വോട്ടഭ്യര്‍ത്ഥിക്കാന്‍ പോകുമ്പോള്‍ ജനങ്ങളില്‍ നിന്നും മറുചോദ്യം ഉണ്ടാകുക സ്വാഭാവികമാണ്. അതിനെല്ലാം കടിച്ച് പിടിച്ച് ക്ഷമയോടെ മറുപടി നല്‍കുക പതിവാണ്. എന്നാല്‍ നമ്മുടെ പിസി ജോര്‍ജ് വോട്ടഭ്യര്‍ത്ഥനയിലും വേറിട്ട കാഴ്ചയായി. ഈരാട്ടുപേട്ടയില്‍ വോട്ടഭ്യര്‍ത്ഥിക്കുന്നതിനിടയിലാണ് കൂകല്‍ വന്നത് ഉടനെ പ്രസംഗം നിര്‍ത്തി പഴയ സ്വഭാവം പുറത്തെടുക്കുകയായിരുന്നു.

ഒരു സ്ഥാനാര്‍ത്ഥി വന്നാല്‍ വോട്ട് ചോദിക്കാന്‍ അവകാശമില്ലെന്ന് ആരാ പറഞ്ഞേ? ഒടനെ കൂവും. നീയിവിടെ കൂവിക്കൊണ്ടിരിക്കും. ഞാന്‍ കാണിച്ചുതരാം. മെയ് രണ്ടാം തീയതി കഴിഞ്ഞാല്‍ ഞാന്‍ എം.എല്‍.എയാണെന്ന് നീ ഓര്‍ത്തോ. നിന്റെ വോട്ട് ഇല്ലാതെ തന്നെ ഞാന്‍ എം.എല്‍.എയായി ഇവിടെ വരും. അപ്പൊ നീ കൂവണം. രണ്ടാം തീയതി... മനസിലായില്ലേ? അതോണ്ട് അങ്ങനെ പേടിപ്പിക്കരുത്.

സൗകര്യമുണ്ടെങ്കില്‍ നീയൊക്കെ വോട്ട് ചെയ്താല്‍ മതി. മനസിലാക്കിക്കോ. ഇതാണോ രാഷ്ട്രീയം? ഇലക്ഷന്‍ കമ്മീഷനില്‍ ഒരു പരാതി കൊടുത്താല്‍ നീയൊക്കെ ജയിലില്‍ പോയി കിടക്കും. എന്റെ മര്യാദ കൊണ്ടാ അത് ചെയ്യാത്തെ. മനസിലായോ? കൂവിയോടിച്ചാല്‍ ഓടുന്ന ഏഭ്യനല്ലെടാ ഞാന്‍.

നീയൊക്കെ മനസിലാക്കാന്‍ വേണ്ടി പറയുകയാ. ഏപ്രില്‍ ആറാം തീയതി നടക്കുന്ന നിയമസഭാ തിരഞ്ഞെടുപ്പില്‍ ജനപക്ഷം സ്ഥാനാര്‍ത്ഥിയായിട്ടാണ് മത്സരിക്കുന്നത്. എന്റെ ചിഹ്നം തൊപ്പിയാണ്. സൗകര്യമുള്ളവന് തൊപ്പിയില്‍ വോട്ട് ചെയ്യാം. വോട്ട് ചെയ്തില്ലേലും എനിക്ക് വിരോധമില്ല. മനസിലായല്ലോ?എന്നെയാ പേടിപ്പിക്കുന്നെ.

ഈരാറ്റുപേട്ടയില്‍ ജനിച്ചുവളര്‍ന്ന ഞാന്‍ എവിടെ പോകാനാടാ? ഇവിടെത്തന്നെ കിടക്കും മനസിലായോ? നീയല്ല, ആര് തെറി പറഞ്ഞാലും ഓടുന്നവനല്ല ഞാന്‍. ആര് കൂവിയാലും ഓടുന്നവനല്ല ഞാന്‍. ഇതിനു മുന്‍പും കൂവിയിട്ടുണ്ട്. മനസിലായോ? ഇങ്ങനെ തന്നെ പോകും. മനസിലായോ? പിന്നേ.. വര്‍ത്താനം പറയുന്നു. പോടാ അവിടന്ന്...നീ ആരെ പേടിപ്പിക്കാന്‍? സന്മനസുള്ളവര്‍.. എനിക്ക് വോട്ട് ചെയ്യണം എന്നഭ്യര്‍ത്ഥിച്ചുകൊണ്ട് എന്റെ എളിയ വാക്കുകള്‍ ഉപസംഹരിക്കുന്നു.. നന്ദി... നമസ്‌കാരം.

വെല്ലുവിളിച്ച സംഭവത്തില്‍ അവസാനം ഒന്നൊന്നര ട്വിസ്റ്റാണ് ഉണ്ടായത്. കൂക്കിവിളിയെ തുടര്‍ന്ന് ഈരാറ്റുപേട്ട നഗരസഭാ പരിധിയിലെ പ്രചാരണം അവസാനിപ്പിക്കുകയാണെന്ന് പി.സി. ജോര്‍ജ് പിന്നീട് അറിയിച്ചു. ഫേസ് ബുക്ക് പോസ്റ്റിലൂടെ ഇന്നലെ അറിയിച്ചു. ഭയന്നിട്ടാണെന്ന് ആരും തെറ്റിദ്ധരിക്കരുത്. എന്റെ നാടിനെ വര്‍ഗീയതയിലേക്ക് തള്ളിവിടാതിരിക്കാനാണ് മുനിസിപ്പാലിറ്റി പരിധിയിലെ തിരഞ്ഞെടുപ്പ് പ്രചാരണം നിറുത്തിയത്. ഈരാറ്റുപേട്ട തീക്കോയ് പഞ്ചായത്തില്‍ പ്രചാരണത്തിനെത്തിയ തന്നെ പ്രസംഗിക്കാന്‍ അനുവദിക്കാതെ എസ്.ഡി.പി.ഐ പ്രവര്‍ത്തകരാണ് കൂകി വിളിച്ചതെന്നും അദ്ദേഹം ആരോപിച്ചു.

എന്തായാലും പിസി ജോര്‍ജിന്റെ വോട്ട് പിടിത്തവും കൂകലും തിരികെയുള്ള വെല്ലുവിളിയും വൈറലായിട്ടുണ്ട്. യുഡിഎഫിലും എല്‍ഡിഎഫിലും ചേക്കാറാന്‍ അവസാനംവരെ ശ്രമിച്ച ആളാണ് പിസി ജോര്‍ജ്.

എന്നാല്‍ പിസി ജോര്‍ജിനെ എടുത്താല്‍ ഭാവിയില്‍ ഉണ്ടാകുന്ന പ്രശ്‌നമോര്‍ത്ത് ആരും പരിഗണിച്ചില്ല. അതോടെ എന്‍ഡിഎയിലേക്കായി ചായ്‌വ്. ഈ തെരഞ്ഞെടുപ്പ് പിസി ജോര്‍ജിനെ സംബന്ധിച്ചും നിര്‍ണായകമാണ്. അതിനിടെയാണ് ഈരാട്ടു പേട്ടയിലെ കൂകലും വെല്ലുവിളിയും.