരിക്കും പി.ജെ.ജോസഫ് ചെയര്മാനും മോന്സ് ജോസഫ് വൈസ് ചെയര്മാനും പിസി തോമസ് ഡെപ്യൂട്ടി ചെയര്മാനുമായ പുതിയ പാര്ട്ടിക്ക് ലഭിക്കുക.
അതേസമയം എന്ഡിഎയില് തലേദിവസം വരെയുണ്ടായിരുന്ന പിസി തോമസിന്റെ പാര്ട്ടിയിലേക്ക് പിജെ ജോസഫ് മാറിയത് യുഡിഎഫിനും തലവേദനയാണ്. ബിജെപിയെ ആഞ്ഞടിക്കുന്ന യുഡിഎഫ് ജോസഫിന്റെ കൂടുമാറ്റം മറുപടി പറയേണ്ടി വരും. ജോസഫ് ബിജെപിയിലേക്കാണെന്ന പ്രചരണമാണ് നടക്കുന്നത്.
പി സി തോമസുമായുള്ള ലയനം പി ജെ ജോസഫിന് ബിജെപിയിലേക്കുള്ള പാലമാണെന്ന് കേരള കോണ്ഗ്രസ് എം ചെയര്മാന് ജോസ് കെ മാണിയും വ്യക്തമാക്കി. കഴിഞ്ഞ ദിവസം സുരേന്ദ്രന്റെ യാത്രയില് വരെ പിസി തോമസ് പങ്കെടുത്തിരുന്നുവെന്നും എന്ഡിഎ വിട്ടെന്ന പ്രഖ്യാപനത്തിന് മുമ്പേ ലയനം നടന്നുവെന്നു ജോസ് കെ മാണി പറഞ്ഞു. ഇടതുപക്ഷ സര്ക്കാരിന്റെ തുടര്ഭരണം ഉണ്ടാകുമെന്നും അദ്ദേഹം കൂട്ടിച്ചേര്ത്തു.
കുറ്റിയാടി സീറ്റ് സിപിഎമ്മിന് വിട്ടുകൊടുത്തത് ഗ്രൗണ്ട് റിയാലിറ്റി അറിഞ്ഞതുകൊണ്ടാണെന്നും പാര്ട്ടിയുടെ കെട്ടുറപ്പാണ് ആഗ്രഹിച്ചതെന്നും ജോസ് വിശദീകരിച്ചു. പിറവത്തെ സ്ഥാനാര്ത്ഥി സിന്ധുമോള് ജേക്കബ് സിപിഎം തന്ന സ്ഥാനാര്ത്ഥിയല്ല. അവര് പഴയ കേരള കോണ്ഗ്രസ് കുടുംബാംഗമാണ്. സിന്ധുമോള്ക്കാണ് വിജയ സാധ്യതയെന്നും ജോസ് കെ മാണി കൂട്ടിച്ചേര്ത്തു. പെയ്ഡ് സീറ്റ് ആരോപണം സീറ്റ് കിട്ടാത്തവരുടേതാണെന്നും ജോസ് കെ മാണി പറഞ്ഞു.
എന്തായാലും ഒരു രണ്ടില നല്കാത്തതിന്റെ പേരില് ജോസഫിന്റെ മുഴുവന് ഇലകളും കൊഴിഞ്ഞ അവസ്ഥയാണ്.
https://www.facebook.com/Malayalivartha
