പ്രതിപക്ഷ നേതാവ് രമേശ് ചെന്നിത്തല ഭയന്നത് തന്നെ സംഭവിച്ചു. സംസ്ഥാനത്ത് എല്‍ഡിഎഫിന് തുടര്‍ഭരണം പ്രവചിച്ച് മനോരമ ന്യൂസ് വിഎംആര്‍ അഭിപ്രായ സര്‍വേ. ഇതാദ്യമാണ് നടത്തിയ പത്തോളം സര്‍വേകള്‍ ഒരുപോലെ ഭരണത്തുടര്‍ച്ച പറയുന്നത്.

എല്‍ഡിഎഫിന് 77 മുതല്‍ 82 വരെ സീറ്റ് ലഭിച്ചേക്കാം. യുഡിഎഫിന് 54 മുതല്‍ 59 വരെ സീറ്റാണ് സര്‍വേ സൂചിപ്പിക്കുന്നത്. എന്‍ഡിഎയ്ക്ക് 3 സീറ്റ് വരെയും മറ്റുള്ളവര്‍ക്ക് ഒരു സീറ്റും പ്രവചിക്കുന്നു. പ്രവചനത്തില്‍ 3% വരെ വ്യത്യാസം ഉണ്ടായേക്കാം. പല മണ്ഡലങ്ങളിലും സ്ഥാനാര്‍ഥി പ്രഖ്യാപനത്തിനു മുന്‍പായിരുന്നു സര്‍വേ നടത്തിയത്.

എല്‍ഡിഎഫ് 43.65%, യുഡിഎഫ് 37.37%, എന്‍ഡിഎ 16.46%, മറ്റു കക്ഷികള്‍ 2.52 ശതമാനം എന്നിങ്ങനെയാണ് ലഭിക്കാന്‍ സാധ്യതയുള്ള വോട്ട് വിഹിതം. മഞ്ചേശ്വരം, നേമം, തിരുവനന്തപുരം മണ്ഡലങ്ങളിലാണ് എന്‍ഡിഎയ്ക്ക് അനുകൂലമായ സാധ്യതകള്‍. പൂഞ്ഞാറില്‍ മൂന്ന് മുന്നണികള്‍ക്കും പുറത്തുള്ള സ്ഥാനാര്‍ഥിക്ക് അനുകൂലമായ പശ്ചാത്തലം ചൂണ്ടിക്കാട്ടുന്നു.


മുഖ്യമന്ത്രിയാകാന്‍ യോഗ്യനായ നേതാവ് പിണറായി വിജയനാണെന്ന് സര്‍വേയില്‍ പങ്കെടുത്ത 39 ശതമാനം പേര്‍ അഭിപ്രായപ്പെട്ടു. 26 ശതമാനം പേരുടെ പിന്തുണയുമായി ഉമ്മന്‍ചാണ്ടിയാണ് രണ്ടാമത്. കെ.കെ.ശൈലജയെ 12 ശതമാനവും രമേശ് ചെന്നിത്തലയെ 11 ശതമാനവും ബിജെപി സംസ്ഥാന അധ്യക്ഷന്‍ കെ.സുരേന്ദ്രനെ 5 ശതമാനവും വി.മുരളീധരനെ 3 ശതമാനവും പിന്തുണച്ചു. പ്രമുഖരായ ആറു നേതാക്കാളുടെ പേരുകളെ അനുകൂലിക്കാതെ മറ്റൊരാള്‍ വരണം എന്ന് നാലു ശതമാനം വോട്ടര്‍മാര്‍ അഭിപ്രായപ്പെട്ടു.

ശബരിമല തിരഞ്ഞെടുപ്പ് വിഷയമാണെന്ന് കരുതുന്ന 43% പേരുണ്ട്. 33% അങ്ങനെ കരുതുന്നില്ല. സോളര്‍ കേസ് സിബിഐയ്ക്ക് വിട്ടത് രാഷ്ട്രീയ ലക്ഷ്യത്തോടെയാണെന്ന് ഭൂരിഭാഗം പേരും കരുതുന്നു. രാഷ്ട്രീയമില്ല എന്ന നിലപാടെടുത്തത് 22% മാത്രമാണ്. സര്‍വേയില്‍ പങ്കെടുത്ത 39% പേര്‍ സ്വര്‍ണക്കടത്തു കേസില്‍ സര്‍ക്കാരിന് ഉത്തരവാദിത്തമുണ്ടെന്ന അഭിപ്രായക്കാരാണ്. ഉത്തരവാദിത്തമില്ലെന്ന് 34% അഭിപ്രായപ്പെട്ടു. 27% വ്യക്തമായ നിലപാടെടുത്തില്ല.

മുംബൈ ആസ്ഥാനമായി പ്രവര്‍ത്തിക്കുന്ന പ്രമുഖ തിരഞ്ഞെടുപ്പ് വിശകലന സ്ഥാപനമായ വോട്ടേഴ്‌സ് മൂഡ് റിസര്‍ച്ച് (വിഎംആര്‍) ഫെബ്രുവരി 15 മുതല്‍ മാര്‍ച്ച് 15 വരെ സംസ്ഥാനത്തെ 140 നിയോജക മണ്ഡലങ്ങളിലെ 27,000 വോട്ടര്‍മാരെ നേരില്‍ക്കണ്ടാണ് അഭിപ്രായ സര്‍വേ നടത്തിയത്. ഇത്തവണത്തെ നിയമസഭാ തിരഞ്ഞെടുപ്പില്‍ ഓരോ മണ്ഡലത്തിലേയും ഫലസൂചനകള്‍ പ്രവചിക്കുന്ന ഏക സര്‍വേയാണിത്.

നാല് ഘട്ടങ്ങളിലായി നടത്തിയ മനോരമയുടെ സര്‍വേ എങ്ങനെയാകുമെന്ന് എല്ലാവരും ഉറ്റുനോക്കിയിരുന്നു. മനോരമയായതിനാല്‍ യുഡിഎഫിനായി പൊടിക്കൈകള്‍ ചെയ്യുമെന്നായി സഖാക്കള്‍ ആരോപിച്ചു. അത് രണ്ടാം ദിവസത്തോടെ തെളിഞ്ഞതാണ്. എന്നാല്‍ മൂന്നും നാലും ദിവസം വീണ്ടും സര്‍വേ ആവേശം നല്‍കി.

നാലാം ദിനത്തിലെ തിരുവനന്തപുരം, കൊല്ലം ജില്ലകളിലെ 25 മണ്ഡലങ്ങളില്‍ 19 ലും ഇടതുമുന്നണി മുന്നിലെത്തുമെന്ന് അഭിപ്രായസര്‍വെ ചൂണ്ടിക്കാട്ടുന്നു. തിരുവനന്തപുരം ജില്ലയിലെ രണ്ട് മണ്ഡലങ്ങളില്‍ എന്‍.ഡി.എയ്ക്ക് അനുകൂല സാഹചര്യങ്ങളുണ്ടെന്നും സര്‍വെഫലങ്ങള്‍ വ്യക്തമാക്കുന്നു.

മണ്ഡലങ്ങളുടെ എണ്ണംകൊണ്ടും ജനപക്ഷ രാഷ്ട്രീയത്തെ ഉയര്‍ത്തിപ്പിടിക്കുന്ന പാരമ്പര്യംകൊണ്ടും സമ്പന്നമായ രണ്ട് ജില്ലകളാണ് തിരുവന്തപുരം, കൊല്ലം ജില്ലകള്‍. കേരളം ആരുഭരിക്കും എന്ന് നിശ്ചയിക്കാന്‍ കെല്‍പ്പുള്ള ഉറച്ച രാഷ്ട്രീയ കാഴ്ചപ്പാടുകള്‍ ജനവിധിയിലൂടെ വരച്ചിട്ട ചരിത്രമുള്ള രണ്ട് ജില്ലകള്‍.

തെക്കന്‍ കേരളത്തിലെ ഈ ജില്ലകളിലെ 25 മണ്ഡലങ്ങളിലെ വോട്ടര്‍മാരുടെ ഉള്ളിലിരിപ്പിന്റെ ഉള്ളറകള്‍ വെളിവാകുമ്പോഴും ഇടതുമുന്നണിക്ക് ആശ്വാസത്തിന് വകയുണ്ടെന്നാണ് മനോരമ ന്യൂസ് വി.എം.ആര്‍ അഭിപ്രായ സര്‍വെഫലങ്ങള്‍ നല്‍കുന്ന സൂചനകള്‍. എന്തായാലും സ്വന്തം മനോരമയുടെ സര്‍വേയോടെ ചെന്നിത്തലയുടെ അവസാന പ്രീക്ഷയും പോയി. സഖാക്കള്‍ക്കാവട്ടെ ആവേശവും.