ചെലപ്പം ശരിയായാലോ... സ്വര്ണക്കടത്ത് കേസുമായി ബന്ധപ്പെട്ട ഒരാള് ദുരൂഹസാഹചര്യത്തില് മരിച്ചെന്ന് ശംഖുമുഖത്ത് പ്രസംഗിച്ച് പോയ അമിത്ഷാ വീണ്ടുമെത്തുമ്പോള് ഉത്തരം തേടി മലയാളികള്; തെരഞ്ഞെടുപ്പ് പ്രചരണത്തിനെത്തിയ അമിത്ഷായുടെ ഓരോ വാക്കും പ്രധാനം
സ്വര്ണക്കടത്ത് കേസുമായി ബന്ധപ്പെട്ട ഒരാള് ദുരൂഹസാഹചര്യത്തില് മരിച്ചെന്ന് ശംഖുമുഖത്ത് നടന്ന ബിജെപി വിജയ് യാത്രയുടെ സമാപന സമ്മേളനത്തില് കേന്ദ്ര അഭ്യന്തരമന്ത്രി അമിത് ഷാ പറഞ്ഞത് ഏറെ ഒച്ചപാടുണ്ടാക്കി. പ്രതിപക്ഷം അതായുധമാക്കിയപ്പോള് അതാരാണെന്ന് അമിത്ഷാ തന്നെ പറയട്ടെയെന്നായി ഭരണപക്ഷം. ഇതോടെ അമിത്ഷായുടെ വരവിന് പുതിയ മാനം നല്കിയിരിക്കുന്നത്.
അമിത് ഷാ കൊച്ചിയിലെത്തി കഴിഞ്ഞു. ഉജ്ജ്വല സ്വീകരണം നല്കിയാണ് അമിത്ഷായെ സ്വീകരിച്ചത്. ഇന്നലെ രാത്രി ഒന്പതരയോടെയാണ് അമിത് ഷാ നെടുമ്പാശേരി വിമാനത്താവളത്തിലെത്തിയത്. ഇന്ന് നടക്കുന്ന എന്ഡിഎയുടെ പ്രചാരണ റാലിയില് പങ്കെടുത്ത് പ്രകടനപത്രിക പുറത്തിറക്കാനായാണ് അമിത്ഷാ കേരളത്തിലെത്തിയത്.
ഇന്ന് രാവിലെ 10.30ന് തൃപ്പൂണിത്തുറയില് നടക്കുന്ന റോഡ് ഷോയില് അമിത് ഷാ പങ്കെടുക്കും. ശേഷം 11 30ഓടെ കാഞ്ഞിരപ്പള്ളിയില് എത്തും. പൊന്കുന്നം ശ്രേയസ് പബ്ലിക് സ്കൂള് മൈതാനത്ത് പൊതു സമ്മേളനത്തെ അഭിസംബോധന ചെയ്യും.
1.40ന് കാഞ്ഞിരപ്പള്ളിയില് നിന്ന് ഹെലികോപ്റ്ററില് ചാത്തന്നൂരിലേക്ക പോകും. 2.30ന് പുറ്റിങ്ങല് ദേവീ ക്ഷേത്ര മൈതാനത്ത് പൊതുസമ്മേളനത്തില് സംസാരിക്കും. 4. 55ഓടെ മലമ്പുഴ മണ്ഡലത്തിലെ കഞ്ചിക്കോട്ട് എത്തുന്ന അമിത് ഷാ കഞ്ചിക്കോടു മുതല് സത്രപ്പടിവരെ റോഡ് ഷോ നയിക്കും. ശേഷം തെരഞ്ഞെടുപ്പ് പ്രചാരണ പരിപാടികളില് പങ്കെടുക്കാന് കോയമ്പത്തൂരിലേക്ക് പോകും.
കേന്ദ്ര ആഭ്യന്തര മന്ത്രി അമിത്ഷായുടെ സന്ദര്ശനം പ്രമാണിച്ച് ബുധനാഴ്ച പരവൂര് നഗരത്തിലും പാരിപ്പള്ളിപരവൂര് റോഡിലും ഗതാഗതനിയന്ത്രണം ഏര്പ്പെടുത്തും. കാഞ്ഞിരപ്പള്ളിയില്നിന്ന് ഹെലിക്കോപ്റ്ററില് മീനമ്പലം യു.കെ.എഫ്. കോളേജ് മൈതാനത്ത് ഉച്ചയ്ക്ക് 2.10ന് അമിത്ഷാ എത്തും.
വാഹനവ്യൂഹം യു.കെ.എഫ്.മൈതാനത്തുനിന്ന് പരവൂരിലേക്ക് തിരിക്കുന്നതിന് 20 മിനിട്ടുമുമ്പ് പാരിപ്പള്ളിമുതല് പരവൂര് പുറ്റിങ്ങല്വരെ ഗതാഗതം നിയന്ത്രിക്കും. മടക്കയാത്രയ്ക്ക് 20 മിനിട്ട് മുമ്പും ഈ രീതി തുടരും. പരവൂര് നഗരത്തില് ഒന്നുമുതല് വൈകീട്ട് നാലരവരെ ഗതാഗതനിയന്ത്രണമുണ്ടാകുമെന്ന് പരവൂര് എസ്.ഐ. വിജിത് കെ.നായര് അറിയിച്ചു. ചൊവ്വാഴ്ച ഉച്ചയ്ക്ക് യു.കെ.എഫ്. മൈതാനത്തുനിന്ന് പുറ്റിങ്ങല് ക്ഷേത്രമൈതാനംവരെ പോലീസ് ട്രയല് റണ് നടത്തി.
സി.പി.എമ്മിന്റെ ശക്തി കേന്ദ്രമായ തലശ്ശേരിയില് കേന്ദ്ര ആഭ്യന്തര മന്ത്രിയെ തന്നെ കൊണ്ടുവന്ന് പ്രചാരണ രംഗത്ത് ഒരു ഓളമുണ്ടാക്കാം എന്ന ബിജെപിയുടെ ശ്രമം പൊളിഞ്ഞ കാഴ്ചയും കണ്ടു.
കഴിഞ്ഞ തവണത്തെ ശംഖുമുഖം പ്രസംഗത്തിലെ ചോദ്യം ഇപ്പോഴും അവശേഷിക്കുകയാണ്. ഡോളര്ക്കടത്ത് കേസിലെ പ്രധാന പ്രതി നിങ്ങളുടെ ഓഫീസില് ജോലി ചെയ്തിരുന്ന ആളാണെന്നത് ശരിയാണോ? സ്വര്ണക്കള്ളക്കടത്ത് കേസിലെ പ്രതിയെ മാസം മൂന്ന് ലക്ഷം രൂപ നല്കി നിങ്ങള് നിയമിച്ചത് ശരിയാണോ?
നിങ്ങളുടെ പ്രിന്സിപ്പല് സെക്രട്ടറി ഈ പ്രതിക്ക് വ്യാജബിരുദത്തിന്റെ അടിസ്ഥാനത്തില് സര്ക്കാര് ജോലി നല്കിയത് ശരിയാണോ? നിങ്ങളും നിങ്ങളുടെ പ്രിന്സിപ്പല് സെക്രട്ടറിയും വിദേശയാത്രയില് പ്രതിയായ ഈ സ്ത്രീയെ സര്ക്കാര് ചെലവില് പങ്കെടുപ്പിച്ചുവോ?
സ്വര്ണക്കടത്ത് കേസിലെ പ്രതിയായ സ്ത്രീ മുഖ്യമന്ത്രിയുടെ ഓഫീസിലെ സന്ദര്ശകയാണെന്ന ആരോപണം ശരിയാണോ? സ്വര്ണകടത്ത് ഉണ്ടായപ്പോള് മുഖ്യമന്ത്രിയുടെ ഓഫീസില് നിന്നും കസ്റ്റംസ് ഉദ്യോഗസ്ഥര്ക്ക് സമ്മര്ദമുണ്ടായിട്ടുണ്ടോ? ആ നടപടി ശരിയാണോ? സംശയാസ്പദമായ ഒരു മരണം ഉണ്ടായി. അതില് ശരിയായ ദിശയില് അന്വേഷണം നടന്നോ? പൊതുജീവിതം നയിക്കുന്നവര് ചോദ്യങ്ങള്ക്ക് സുതാര്യമായി മറുപടി പറയണം. എന്തെങ്കിലും വിളിച്ചു പറഞ്ഞിട്ടു കാര്യമില്ല. മുഖ്യമന്ത്രിയെ ആശയക്കുഴപ്പത്തിലാക്കാന് അല്ല ചോദ്യങ്ങള് ചോദിക്കുന്നത്. ചോദ്യങ്ങള്ക്ക് മറുപടി നല്കിയാല് മതി. എന്നാണ് അമിത് ഷാ പറഞ്ഞത്. അതിനാരും ഉത്തരം പറയാത്തതിനാല് അമിത്ഷ് ചിലപ്പോള് ഇന്ന് ഉത്തരം പറയുമായിരിക്കും.
"
https://www.facebook.com/Malayalivartha