മാറ്റിനിര്ത്തിയത് നന്നായി... ഈ തെരഞ്ഞെടുപ്പില് പി ശ്രീരാമകൃഷ്ണനെ സൗകര്യപൂര്വം പാര്ട്ടി മാറ്റി നിര്ത്തിയത് നന്നായി; സ്പീക്കര് പദവിയുടെ കാലാവധി കഴിയുന്നതോടെ ഇനിയെങ്ങനെ പിടിച്ചു നില്ക്കും; ഷാര്ജയിലെ യൂണിവേഴ്സിറ്റി വലിയ ചര്ച്ചയാകുമ്പോള് ഞാനൊന്നുമറിഞ്ഞില്ലേ എന്നമട്ടില് തള്ളിക്കളഞ്ഞ് ശ്രീരാമകൃഷ്ണന് രംഗത്ത്
സ്പീക്കര് പി ശ്രീരാമകൃഷ്ണന് വിദേശത്ത് വിദ്യാഭ്യാസ സ്ഥാപനത്തില് നിക്ഷേപമുണ്ടെന്ന സ്വപ്നയുടെ മൊഴി ഇന്നലെ പുറത്തായിരുന്നു. സൗജന്യ ഭൂമിക്കായി ഷാര്ജ ഭരണാധികാരിയുമായി ചര്ച്ച നടത്തിയെന്ന വാര്ത്തയും വന്നു. ഇതോടെയാണ് ശ്രീരാമകൃഷ്ണന് പൊന്നാനിയില് സീറ്റ് നല്കാത്തത് നന്നായി എന്ന് തോന്നിയത്.
പാര്ട്ടി ഇത് മുന്കൂട്ടി കണ്ടത് നന്നായി. അല്ലെങ്കില് ഇപ്പോള് കാണാമായിരുന്നു. ഇഡിക്കും ഇപ്പോള് തിരക്കില്ല. ശ്രീരാമകൃഷ്ണന്റെ സ്പീക്കര് പദവി ഉടന് തീരും. അപ്പോള് സൗകര്യപൂര്വം ചോദ്യം ചെയ്യാമല്ലോ.
അതേസമയം ഗള്ഫിലെ വിദ്യാഭ്യാസ സ്ഥാപനത്തില് തനിക്ക് നിക്ഷേപമുണ്ടെന്ന പേരില് പുറത്തുവന്ന സ്വപ്ന സുരേഷിന്റെ മൊഴി തളളി സ്പീക്കര് പി. ശ്രീരാമകൃഷ്ണന് രംഗത്തെത്തി. പുറത്തുവരുന്ന വിവരങ്ങള് അസംബന്ധവും അബദ്ധജഡിലവുമാണ്. ഗള്ഫില് വിദ്യാഭ്യാസ സ്ഥാപനം നടത്തുന്ന ലഫീര് അഹമ്മദിനെ പരിചയമുണ്ട്. അതിന്റെ പേരില് തനിക്ക് അവിടെ നിക്ഷേപമുണ്ടെന്ന് പറയുന്നത് ശുദ്ധ അസംബന്ധമാണ്. സ്പീക്കര് പ്രസ്താവനയില് പറയുന്നു.
കേന്ദ്ര ഏജന്സികള് രാഷ്ട്രീയ താല്പര്യമുളള പ്രചാരകരുടെ വേഷംകെട്ടുകയാണ്. താന് ഷാര്ജ ഷെയ്ക്കിനെ തനിയെ കണ്ടിട്ടില്ലെന്നുംഅത് പുതിയ കെട്ടുകഥയാണെന്നും സ്പീക്കര് ആരോപിച്ചു. സ്വപ്നയുടെ മൊഴി പ്രത്യേകം അന്വേഷണ വിധേയമാക്കണമെന്നും സ്പീക്കര് ആവശ്യപ്പെട്ടു.
സ്പീക്കര് ശ്രീരാമകൃഷ്ണന് ഷാര്ജയില് മിഡില് ഈസ്റ്റ് കോളേജിന്റെ ശാഖ തുടങ്ങാന് ഷാര്ജ ഭരണാധികാരിയുമായി അനൗദ്യോഗിക ചര്ച്ച നടത്തിയിരുന്നതായി സ്വപ്ന സുരേഷിന്റെ നിര്ണായക മൊഴി ഇന്നലെയാണ് പുറത്തായത്. തിരുവനന്തപുരത്തെ ലീലാ ഹോട്ടലില്വച്ചായിരുന്നു ഈ ചര്ച്ച. വാക്കാല് ഷാര്ജ ഭരണാധികാരി നല്കിയ ഉറപ്പില് ശ്രീരാമകൃഷ്ണന് പിന്നീട് ഷാര്ജ സന്ദര്ശിക്കുകയും ചെയ്തിരുന്നതായാണ് വിവരം. ഹൈക്കോടതിയില് എന്ഫോഴ്സ്മെന്റ് ഡയറക്ടറേറ്റ് ക്രൈംബ്രാഞ്ചിനെതിരായി നല്കിയ ഹര്ജിയിലാണ് സ്വപ്നയുടെ നിര്ണായക മൊഴിയുളളത്.
ലഫീര് എന്ന പൊന്നാനി സ്വദേശിയുടെ ഉടമസ്ഥതയിലുളള ഒമാനിലെ മിഡില് ഈസ്റ്റ് കോളേജിന്റെ ശാഖ ഷാര്ജയില് തുടങ്ങുന്നതിന് സൗജന്യ ഭൂമി ലഭിക്കുന്നതിനായിരുന്നു ഷാര്ജ ഭരണാധികാരിയുമായി സ്പീക്കര് ശ്രീരാമകൃഷ്ണന് ചര്ച്ച നടത്തിയത്. സ്പീക്കര്ക്കും ഈ സ്ഥാപനത്തില് ഷെയറുളളതായാണ് പറയപ്പെടുന്നത്. സ്ഥാപനം ആരംഭിക്കുന്നതിന് യുഎഇയിലെ ഉദ്യോഗസ്ഥരെ സ്പീക്കര് സന്ദര്ശിക്കുകയും ചര്ച്ച നടത്തുകയും ചെയ്തതായാണ് സ്വപ്നയുടെ മൊഴി.
എന്നാല് സ്വപ്നയുടെ ചോദ്യാവലിയുടെ രേഖയല്ലാതെ മറ്റ് തെളിവുകള് ഇ.ഡി സമര്പ്പിച്ചിട്ടില്ല. ഡോളര് കടത്ത് കേസില് സ്പീക്കര് ശ്രീരാമകൃഷ്ണന് പങ്കുണ്ടെന്നാണ് ഇ.ഡി മുന്പ് അറിയിച്ചത്. ഗള്ഫിലെ വിദ്യാഭ്യാസ സ്ഥാപനത്തില് നിക്ഷേപമായി സ്പീക്കര് ഡോളര് കൊടുത്തുവിട്ടു എന്നാണ് ഇ.ഡി പറയുന്നത്.
എന്നാല് ഈ കേസില് സ്പീക്കറെ ഇതുവരെ ഇ.ഡിയ്ക്ക് ചോദ്യം ചെയ്യാന് കഴിഞ്ഞിട്ടില്ല. സ്പീക്കര്ക്ക് ഭരണഘടനാപരമായ സംരക്ഷണമുളളതാണ് ഇ.ഡിയ്ക്ക് തിരിച്ചടിയായത്. സ്പീക്കറുടെ ആവശ്യത്തിന് 2018 ഏപ്രിലില് സ്വപ്ന ഒമാനില് സന്ദര്ശനം നടത്തിയിരുന്നു. അന്ന് എം.ശിവശങ്കറും ഇവിടം സന്ദര്ശിച്ചിരുന്നതായാണ് വിവരം.
എന്തായാലും തെരഞ്ഞെടുപ്പ് കഴിയുന്നതോടെ ശ്രീരാമകൃഷ്ണന് കോളായിരിക്കുമെന്ന് ഉറപ്പാണ്. സ്പീക്കര് പദവിയുടെ കാലാവധി കഴിയുമ്പോള് ഒന്നൊന്നര വരവായി ഇഡിയെത്തും. പഴയതുള്പ്പെടെ എണ്ണിയെണ്ണി ചോദിക്കാന്.
"
https://www.facebook.com/Malayalivartha
