സോളാര് കേസ്; ക്ലീന് ചിറ്റ് ഉമ്മന് ചാണ്ടിക്ക് മാത്രം, മറ്റുള്ളവര്ക്കെതിരെ അന്വേഷണം തുടരുന്നു
സോളാര് പീഡന കേസില് ഉമ്മന് ചാണ്ടി ഒഴികെയുള്ള നേതാക്കള്ക്ക് ക്ലീന് ചിറ്റ് നല്കാതെ ക്രൈം ബ്രാഞ്ച്. കെ.സി വേണുഗോപാല്, അടൂര്പ്രകാശ്, ഹൈബി ഈഡന്, എ പി അനില് കുമാര്, എ പി അബ്ദുള്ളക്കുട്ടി എന്നിവര്ക്കെതിരെയുള്ള അന്വേഷണം തുടരുമെന്നും പരാതിക്കാരി തെളിവുകള് നല്കുന്നില്ലെന്നും ക്രൈം ബ്രാഞ്ച് കേന്ദ്ര ആഭ്യന്തര വകുപ്പിന് നല്കിയ റിപ്പോര്ട്ടില് പറയുന്നു.
കേസിലെ സുപ്രധാന സാക്ഷിയും പരാതിക്കാരിയുടെ ടീം സോളാര് കമ്പനിയിലെ ജീവനക്കാരനുമായ മോഹന്ദാസ് പരാതിയില് പറയുന്ന കാര്യങ്ങള് നിഷേധിച്ചു. സാക്ഷികളില് ചിലര് മരിച്ചു. നേതാക്കള്ക്കെതിരെ സാങ്കേതിക തെളിവുകള് ഉണ്ടെന്ന് പരാതിക്കാരി അവകാശപ്പെട്ടെങ്കിലും, ആവര്ത്തിച്ച് നോട്ടീസ് നല്കിയെങ്കിലും അത് ഹാജരാക്കിയില്ലെന്നും ക്രൈം ബ്രാഞ്ച് റിപ്പോര്ട്ടില് പറയുന്നുണ്ട്.
സംഭവം നടന്നുവെന്ന പറയുന്ന സമയത്തെ അടൂര് പ്രകാശിന്റെ ടൂര് രേഖകള് ഇതുവരെ കിട്ടിയിട്ടില്ലെന്നും റിപ്പോര്ട്ടില് പറയുന്നു. മസ്ക്കറ്റ് ഹോട്ടലില് വെച്ച് പീഡിപ്പിച്ചുവെന്ന അബ്ദുള്ളക്കുട്ടിക്കെതിരായ പരാതിയിലും അന്വേഷണം നടന്നുവരികയാണെന്നാണ് ക്രൈം ബ്രാഞ്ച് പറയുന്നത്. ഹോട്ടല് രേഖകള് ഉള്പ്പെടെയുള്ളവ പരിശോധിച്ചുവരികയാണ്. ഹോട്ടല്ജീവനക്കാരെ ചോദ്യം ചെയ്യുകയും ഹോട്ടല് രജിസ്റ്റര് പരിശോധിക്കുകയും ചെയ്തു. സംഭവസമയത്തെ വസ്ത്രങ്ങള് ഹാജരാക്കാന് നോട്ടീസ് നല്കിയിരുന്നെങ്കിലും പരാതിക്കാരി അത് ഇതുവരെയും ഹാജരാക്കിയിട്ടില്ല.
ഹൈബി ഈഡനെതിരായ കേസിലെ അന്വേഷണം കുറച്ചുകൂടി മുന്നോട്ടുപോയതായാണ് ക്രൈം ബ്രാഞ്ച് പറയുന്നത്. സംഭവസമയത്ത് ധരിച്ചിരുന്ന സാരി പരാതിക്കാരി ഹാജരാക്കുകയും അത് ഫോറന്സിക് പരിശോധനയ്ക്ക് അയച്ചതായും ക്രൈം ബ്രാഞ്ച് പറയുന്നു. സംഭവം നടന്ന സമയത്ത് എംഎല്എ ഹോസ്റ്റലിലെ ജീവനക്കാരുടെ മൊഴിയെടുക്കുകയും ചെയ്തു.
കെ സി വേണുഗോപാലിനെതിരേയും എ പി അനില് കുമാറിനെതിരെയുള്ള കേസിലും പീഡനം നടന്നതിനുള്ള തെളിവുകള് കിട്ടിയിട്ടില്ലെന്നാണ് റിപ്പോര്ട്ട്. കൂടാതെ ഡിജിറ്റല് തെളിവുകള് ഹാജരാക്കുമെന്ന് പറഞ്ഞിരുന്നെങ്കിലും പരാതിക്കാരി അത് ഹാജരാക്കിയിട്ടില്ല. ഏഴ് വര്ഷം കഴിഞ്ഞതിനാല് മൊബൈല് ഫോണ് രേഖകളും കിട്ടിയിട്ടില്ല. കേസില് കൂടുതല് അന്വേഷണം നടക്കുന്നുണ്ടെന്നാണ് ക്രൈം ബ്രാഞ്ച് വ്യക്തമാക്കുന്നത്.
സാങ്കേതിക തെളിവുകളുടെ അഭാവം, കാലപ്പഴക്കം എന്നിവ അന്വേഷണത്തെ ബാധിക്കുന്നുവെന്നാണ് ക്രൈം ബ്രാഞ്ച് പറയുന്നത്. ക്രൈം ബ്രാഞ്ചിന്റെ റിപ്പോര്ട്ട് കൂടി പരിശോധിച്ചതിനു ശേഷമാവും കേസ് ഏറ്റെടുക്കണോ എന്ന് സിബിഐ തീരുമാനിക്കുക.
https://www.facebook.com/Malayalivartha
