ആദ്യദിനം സഖാക്കള്‍ക്ക് വാരി കോരി നല്‍കിയ മനോരമ ന്യൂസ് സര്‍വേ രണ്ടാം ദിനം ചെന്നിത്തലയുടെ പിണക്കം മാറ്റാനാണ് ശ്രമിച്ചത്. മണിയാശാനെ പോലും തോല്‍പ്പിച്ച മനോരമയുടെ തനിരൂപം മലയാളികള്‍ ചര്‍ച്ചയാക്കിയപ്പോള്‍ ഇന്നലത്തെ ദിനം സഖാക്കളെ സുഖിപ്പിക്കാനുള്ളതായി.

മനോരമന്യൂസ് വി.എം.ആര്‍ അഭിപ്രായ സര്‍വേയുടെ മൂന്നാം ഘട്ടത്തില്‍ എല്‍.ഡി.എഫിന് മുന്നേറ്റമെന്ന് പ്രവചനം. എറണാകുളം, ആലപ്പുഴ, കോട്ടയം, പത്തനംതിട്ട ജില്ലകളിലെ 37 മണ്ഡലങ്ങളില്‍ 22 ഇടങ്ങളില്‍ ഇടതുമുന്നണിക്കും 14 സീറ്റുകളില്‍ യു.ഡി.എഫിനും സാധ്യതയെന്നാണ് സര്‍വെഫലങ്ങള്‍. ഒരു മണ്ഡലത്തില്‍ മൂന്നു മുന്നണികള്‍ക്കും വിജയിക്കാനാവില്ലെന്നും സര്‍വെ വ്യക്തമാക്കുന്നു. അങ്ങനെ 115 മണ്ഡലങ്ങളുടെ പ്രവചനത്തില്‍ എല്‍ഡിഎഫ് 63 സീറ്റ് നേടി കോണ്‍ഗ്രസിന് 50 സീറ്റാണുള്ളത്. എന്‍ഡിഎ 1, മറ്റുള്ളവര്‍ 1 എന്നിങ്ങനെയാണ്.

എറണാകുളം ജില്ലയിലെ 14 നിയമസഭാ മണ്ഡലങ്ങളില്‍ എട്ടിടത്ത് യു.ഡി.എഫും ആറിടത്ത് എല്‍.ഡി.എഫും എന്നാണ് സര്‍വെഫലം. കടുത്ത മല്‍സരത്തിനൊടുവില്‍ പെരുമ്പാവൂരില്‍ യു.ഡി.എഫ് മുന്നിലെത്തും. 3.8 ശതമാനം മാത്രമാണ് പെരുമ്പാവൂരില്‍ യു.ഡി.എഫും എല്‍.ഡി.എഫും തമ്മിലുള്ള വോട്ടുവത്യാസം.

മണ്ഡലം നിലനിര്‍ത്താന്‍ അങ്കമാലിയിലും യു.ഡി.എഫിന് നേരിടേണ്ടിവരുന്നത് അഗ്‌നിപരീക്ഷയാണ്. 5.20 ശതമാനം വോട്ടുകളുടെ മേല്‍ക്കൈയാണ് യു.ഡി.എഫിന് മണ്ഡലത്തില്‍ പ്രവചിക്കപ്പെടുന്നത്. ആലുവ ഇക്കുറിയും യു.ഡി.എഫിനൊപ്പെന്നാണ് അഭിപ്രായസര്‍വെ നല്‍കുന്ന സൂചന. മല്‍സരഫലം കേരളം ഉറ്റുനോക്കുന്ന കളമശേരിയില്‍ എല്‍.ഡി.എഫിന്റെ അട്ടിമറി മുന്നേറ്റവും സര്‍വെയുടെ പ്രവചിക്കുന്നു.

കേരള കോണ്‍ഗ്രസിന്റെ മുന്നണിമാറ്റമുണ്ടാക്കുന്ന രാഷ്ട്രീയ ചലനങ്ങള്‍ ഏറ്റവും കൂടുതല്‍ പ്രതിഫലിക്കപ്പെടുന്ന കോട്ടയത്ത് ഇടതുമുന്നണി വ്യക്തമായ ആധിപത്യം നേടുമെന്നാണ് അഭിപ്രായ സര്‍വെയുടെ പ്രവചനം. ഒന്‍പത് സീറ്റുകളുള്ള ജില്ലയില്‍ ആറിടത്ത് എല്‍.ഡി.എഫും രണ്ടിടത്ത് യു.ഡി.എഫും ഒരിടത്ത് മറ്റുള്ളവരും മുന്നിലെത്തും . കടുത്ത രാഷ്ട്രീയ ബലപരീക്ഷണം നടക്കുന്ന പാലായില്‍ ഇക്കുറി ഇടതുമുന്നണി മുന്നിലെത്തുമെന്നാണ് സര്‍വെയുടെ കണ്ടെത്തല്‍. 0.57 ശതമാനത്തിന്റെ നേരിയ മേല്‍ക്കൈ മാത്രമാണ് എല്‍.ഡി.എഫിന് പ്രവചിക്കപ്പെടുന്നത്.

ആലപ്പുഴയിലെ ഒന്‍പതില്‍ അഞ്ച് മണ്ഡലങ്ങളില്‍ എല്‍.ഡി.എഫും നാലിടത്ത് യു.ഡി.എഫും മുന്നിലെത്തുമെന്നാണ് അഭിപ്രായസര്‍വെയുടെ കണ്ടെത്തല്‍. അരൂരില്‍ എല്‍.ഡി.എഫ് മുന്നിലെത്തുമെന്നാണ് സര്‍വെയുടെ കണ്ടെത്തല്‍. ചേര്‍ത്തലയിലെ ഇടത് തേരോട്ടത്തിന് ഇക്കുറി വന്‍ മുന്നേറ്റത്തിലൂടെ യു.ഡി.എഫ് തടയിടുമെന്നും അഭിപ്രായസര്‍വെ ചൂണ്ടിക്കാട്ടുന്നു.

കഴിഞ്ഞ നിയമസഭാ തിരഞ്ഞെടുപ്പില്‍ പത്തനംതിട്ടയില്‍ നേടിയ സമ്പൂര്‍ണ ആധിപത്യം എല്‍.ഡി.എഫ് ഇക്കുറിയും ആവര്‍ത്തിക്കുമെന്നാണ് അഭിപ്രായ സര്‍വെയുടെ കണ്ടെത്തല്‍.

തിരുവല്ല, റാന്നി, കോന്നി, ആറന്മുള, അടൂര്‍ മണ്ഡലങ്ങള്‍ ഇടതുപക്ഷത്തിന് രാഷ്ട്രീയ ഹൃദയത്തില്‍ ഇടമൊരുക്കുമെന്നാണ് സര്‍വെയുടെ കണ്ടെത്തല്‍. ജില്ലയില്‍ സമഗ്രാധിപത്യ സ്വഭാവം കാട്ടുമ്പോഴും അടൂര്‍ മണ്ഡലത്തില്‍ കടുത്ത പരീക്ഷണമാണ് ഇടതുമുന്നണി നേരിടുന്നത്. 4.5 ശതമാനം വോട്ടുകളുടെ നേരിയ വ്യത്യാസം മാത്രമാണ് ഇവിടെ എല്‍.ഡി.എഫും യു.ഡി.എഫും തമ്മിലുള്ളത്. കോന്നിയില്‍ യു.ഡി.എഫിനും എന്‍.ഡി.എയും വോട്ടുവിഹിതത്തില്‍ ഏറെക്കുറെ ഒപ്പത്തിനൊപ്പമെത്തുമെന്ന നിരീക്ഷണവും അഭിപ്രായസര്‍വെ പങ്കുവയ്ക്കുന്നു.

അങ്ങനെ ഇന്നത്തെ ദിവസം നിര്‍ണായകമാക്കി മാറ്റിയിരിക്കുകയാണ് മനോരമ. എന്തായാലും തുടര്‍ഭരണത്തിലേക്കാണ് മനോരമയും പോകുന്നത്. 35 മണ്ഡലങ്ങളുടെ ഫലം വരാനുള്ളപ്പോള്‍ ഈ 8 സീറ്റ് വളരെ എളുപ്പമാണ്. അതിനാല്‍ തന്നെ മനോരമയെ വിശ്വസിച്ച ചെന്നിത്തല വയലന്റ് ആകാന്‍ സാധ്യതയുണ്ട്.