കേരള നിയമസഭ തെരഞ്ഞെടുപ്പിന് മുന്നോടിയായി എന്‍.ഡി.എയുടെ പ്രചാരണ പരിപാടികളില്‍ പങ്കെടുക്കാന്‍ കേന്ദ്ര ആഭ്യന്തര മന്ത്രി അമിത് ഷാ കൊച്ചിയിലെത്തി.
ഇന്നലെ രാത്രി പ്രത്യേക വിമാനത്തിലെത്തിയ അമിത് ഷാ എറണാകുളം, തൃശ്ശൂര്‍ ജില്ലകളിലെ തെരഞ്ഞെടുപ്പ് ചുമതലയുള്ള പ്രവര്‍ത്തകരുമായി കൂടിക്കാഴ്ച നടത്തി.ഇന്ന് വിവിധ പരിപാടികളില്‍ അമിത് ഷാ പങ്കെടുക്കും.

തൃപ്പൂണിത്തുറ സ്റ്റാച്യു ജങ്ഷനില്‍ നിന്നുള്ള റോഡ്‌ഷോയ്ക്ക് ശേഷം കോട്ടയം , കൊല്ലം, പാലക്കാട് ജില്ലകളില്‍ നടക്കുന്ന തെരഞ്ഞെടുപ്പ് പ്രചാരണ പരിപാടികളില്‍ അദ്ദേഹം സംസാരിക്കും.

അതേസമയം, തലശ്ശേരിയിലെ എന്‍ഡിഎ സ്ഥാനാര്‍ഥിയുടെ പത്രിക തള്ളിയതിനെ തുടര്‍ന്ന് തലശ്ശേരി മണ്ഡലത്തില്‍ നിശ്ചയിച്ചിരുന്ന പരിപാടി കേന്ദ്ര ആഭ്യന്തര മന്ത്രി അമിത് ഷാ റദ്ദാക്കി. സ്ഥാനാര്‍ഥികളില്ലാതായ ഗുരുവായൂര്‍, തലശ്ശേരി മണ്ഡലങ്ങളില്‍ ബദല്‍ മാര്‍ഗങ്ങള്‍ക്കായുള്ള നീക്കം ബിജെപി സജീവമാക്കി.

തലശ്ശേരി മണ്ഡലത്തില്‍ ആരെ പിന്തുണയ്ക്കണം എന്ന കാര്യത്തില്‍ ബിജെപി തീരുമാനത്തിലെത്തിയിട്ടില്ല. സംസ്ഥാന നേതൃത്വം നിലപാട് പ്രഖ്യാപിക്കുമെന്നാണ് ജില്ലാ നേതൃത്വത്തിന്റെ പ്രതികരണം.

പുതിയ പാര്‍ട്ടി രൂപീകരിച്ച് മത്സരിക്കുന്ന മുന്‍ സിപിഎം നേതാവ് സി.ഒ.ടി.നസീര്‍ ബിജെപിയുടെ പിന്തുണ വേണ്ടെന്ന് ഇതിനോടകം വ്യക്തമാക്കിയിട്ടുണ്ട്. അപരന്മാരും, സ്വതന്ത്രരുമാണ് നിലവില്‍ ബിജെപിക്കു മുന്നിലുള്ള പോംവഴി.

തലശ്ശേരിയില്‍ സ്വീകരിക്കുന്ന നിലപാട് കണ്ണൂര്‍ ജില്ലയിലെ പാര്‍ട്ടിയുടെ തിരഞ്ഞെടുപ്പ് സാധ്യതകളെ ബാധിക്കുമെന്നതിനാല്‍ ആശയക്കുഴപ്പത്തിലാണ് നേതൃത്വം. മണ്ഡലത്തില്‍ വ്യാഴാഴ്ച നടത്താനിരുന്ന അമിത് ഷായുടെ പ്രചാരണ പരിപാടിയാണ് റദ്ദാക്കിയത്.